Recientemente, Oficina Central di Estadistica (CBS) a publica e CPI pa e periodo September 2025 – September 2026. Den e ultimo diesdos (12) luna, e CPI a subi cu 3.0%. Nuebe (9) di e diesdos (12) sector a registra aumento di prijs. Entre e sectornan cu a registra mas aumento, tabata Transporte, Cuminda y Comunicacion.

E aumentonan cu tabatin e mayor impacto riba e CPI a wordo registra pa e sectornan di “Transporte” (11.1%), “Restante bienes y servicio” (4.4%), “Cuminda y bebida no-alcoholico” (3.5%), “Comunicacion” (2.9%) y “Restaurant y hotel” (3.4%), causando un efecto di respectivamente, 1.43, 0.52, 0.42, 0.25 y 0.18 ppt. E aumentonan den e sectornan restante a contribui hunto cu 0.40 ppt na e CPI durante e periodo september 2025 te cu september

2026.

E aumentonan menciona anteriormente a wordo contraresta parcialmente door di principalmente un caida di 2.3% den e indice di e sector di “Mobilario”, causando un efecto di -0.19 ppt na e CPI durante e periodo september 2025 te cu september 2026. E caida den e sector restante a contribui cu -0.04 ppt na e CPI durante e periodo september 2025 te cu september 2026.

E aumento den e sector di “Transporte” a wordo causa principalmente door di un aumento di 17.2% den e categoria “Gasto relaciona cu uso di vehiculo di transporte personal”, cu a contribui cu 1.37 ppt. E aumento den e sector di “Restante bienes y servicio” a wordo causa principalmente door di aumentonan di 6.4% y 19.6% den e categorianan “Cuido personal” y “Otro articulonan personal”, cu a contribui cu respectivamente 0.26 y 0.25 ppt na e CPI. E aumento den e sector di “Cuminda y bebida no alcoholico” a wordo causa principalmente door di un aumento di 3.4% den e categoria “Cuminda”, cu a contribui cu 0.35 ppt na e CPI.

E aumento den e sector di “Comunicacion” a wordo causa door di un aumento di 45.6% den e categoria “Ekipo di telefon y fax”, cu a contribui cu 0.25 ppt na e CPI. E aumento den e sector di “Restaurant y hotel” a wordo causa principalmente door di un aumento di 2.8% den e categoria “Cuminda pafo di cas”, cu a contribui cu 0.14 ppt na e CPI.

E caida den e sector di “Mobilario” a wordo causa principalmente door di caida di 8.2% den e categoria “Aparato pa uso domestico”, cu a contribui cu -0.17 ppt na e CPI. Canasta di consumo Durante e ultimo 12 luna, 56.4% di e productonan den e canasta di consumo a registra un aumento di prijs, contribuyendo cu 3.96 ppt na e CPI, mientras cu 31.1% a registra un caida di prijs, contribuyendo cu -1.00 ppt. E restante 12.5% no a registra cambio di prijs. E indicenan di “Bienes” (4.1%) y “Servicionan” (1.3%) a registra subidanan, causando un efecto di respectivamente, 2.40 y 0.57 ppt riba e CPI.

Bestaansminimum

Den e ultimo diesdos (12) luna, e bestaansminimum pa un hogar consistiendo di dos (2) adulto y dos (2) mucha (edad 0-14) a registra un aumento di Afl. 148, di Afl. 5,521 na september 2025 pa Afl. 5,669 na september 2026. E aumento aki a wordo causa principalmente door di aumentonan den e sectornan “Cuminda y bebida no alcoholico” (Afl. 81) y “Transporte” (Afl. 36).

Cambio di prijs di petroleo, utilidad, gasolin y diesel

E prijs promedio pa bari di petroleo a aumenta cu US$ 32.85 (51.3%), di US$ 63.98 na september 2025 pa US$ 96.84 na september 2026.

E indice di energia a aumenta cu 8.4% durante e ultimo 12 luna y a contribui cu 1.35 ppt na e CPI. E indicenan di “Gasolin” (27.5%) y “Diesel” (57.8%) tambe a aumenta durante e ultimo aña, contribuyendo respectivamente cu 1.18 y 0.17 ppt na e CPI anual. E indicenan di “Electricidad” y “Awa” no a registra cambio y pa e motibo aki no tabatin efecto riba e CPI durante e periodo aki. E restante 404 bienes y servicionan, como grupo, a aumenta cu 1.9% y a contribui cu 1.61 ppt na e CPI.

Cambio di prijs di Cuminda y servicio di catering

Den e ultimo diesdos (12) luna, e indice di “Cuminda & servicio di catering” a aumenta cu 3.3%. E indice di “Cuminda na cas” a aumenta cu 3.5%, unda nuebe (9) di e diesun (11) gruponan di “Cuminda na cas” a registra aumentonan di prijs durante e periodo aki.

E indice di “Fruta” a aumenta cu 8.5%, e aumento mas grandi entre e gruponan di “Cuminda na cas”. Otro aumentonan notabel a wordo registra den e indicenan di “Sucu, jam y otro tipo di cos dushi” (7.0%), “”Carni“ (5.4%), “Bebida no-alcoholico” (4.4%), “Berdura” (4.3%) y “Restante productonan pa alimentacion” (3.9%). E caida mas grandi durante e periodo aki a wordo registra den e indice di “Lechi, keshi y webo” (-1.6%). E indice di “Cuminda pafo di cas” a registra un aumento di 2.8% den e ultimo diesdos (12) lunanan. Den e ultimo diesdos (12) lunanan, “Cuminda na cas” y “Cuminda pafo di cas”, como grupo, a aumenta den prijs cu 3.3% y a contribui cu 0.56 ppt na e CPI. E restante bienes y servicionan, como grupo, a aumenta den prijs cu 2.9%, contribuyendo cu 2.41 ppt na e CPI anual.