E Revolucion den AI Medico

Inteligencia Artificial den e decadanan cu ta bay bin lo tin impacto profundo y radical pa full nos sociedad. Un di areanan unda e impacto aki lo ta mas grandi y potencialmente sumamente positivo ta den ramo di Medicina. E combinacion di “Big Data”, herment Diagnostico di generacion nobo, Bio-Sensors, y awo herment super potente di AI ta duna e profesional den salubridad di siglo 21 posibilidadnan grandi y potente. Den e columna aki nos lo toca un par di e temanan aki y dicon e revolucion den AI Medico lo ta un oportunidad inmenso pa full comunidad.

Pero prome nos cuminsa nos mester realisa e desafionan cu e sector medico ta enfrentando den siglo 21. Esta e tendencianan di demografia unda tin hopi mas hende di edad halto den nos sociedad, esaki ta causando cu salubridad ta birando mas y mas caro cu cada aña cu ta pasando. Pa haci e situacion mas vulnerabel ainda principalmente na Aruba tin scarsedad di medico profesional.

Tur esaki ta haci e topico di usa tecnologia innovativo no solamente un luho, pero algo esencial pa nos sistema di salubridad social por sobrevivi den e decadanan binidero. Pero dicon e ta relevante pa nos sector medico local profundisa su mes den e topico aki?

Wel ya caba e cantidad di articulo academico den database di Pubmed na aña 2023 tabata rond 30 miyon articulo, creciendo cu mas cu 1 miyon articulo pa aña. Simplemente e ta imposible pa un ser humano ni con motiva y sabi e por ta, pa por compronde e ocean masivo cu ta e total di ciencia medico. Na mesun momento innovacion medico ta creciendo den manera exponencial. Por ehempel, ya caba tin mas cu 100 algoritmo di AI medico cu FDA na Merca a duna permiso pa opera den clinica. Tambe, e posibilidadnan diagnositico cu dokternan tin awo ta uno masha masivo mes, cu por ehempel, sensornan ultra high-tech cu por midi casi tur cos y testnan avansa di metabolismo y te hasta test epigenetico. Pero pa e profesional y organisacionnan medico e por ta hopi dificil pa wak e potencial practico den e selva di tur e tecnologianan nobo aki.

Door di esaki e ta hopi importante pa e profesional medico den siglo 21 ta na altura di tur e posibilidadnan, pero tambe nan riesgonan y finalmente con pa por usa tur e hermentnan high-tech aki den forma responsabel y bon pensa.

Den contexto aki, mi persona ta honra pa comparti cu mi lo tene un charla honorario informativo over Inteligencia Artificial Medico na American University School of Medicine Aruba (AUSOMA), dia 17 di Juni, 3PM. E charla ta completamente gratis.

E meta di e lezing aki ta pa duna Aruba un introduccion na nivel halto over e topico di Medical AI, elaborando riba e base tecnico di esaki cual ta Big Data, despues nos lo toca e tema di Clinical Prediction Models, cabando e lecture cu e temanan mas “Star Trek”, manera tur e hermentnan avansa nobo di diagnostica y con tur esaki ta empodera e hermentnan basa riba AI Medico. Segun varios literatura di calidad halto esaki, lo haci cu e salud di pacient lo mehora, cu gastonan den e sistema medico lo baha, e percepcion bou pacient di e sistema medico lo hisa y finalmente e lo baha werkdruk pa tur profesional den e ramo medico.

Tur e innovacionnan aki lo haci cu e medico di siglo 21, lo ta mas precies den su diagnose & tratamento y na mesun momento lo tin mas tempo pa locual ta e cos mas importante den salubridad, esta e banda humano di empatia y guia cu un dokter por duna su pacient.

En berdad si nos cuminsa usa tur e posibilidadnan disponibel den forma bon pensa y responsabel nos por cuida nos sistema di salubridad social cual nos mester ta hopi orguyoso di dje y na mesun momento hisa su calidad pa ambos pacient y dokternan concerni.