Acuril (Association of Caribbean University, Research and Institutional Libraries) ta un organisacion Caribense cu ta promociona y yuda reenforsa colaboracion y desaroyo entre bibliotecanan, archivonan y otro fuentenan di informacion den region di Caribe. Acuril ta apoya y sostene profesionalnan riba e terenonan aki por medio di networking, desaroyo profesional y proyectonan colaborativo.
Tres pa cuatro siman pasa, Sr. Friedrich ‘Chibi’ van der Hans a tende cu Acuril 2025 lo ta na Corsou di 9-12 di Juni. Mesora el a acerca Astrid Britten cu un plan: pa cada pais cu participa cu Acruril 2025 ricibi un copia di LAB_Volume One pa hiba back pa nan biblioteca, universidad of archivo.
Astrid Britten a duna su sosten na e plan considerando e importancia di por comparti locual ta Aruba su Herencia Cultural por medio di Carnaval, den forma di e publicacion grandi aki cu ta LAB_Volume One. Tabatin 24 pais a registra pa participa cu Acuril 2025.
Siguientemente Sr. Van der Hans a skirbi carta pa Ministernan di Cultura y di Enseñansa considerando e balor cultural y asina educativo di e publicacion. E tempo tabata hopi cortico pero tur hende apoya e idea y finalmente ta Departamento di Cultura a haya e opdracht pa tuma e proyecto aki bao di nan encargo cu tur aprobacionnan necesario.
Danki ta bay tambe na Mastercargo pa percura pa e carga yega bon y na tempo te na porta di Acuril. Sin duda palabranan di gradicimento na e comite organisatorio di Acuril specialmente Nitzah Jacobus pa traha un espacio den nan programa.
Dia 12 di Juni ultimo durante e ceremonia di clausura, despues di un speech di Zetsia Ponson hunto cu Astrid Britten, tur 24 pais a ricibi nan ehemplar di LAB_Volume One.
Por a comrpronde di Astrid Britten ta cu tur hende a keda impresiona y hopi contento cu nan bukinan.
Paisnan cu participa: Curaçao, Guyana, Jamaica, Bahamas, Republica Dominicana, Trinidad & Tobago, Puerto Rico, Haiti, Surinam, Barbados, Venezuela.
