(AP) – Miles di fanatico emociona a reuni na un zoologico di Tailandia diahuebs pa celebra e prome cumpleaños di Moo Deng, e hipopotamo baby di e tipo ‘pygmy’ cu a bira un sensacion riba rednan social.
Khao Kheow Open Zoo tabata yen di fanatico di Moo Deng durante e prome 4 dia di actividadnan marcando e hipopotamo su cumpleaños. Muchanan di menos di 12 aña por drenta e zoologico, alrededor di 2 ora leu for di e capital Bangkok, gratuitamente durante henter e celebracion.
Varios e fanaticonan di Moo Deng a biaha distancianan leu pa mir’e.
Entre nan tabatin Molly Swindall, ken a biaha for di New York pa e celebracion. E tabata mira ta pasa un plato di cuminda pa e empleado di zoologico pa duna Moo Deng como desayuno, cual e hipopotamo y su mama rapidamente a come. “Mi ta stim’e asina hopi cu mi a bisa, bo sa, mi tin 3 of 4 dia off di trabao,” Swindall a bisa. “Mi por logra bay Tailandia. Mi lo ta aya pa 30 ora si pero esaki ta suficiente pa mira Moo Deng. Y esey ta exactamente loke mi a haci.”
Pa diahuebs atardi, e cantidad di bishitante a yega 12,000, director di e zoologico Narongwit Chodchoy a bisa. A pesar di e zonido di e bishitantenan yamando su nomber pa haya su atencion, Moo Deng tabata pacifico mientras e tabata landa den e pool di su habitat.
Fanaticonan a saca potret di Moo Deng y a canta “Happy Birthday” mientras tabata pone su bolo, traha di un variedad di fruta y berdura, cerca di e pool.
“Moo Deng ta mi pildo di felicidad, e ta mi pildo di energia, mi cura. E ta mi vitamina!” Thea Chavez cu a bin for di Texas a comenta.
