Ayera despues di un audiencia cu Gobernador di Aruba, prome minister Mike Eman a duna di conoce cu a tuma e decision finalmente pa nombra otro candidato pa minister na lugar di Sr. Mike De Meza. E di siete minister di Gabinete AVP-FUTURO lo ta encarga cu e cartera di Infrastructura, Energia y Telecomunicacion.

Maart ultimo, Gabinete AVP-FUTURO a tuma nan posicion den gobierno di Aruba, cu seis minister en bes di siete. Esaki pasobra e candidato pa minister di Infrastructura, Energia y Telecomunicacion, actual parlamentario di AVP, Sr. Mike de Meza, no a pasa e screening pa bira minister, specificamente e parti di e screening relaciona cu comportamento fiscal.

Na momento cu a bira conoci cu Sr. De Meza no a pasa e screening pa motibo di e investigacion di Departamento di Impuesto (DIMP), formador y prome minister Eman a tuma e decision pa pone e cartera temporalmente bao maneho di minister di Husticia, Integracion y Transporte Publico, Sr. Arthur Dowers. Esaki mientras tabata purba di “resolve” e situacion di De Meza, pa finalmente e haya un declaracion nobo di DIMP indicando cu su comportamento fiscal ta bon pa e por bira minister. Esaki no a sucede.

Pero entre tanto, DIMP a entrega un keho penal contra De Meza, y Ministerio Publico a cuminsa un investigacion. Esaki a prolonga e problemanan di De Meza, cu a hiba OM corte pa nan confirma si e ta un sospechoso den un caso penal. Esaki pasobra ley ta stipula cu un persona cu ta sospechoso den un caso penal of a keda condena pa un crimen, no por bira minister di Aruba. Na final, OM a bisa solamente cu a informa De Meza si e ta minister of no, pero no a informa kico e investigacion ta encera, y no a bisa publicamente cu e ta un sospechoso explicitamente.

Sinembargo, di e vonnis den e caso di De Meza contra OM, por asumi cu en berdad e ta un sospechoso den un caso penal, loke ta invalid’e pa un posicion como minister.

E falta di accion decisivo di prome minister Eman a ricibi hopi critica pa permiti incertidumbre y instabilidad den gobierno pa tres luna caba. Esaki en parti pasobra hopi ta cuestiona pakico ta asina importante pa Sr. De Meza ta esun cu ta bira minister, of si no tin otro persona capaz. Pero tambe pasobra net e carteranan di Infrastructura y Energia tin asuntonan di sumo urgencia y importancia pa Pais Aruba, y mientras tanto nan ta “temporalmente” den man di un minister encarga. Ya cu e minister encarga no ta nombra oficialmente como minister di e carteranan aki, por conclui cu no tin autoridad completo riba e ministerionan en cuestion, loke ta nifica naturalmente cu cierto decision y accion ta keda limita of posponi. Y net den sector di Energia, cu ta bao hopi presion pa desaroyonan geopolitico cu tin impacto riba disponibilidad, suminstro y transporte di petroleo, manera e gueranan di Rusia contra Ucrania y Israel contra Iran.

Ta busca otro candidato “mientras tanto”
 Finalmente despues di tres luna, prome minister a bisa prensa local cu ta busca otro candidato pa e cartera cu De Meza mester a carga, esta Infrastructura, Energia y Telecomunicacion.

Ken por bira un candidato nobo, no a keda confirma, y ta parce cu ainda no a tuma un decision definitivo. Tambe a laga espacio pa interpretacion cu Sr. De Meza ainda lo por bira minister na final.

Den comentarionan na prensa local pafo di oficina di Gobernador, prome minister a bisa cu “generalmente gobierno ta riba su ritmo. Decisionnan ta wordo tuma riba hopi area pa mehora e calidad di bida di nos hendenan.”

Contestando con hopi falta pa nombramento di e ultimo minister di Gabinete AVP-FUTURO, ya cu candidato De Meza ta sospechoso den un caso penal, prome minister Eman a bisa: “Pa nos ta importante cu nos comunidad ta mira e trabaonan cu gobierno ta haciendo, pero logicamente tambe kier mira e Gabinete ta completo. E ausencia di Sr. De Meza nos a sintie hopi pasobra ta un persona cu nos tabatin den e proceso pa yega na un team completo. E pensamento cu locual e ta bay agrega na e ekipo ta algo hopi importante pa locual ta trata energia, conocemento, etc. Y e hecho cu el a haya e obstaculonan aki logicamente a haci e dolor, pero a haci nos tur dolor.”

Prome minister a agrega cu pa loke ta trata Energia y Infrastructura, “minister Dowers ta atendiendo cu nan, pero logicamente cu Sr. De Meza lo nos tabatin e input importante di su conocemento.” El a indica ademas cu a pesar cu De Meza no tabata minister, si e tabata duna “idea” na minister Dowers tocante e carteranan. El a bisa cu “a consulta continuamente [cu De Meza] si riba kico mester haci riba e tereno cu el a haci hopi trabao adicional, y minister Dowers ta den contacto cune riba e ideanan cu e tin pa locual ta trata e diferente portefeuille y awo cu e ta bisto cu nos tuma e siguiente paso pa yena e buraco den e portfolio aki, nos ta bay ta canando e caminda ey.”

Algo cu a hala hopi atencion ta cu prome minister a parce di indica cu tin un chens cu ainda Sr. De Meza por bira minister. Esaki pasobra el a papia di nombra un otro persona “mientras tanto.”
“Na e momentonan aki nos ta den e proceso – mi tabatin combersacion cu Sr. De Meza, e tambe ta compronde cu nos a yega na e punto cu mester busca un otro candidato, mientras tanto en todo caso – y partido lo bay internamente pa haci evaluacionnan di kico ta e miho decision, y esey nos no a yega na dje ainda. Kiermen speculacion lo tin hopi, pero nos no a yega na un decision final.”

Prome minister Eman a bisa cu “e punto aki tin nos atencion completo y desde momento cu e obstaculonan a inicia pa Sr. De Meza, continuamente ta den dialogo.” El a lamenta cu Sr. De Meza no a logra “supera e obstaculonan” a traves di casonan den corte, pero awo cu ta asina leu, mester tuma un decision. “Nos no kier a haci esey prome pasobra bo no ta anticipa riba algo cu bo no ta desea pa e bay den e direccion ey, bo ta desea pa e bay den e direccion positivo. Pero nos ta realistico, esaki tin riba mesa awo, kiermen nos tin cu cana e caminda di haci esfuerso pa yega na haci e team completo.”

Rumornan den ambito politico ta indica cu ta considerando Sr. Rene Herde pa asumi e cartera di Infrastructura, Energia y Telecomunicacion. Contestando si na momento cu e team ta completo, Sr. Rene Herde lo bay como minister plenipotenciario na Hulanda, prome minister Eman a bisa: “Mi ta keda cu nos comunidad lo sigui di cerca. Y asina cu nos tin algo concreto di bisa, nos lo bis’e.”

Consecuencia
 Un aspecto di e situacion aki cu parlamentario De Meza cu a crea hopi preocupacion den comunidad, tabata rumornan cu Sr. De Meza a indica cu si e no bira minister, e lo bandona e partido berde y bay cu su asiento. Maske riba su mes, e retiro di De Meza no lo tin un consecuencia enorme pa e coalicion, tabatin indicacion cu tabatin tres otro parlamentario di AVP cu lo tabata dispuesto pa bandona e partido hunto cune.

E rumor aki a bira mas fuerte despues di un comunicado di prensa den cual Fraccion AVP den Parlamento a expresa “solidaridad” cu colega De Meza mientras e tabata bringa su caso pa bira minister, loke hopi a interpreta como un declaracion di lealtad na dje.

Sinembargo, e declaracionnan di prome minister Eman ta sugeri cu De Meza tabata involucra di cierto manera den e cartera di minister caba, y tambe cu e ta involucra den e combersacionnan riba e proximo candidato pa asumi e ministerio, y si tene cuenta cu e comentario di prome minister cu ta buscando un persona “mientras tanto en todo caso”, por asumi cu no tin un impasse asina den partido AVP.