Colegio Arubano ta di regreso den un situacion cu ta parce mes malo cu esun di e periodo di conflicto anterior, cu como cinco aña pasa a resulta den varios cambio den dirigencia di e scol, tanto na nivel di director como den e directiva di e fundacion cu ta goberna e instituto. Awor por mira e mesun problemanan di e periodo scur ey bolbe, cu consecuencia grave pa e ambiente den cual docente y studiante mester purba haci loke nan mester haci. Aparentemente, atrobe liderazgo ta fayando.

Como medio nos mes caba tin un cantidad considerable di articulo y opinion den nos archivo cu ta duna un vistazo den e situacion anterior. For di esaki nos por mira atrobe similaridad cu e problemanan den e periodo 2020 – 2022 cu esunnan di awe, cu a conduci na un situacion sin mas inaceptable pa un scol. Un di e promer problemanan cu por reconoce ta atrobe e mal ambiente entre directiva di e fundacion y e rector cu mester ta encarga cu e maneho diario di e scol. Atrobe ta surgi e mesun critica di actuacion autoritario di presidente di e fundacion, cu segun e critica ta demasiado involucra den e maneho diario. Por duna e dirigencia di e fundacion e beneficio di duda, pero nos mester bisa cu esey en todo caso tabata un di e raiznan importante den e conflicto, cu a conduci na un cambio drastico den directiva di e fundacion. No solamente a bin un cambio total di persona den e fundacion, sino tambe un cambio den e entidadnan cu por a nombra miembro den e fundacion, esta cu Iglesia Catolico, cu desde 2013 tabata conta cu un solo representante den e fundacion, a pasa pa tuma un posicion hegemonico den e directiva.

Te awe ainda Aruba lo mester haya un splicacion adecua di e ‘move’ aki, sigur den caso di un instituto educativo cu desde su inicio tempran den añanan 60 tabata hiba un caracter di ‘bonbini’ pa persona di tur creencia. Esnan cu a kere cu e accion ey, haciendo uso di e confusion di e tempo ey pa trece e scol back bao supervision clerical, lo a trece paz y un dirigencia cu un vision moderno y profesional, a resulta di ta completamente equiboca, mirando con awor atrobe e mesun problema di actitud autoritario ta menaza e ambiente interno, mientras e directiva ta e promer yama pa garantiza hustamente un ambiente pacifico y di bon colaboracion. Aparentemente e cuadronan scogi pa e liderazgo nobo no a bin cu un vision y filosofia cu lo a beneficia e scol. Pa bon comprension: esey riba su mes no tin relacion cu e caracter religioso; tin centenares di instituto educativo religioso na tur parti di mundo, cu ta haci bon trabao di dirigi e proceso di educacion cu a pone den nan man. Esey nos no ta señala como problema. E problema ta atrobe e seleccion di hende cu por lo visto no tin e capacidad pa dirigi un instituto di enseñanza avanza awendia.

Y esaki ta exactamente e miedo cu nos a expresa na inicio di 2022, despues di e cambionan drastico a caba di tuma lugar. Editorial di 22 di januari 2022: “Di tur manera, hasta si esnan cu ta responsable pa e maneho ideologico di e fundacion ta haya cu nan coriente religioso ta esun mas importante, asina mes ta keda e responsabilidad primordial di ofrece educacion ehemplar na tur studiante, irespecto nan background religioso. Y haciendo esey, ta imposible ignora e mas di seis decada cu e scol a evoluciona hunto cu e comunidad, y ta pidi pa solucion di problema di awe, na un manera di awe. Y e manera cu a bira manifiesto den e ultimo dianan, di parti di e directiva di fundacion tabata uno di “nos no tin nada di duna cuenta na niun hende”. Nos ta kere cu aki ta e eror principal, pasobra den e era moderno aki ta imposible pa hiba rienda di un organisacion di e tamaño aki, cu decenas di docente y mas di mil alumno y nan mayornan, sin tuma na cuenta con esakinan ta pensa.”

En todo caso, awe na 2025 por constata cu e scol no ta avanzando den mehoracion di su dirigencia, irespecto e caracter ideologico. Un scol na 2025 ta un lugar di duna educacion, no enseñanza so, unda mester tin prioridad pa interes di alumno, docente y mayornan, tumando na cuenta interes di comunidad en general. E problema mas grave ta e efecto di tur esaki riba e studiantenan, cu e agravante cu nan resultadonan pa cuminza pa decadas caba no ta na e nivel desea. Esaki na promer lugar ta afecta bida di e studiantenan den continuacion di nan carera, unda conocimento deficiente di e idiomanan den cual nan ta sigui studia ta un barera enorme.

Y ya cu nos ta papiando di dirigencia deficiente, ta bon pa constata cu lamentablemente e scol aki no ta un excepcion na nos isla. E ta un problema cronico den nos gobernacion y hasta den comunidad. Esey no ta un cuestion di critica esnan cu ta yama pa dirigi, no den tur sentido en todo caso. Den un comunidad chikito cu e grado halto di organizacion cu nos conoce, ta importante haci un esfuerzo grandi extra pa garantiza un minimo aceptable di lider den tur ramo y ambito. Nos no por sigui opera un pais asina desaroya, cu seleccion di lider na un nivel, salvo algun excepcion faborable, asina primitivo. ‘Bon gobernacion’ no ta un lema y meta pa gobierno so…