Secretario di Estado nobo pa Asuntonan di Reino Eddie van Marum lo continua cu e maneho stipula pa Ferenc Zsolt Szabó, cu tambe mester a implementa e vision cu Hulanda a palabra cu e paisnan den Caribe. Asina van Marum a bisa ayera.

E Secretario di Estado nobo, Sr. van Marum introduci su mes ayera, despues di reunion di conseho di Minister di Reino unda entre otro a tuma e decision di nombra Mr. Mauritsz de Kort como Gobernador di Corsou (Tambe a aproba e presupuesto di St. Maarten pa 2025 cu speranza pa tratamento na tempo di esun di 2026, “pasobra mas lihe por ricibi presupuesto, miho por haci e analisis.”).

Eltje (Eddie) van Marum a nace na Groningen dia 25 di Mei 1968 y ta pertenece na e organisacion politico BoerBurgerBeweging, BBB. For di tempo cu e tabata hoben, e tabata den cria di baca y produccion di lechi. Despues di su trayectoria military, el a bolbe Groningen cu enfoke riba naturalesa. Semper Van Marum a sigui activo riba e area di cria di bestia y a ehecuta varios funcion di consehero riba area agrario.

Realidad ta si cu sigur pa esnan cu ta sigui politica Hulandes, nombramento di Van Marum a cay manera un sorpresa. Segun e Secretario di Estado, e cartera di Asuntonan di Reino y su contenido no tabata totalmente desconoci pa su persona. E tabata comparti espacio cu ex Secretario di Estado Szabo, y por a sigui hopi di e puntonan cu tabata keda discuti. Como tal, e temanan cu ta cay bou di e cartera, particularmente pa loke ta asuntonan di Reino no ta totalmente nobo p’e. Di otro banda, e ta un ehecutivo demisionario, pues mucho cambio lo no por spera tampoco. Locual si e lo trece den e deliberacionnan cu mester sigui tuma luga ta su propio cualidad como hende. “E habilidad di por scucha otro, tene bon combersacion. Pa mi e aspecto humano ta di suma importancia, tanto den mi trabou como den mi bida personal. Aunke mi no lo bay otro direccion si, pasobra ya tin hopi asunto andando caba, manera bon gobernacion, finanzas publico stabiel. Un aspecto cu pa Van Marum ta importante ta e tema di siguridad di cuminda, cu ta yega hopi cerca di dje y kier duna su maximo pa e islanan tambe, el a bisa.’

Di otro banda, su cartera ‘Restauracion Groningen,’ ta uno pisa, no solamente den e arena politico, pero tambe den e area di hende, ya cu ta hopi mes ta afecta pa e decada di temblornan y promesa di ayudo di estado Hulandes. Pero, ta sigura cu tur su enfoke ta pa ehecuta e miho trabou posibel pa tur e responsabilidadnan cu ta cay bou di su cartera nobo. “Mi punto ta pa sigui cu velocidad halto pa traha riba tur e areanan.”

Rijkswet Aruba

Van Marum a mustra cu e no ta mira cambio tampoco den e proceso pa yega na e rijkswet Financieel Toezicht Aruba, Raft. “E textonan di ambos banda ta cla y nos lo mester discuti esaki den Conseho di Minister di Reino pa despues manda e ley pa Raad van State,” Eddie van Marum a bisa. “Mi no ta mira motibo di tardanza.”

Resiliencia y zelf redzaamheid

A base di e notanan riba e landspakketnan pa paisnan CAS (Corsou, Aruba, St. Maarten) Gobierno Hulandes mes ta nota cu un di e metanan principal, cu ta resiliencia no ta logrando manera ta desea, ni cu ayudo di Hulanda. Sinembargo, esaki segun no ta motibo pa trece cambio den e forma con mester ehecuta e landspakketnan. “Mi mester sigui e linea pero mi punto di salida ta pa yega na solucion y mira unda por contribui pa hunto yega na solucionnan.” Sr. Van Marum a bisa cu tin bon combersacionnan y e paketenan ta brinda perspectiva cu ta na interes di e islanan.

BBB

A papia tambe di e comparacion di esnan den e mundo agrario (boeren) y ciudadnan Hulandes den e islanan BES cu tin hopi paralelo. E impresion ta cu no tin mucho oido pa ciudadanonan aki. Y pa Van Marum , e ta esencial pa pone hopi atencion pa e ciudadnan Caribense aki. “Nos di BBB a pone enfasis riba e hende. Pero nos no ta nos so den Gabinete y otro Ministernan tambe mester bira con pa duna nan contribucion pa mehoracion di calidad di bida, incluso mehora siguridad di cuminda.”

E Secretario di Estado mes nunca a yega di bishita e paisnan y ta anticipa su prome bishita cu ta programa pa dianan 10 pa 15 di Augustus, unda e lo reuni cu gobernantenan di e paisnan di Reino den Caribe.