(AP) — Carlos Uzcátegui a brasa su casa y yiu muher di criansa cu tabata yorando diaranson ora e solo di mainta den west di Venezuela a lanta. E prome brasa di e famia den mas cu un aña porfin a convenc’e cu su pesadia paden di un prizon na El Salvador a caba.

Uzcátegui tabata entre e migrantenan cu a reuni cu sernan keri despues di cuater luna den prizon na El Salvador, caminda e gobierno di Merca a transferi nan — acusando nan di ta miembronan di un gang stranhero na Merca ilegalmente — den un di e pais su movecionnan mas duro pa reprimi inmigracion.

“Tur dia, nos a pidi Dios pa e bendicion di libra nos di eynan pa nos por ta aki cu famia, cu mi sernan keri,” Uzcátegui, di 33 aña, a bisa. “Tur dia, mi tabata lanta mirando e baranan, deseando cu mi no tabata eynan.”

“Nan a bati nos, nan a scop nos. Mi tin hasta basta kemadura riba mi bariga,” el a agrega prome cu a mustra un abdomen levemente kima.

E migrantenan, di cual algun a caracterisa e prizon como “fierno,” a keda libera diabierna den un intercambio di prizonero entre e gobiernonan di Merca y Venezolano, pero e ultimo a secuestra nan na yegada den nan pais.

Presidente di Venezuela, Nicolás Maduro y otro funcionarionan a bisa cu hopi di e inmigrantenan a ser tortura fisicamente y psicologicamente durante nan detencion na El Salvador, transmitiendo riba television estatal videonan di algun di e hombernan cu ta describi e supuesto abuso, incluyendo violacion, golpinan severo y heridanan cu arma di bala. E narativonan ta recorda e abusonan cu e gobierno di Maduro pa hopi tempo a ser acusa di a comete contra su oponentenan real, percibi of encarcela.

Na momento cu e hombernan a yega nan cas, nan y nan famia a comparti momentonan profundamente emocional den cual lagrimanan tristo y lagrimanan contento a core riba nan cara na mesun momento.

E casa di Uzcátegui, Gabriela Mora, di 30 aña, a tene duro na e heki di nan cas y a yora ora el a mira e vehiculo militar cu tabata carg’e despues di un biahe di mas cu 30 ora den bus pa nan comunidad minero situa den e seronan di Venezuela. E tabatin regalo y decoracion den nan sala, incluyendo un bala blauw metalico den forma di strea cu un saludo di “Feliz Dia di Tata” cu su yiu muher di criansa a warda desde luna pasa.

‘Nos a topa hopi hende inocente’

E 252 homber a termina na El Salvador dia 16 di maart despues cu e administracion di presidente di Merca Donald Trump a bay di acuerdo pa paga $6 miyon na e nacion Centro Americano pa aloha nan den un mega-prizon, caminda gruponan di derecho humano a documenta centenares di morto y casonan di tortura. Trump a acusa e hombernan di pertenece na e gang di caya violento Tren de Aragua, cual a origina na Venezuela.

E administracion no a duna prueba pa sostene e acusacion. Sinembargo, varios migrante recientemente deporta a bisa cu e autoridad Mericano a husga nan tatuahenan eroneamente y a usa esakinan como un excuus pa deporta nan.

Minister di Asunto Interior Diosdado Cabello a bisa diabierna cu solamente shete di e hombernan tin casonan pendiente na Venezuela, añadiendo cu tur e deportadonan lo haci un test medico y control di antecedencia prome cu nan por bay cas.

Arturo Suárez, kende su canticanan di reggaeton a surgi riba red social despues cu el a ser manda pa El Salvador, a yega na e cas di su famia den e capital, Caracas, diamars. Su ruman muher a bras’e despues cu el a sali for di un vehiculo di servicio di inteligencia di Venezuela.

“E ta fierno. Nos a topa hopi hende inocente,” Suárez a conta periodistanan, referiendo na e prizon cu e tabata cera aden. “Na tur esnan cu a maltrata nos, na tur esnan cu a negocia cu nos bida y nos libertad, mi tin un cos di bisa, y e scritura ta bisa bon: Vengansa y husticia ta di mi, y bo ta bay duna cuenta na Papa Dios.”

Associated Press no por a verifica e acusacionnan di abuso cu Suárez y otro migrantenan a conta den e videonan transmiti pa medionan estatal.

Fiscal General Tarek William Saab a bisa dialuna cu el a habri un investigacion contra presidente di El Salvador Nayib Bukele a base di e acusacionnan di e deportadonan. Oficina di Bukele no a responde na peticion pa comentario.

Cita pa busca asilo

E hombernan a bandona El Salvador como parti di un intercambio di prizonero cu Merca, cu a ricibi 10 ciudadano y residente permanente cu gobierno di Maduro a encarcela pa motibo di acusacionnan di planea pa destabilisa Venezuela.

Mora a bisa cu su casa a migra despues cu e compania di mina di carbon cu e tabata traha p’e pa hopi tempo a baha su salario na mitar y nan tienda di cuminda riba caya a cera na 2023. Uzcátegui a bandona Lobatera na maart 2024 cu e promesa di un conoci pa yud’e haya un trabou di construccion na Orlando.

Riba su caminda pa e pais Norte Americano, Uzcátegui a crusa e Darien Gap cu ta separa Colombia y Panama, y pa mey april el a yega Mexico City. Eynan, el a traha na un stand di cuminda di lama di un mercado publico te cuminsamento di december, ora cu finalmente el a haya un cita a traves di un app di smartphone di gobierno di Merca pa busca asilo na un crusamento di frontera.

Pero Uzcátegui nunca no a cana liber na Merca, caminda autoridadnan a considera su tatuahenan como sospechoso, Mora a bisa. El a ser manda pa un centro di detencion na Texas te ora cu e y otro Venezolanonan a ser poni den e avionnan cu a baha na El Salvador. Ainda, el a bisa cu e no ta lamenta di a sostene e decision di su casa pa migra.

“Ta e situacion di e pais cu ta forsa un hende pa tuma e decisionnan aki,” el a bisa. “Si e condicionnan (economico) aki tabata faborabel…lo no tabata necesario pa e bay pa por a drecha e cas of pa duna mi yiu muher un mihor educacion.”