(AP) — Presidente Donald Trump a bisa diamars cu Israel a acepta e condicionnan pa un alto al fuego di 60 dia den Gaza y a adverti Hamas pa tuma e acuerdo prome cu e situacion empeora.

Trump a anuncia e desaroyo mientras cu e tabata preparando pa ricibi prome minister Israeli Benjamin Netanyahu na e Cas Blanco dialuna. E lider Mericano a sigui pone presion riba gobierno di Israel y Hamas pa logra yega na un alto al fuego, un acuerdo pa liberacion di rehennan, y pone fin na e guera den Gaza.

“Mi representante tabatin un reunion largo y productivo cu e Israelinan awe tocante Gaza. Israel a acepta e condicionnan necesario pa finalisa e alto al fuego di 60 dia, durante cual nos lo traha cu tur partido pa pone fin na e guera,” Trump a skirbi, agregando cu Qatar y Egipto lo entrega e proposicion final.

“Mi ta spera, pa bon di Medio Oriente, cu Hamas tuma e acuerdo, pasobra e no lo bira miho – e lo solamente empeora,” el a agrega.

Skepticismo for di Hamas y esfuerso diplomatico continuo

Trump su afirmacion cu esaki ta su miho y ultimo oferta por enfrenta resistencia for di Hamas. Hasta prome cu e alto al fuego mas largo den maart a caba, Trump a emiti regularmente ultimatumnan dramatico pa pone presion riba Hamas pa acepta pausanan mas largo den e combatenan unda por libera mas rehen y permiti mas yudansa humanitario na e poblacion civil den Gaza.

Minister di Asuntonan Strategico di Israel, Ron Dermer, tabata na Washington diamars pa reuni cu oficialnan halto di e administracion pa papia tocante un posible alto al fuego, Iran, y otro asuntonan. E tabata anticipa pa reuni cu vice-presidente JD Vance, Secretario di Estado Marco Rubio, y enviado special Steve Witkoff.

Mas tempran den dia, Trump a ripiti su speransa pa logra yega na un acuerdo di alto al fuego entre Israel y Hamas durante e siman cu ta bin.

Ora cu periodistanan a puntra si no ta tempo pa pone presion riba Netanyahu pa logra un acuerdo, Trump a responde cu e prome minister Israeli ta dispuesto pa logra yega na un areglo:

“E kier,” Trump a bisa tocante Netanyahu durante un bishita na un centro di detencion pa inmigracion na Florida.“Mi ta kere nos lo tin un acuerdo e siman cu ta bin.”

Obstaculo principal: si e guera mester caba como parti di e acuerdo

Nan negociacionnan a sigui cay den otro riba un punto clave: si e guera mester caba como parti di e acuerdo pa alto al fuego. Actualmente tin aproximadamente 50 rehen na Gaza, y segun reportahenan, probablemente menos cu mita ta na biba ainda.

E anuncio a yega na mesun tempo ora mas di 150 organisacion humanitario internacional a pidi pa desmantela un sistema di distribucion di yudansa den Gaza cu ta ser apoya pa Israel y Merca, pasobra e sistema ta provoca caos y violencia mortal contra Palestinonan cu ta busca cuminda.

Un declaracion conhunto firma pa Oxfam, Save the Children, Amnesty International, entre otro, a bin despues di e asesinato di un minimo di 10 Palestino cu tabata busca cuminda desesperadamente, segun testigonan y oficialnan di Salud. Entretanto, bombardeonan Israeli den Khan Younis na sur di Gaza a mata un minimo di 37 hende, segun Hospital Nasser.