Recientemente lectornan di Bon Dia Aruba a tuma contacto cu nos mesa di redaccion pa expresa nan preocupacion pa un posibel situacion na Baby Beach na unda Secrets Hotel a pone dos bandera cu tabata mustra manera si nan tabata reserva e parti di beach ey pa nan huespednan. Bon Dia Aruba a investiga esaki pa clarifica e situacion.
Algun lector preocupa pa informa nos mesa di redaccion tocante un preocupacion cu nan tin despues di a mira cu Secrets Hotel, cu recientemente a habri su portanan, a pone dos bandera na Baby Beach.
Esaki, segun e lectornan, tabata mustra como si fuera cu e hotel tabata reservando e parti di e beach, e parti entre e banderanan, exclusivamente pa nan huespednan.
A base di e informacion aki, Bon Dia Aruba a bay Baby Beach pa asina investiga kico ta e situacion y si en berdad ta trata cu e hotel ta reservando un parti di e lama exclusivamente pa su huespednan.
Reportera di Bon Dia Aruba a combersa cu dos empleado di Secrets Hotel cu tabata presente na e sitio kendenan a clarifica cu esey no ta e caso. Nan a splica cu na ningun momento y bou di ningun circunstancia e hotel ta reserva un parti di e lama, e lama ta keda publico pa tur hende.
E banderanan cu e hotel ta pone ta sirbi simplemente manera un punto di encuentro pa turistanan sa unda un van di e hotel ta para pa asina nan por yega cerca e trahadonan y busca stoel, parasol of cualkier cos cu nan tin mester pa disfruta di nan dia na lama.
Mester remarca cu e stoelnan aki no ta poni riba e beach, ta e turistanan ta busca esakinan cerca e empleadonan di e hotel y ta pone nan riba beach pa asina haci uso di nan.
