(Earth.com) – Un estudio nobo publica den e journal Heart, basa riba datonan di mas cu 432 miyon persona, a revela un conexion cla: hende cu ta usa cannabis tin un riesgo hopi mas halto di atake di curason, stroke y hasta di muri di malesa di curason.

Den mas cu mita di estadonan na Merca y algun pais na Europa, manera Francia, dokter por duna cannabis na pashent como remedi, pero uso recreacional ta ilegal. Maske e no ta permiti pa uso recreacional, hobennan na Francia toch ta us’e hopi. Alemania recientemente a cambia su leynan, y awo ta permiti hene usa cannabis recreacional for di april 2024.

Awo mas hende ta usa cannabis, y e producto cu nan ta usando ta mas fuerte cu antes. E cannabis di awendia tin mas THC, loke ta nifica efectonan mas fuerte riba cerebro y curpa – specialmente e curason.

Investigadornan a evalua 3,012 estudio. Entre nan, 24 estudio tabata enfoca riba e vinculo entre cannabis y problema mayor di curason.

Un analisis di e investigacion a mustra cu hende cu ta usa cannabis tin un riesgo 29 porciento mas halto di un atake di curason, 20 porciento mas halto pa stroke (atake cerebral) y mas cu dobel e riesgo di muri di malesa di curason.

Riesgo di stroke no tabata mustra mescos den tur estudio. Algun no a haya vinculo fuerte, specialmente den hende cu a usa cannabis un of dos biaha. Pero ora investigadornan a enfoca riba usuarionan mas frecuente of adulto hoben, e riesgo a bira mas cla.

Na Australia, un estudio a haya cu hende cu ta usa cannabis semanalmente tabatin cinco biaha mas probabilidad di sufri stroke of mini-stroke. Database di un hospital tambe a haya riesgo eleva, specialmente den hende entre 25 y 34 aña di edad.

E resultado ta sugeri cu uso ocasional di cannabis por no ta un riesgo, pero uso regular, specialmente entre hoben, ta peligroso.

Ademas, un estudio a mustra cu usuarionan di cannabis di 15 pa 22 aña di edad tabatin 36 porciento mas probabilidad di sufri un atake di curason. Otro a haya cu hende usando cannabis mas cu un biaha pa siman tabatin mas cu dobel e probabilidad. Esey despues di ahusta pa tabaco, cocaina y otro droga. Cannabis a sali como e predictor mas fuerte den un estudio na un hospital Frances – mas fuerte hasta cu cocaina.

Esey no ta e storia cu nos ta tende usualmente tocante cannabis, pero e cifranan ta papia mas cla cu opinion.

E riesgo di eventonan cardiovascular fatal tambe a keda investiga. Den un estudio, pashentnan jong cu tabatin atake di curason y tambe a usa cannabis tabatin mas probabilidad di muri. E vinculo a keda consistente hasta despues di controla pa humamento of otro condicion.

Otro estudio na Merca a confirma cu usuarionan di cannabis tabatin un riesgo hopi mas halto di muri di causa relaciona cu curason. Na Reino Uni, un estudio di 2024 a revela un twist inespera: muhe, no homber, tabata enfrenta riesgo mas halto di morto relaciona cu curason di uso pisa di cannabis.

Y e beneficionan?
 Cannabis a mustra varios beneficio medico proba, specialmente bao guia di dokter. Un di su usonan mas reconoci ta pa trata dolor cronico. Hende cu condicionnan manera artritis, sclerosis multiple of herida relaciona cu nervio hopi biaha ta haya alivio cu tratamentonan basa riba cannabis.

E componentenan di e mata – principalmente THC y CBD – por interactua cu e sistema endocannabinoide di e curpa pa reduci señal di dolor y inflamacion.

Cannabis medicinal tambe ta yuda pashent di cancer door di alivia nausea y sacamento causa pa kimoterapia, y den algun caso, por stimula apetito pa esnan luchando cu perdida di peso pa motibo di malesa.

Dokter tambe a usa cannabis pa yuda pashent cu problema neurologico. Den algun forma di epilepsia, specialmente mucha, remedi basa riba CBD a reduci e cantidad y severidad di atake.

E ehempelnan aki ta refleha con cannabis, ora us’e apropiadamente, por duna beneficio real pa pashent, haciendo mas facil pa algun persona ignora e implicacionnan general pa salud mara na uso di cannabis.