Mangel Halto: Un otro tesoro local perdi pa turismo?

E aña aki a mira varios noticia surgi tocante e problema creciente di palapanan instala na canto di lama, cual ta keda invoca rabia den pueblo pasobra ta parce cu desaroyonan cu ta tumando luga den nos zonanan di recreacion ta principalmente beneficioso pa turismo y no ta considera e implicacion pa comunidad local of nos naturalesa. E siman aki a mira un otro situacion na Mangel Halto, unda a bora buraco den e calichi pa por instala palapa. Esaki a sucede riba henter e strip di Mangel Halto.

Tabata riba un diamars mainta cu activista conoci Nigel Maduro a bati alarma riba red social mustrando trabao di construccion na Mangel Halto. Den videonan graba cu el a publica riba Facebook, por a mira cu a bora varios buraco den tera y a instala palapanan nobo. Un ola di reaccion a surgi den cual varios usuario a expresa nan frustracion y notablemente un cansancio pa e tipo di actividadnan aki.

Varios usuario a expresa cu nan ta cansa di semper mira e mesun sucedido riba nos isla, bisando cu no tin mas consideracion pa nada otro cu no ta placa. Manera un usuario a bisa bao di e publicacion, “Tur cos pa placa! Falta bin e beach guys nn cu ta proteha e parasol nn pa placa cu turista, mescos na palm beach dilanti hotels nn. Aynoh ohm move nn di mi bario.” Un otro a comenta algo similar: “Aino den [explicito] mes .. arubiano nan ta caba cu nan cas y tera .. of ta bobedad of ta pa placa so. pero tur dos ami ta yama e cos aki bestialidad.”

Ademas a nota e riesgo riba seguridad, debi na e sitio unda a coba buraco. Mangel Halto no ta un playa regular, mirando cu e ta rondona parcialmente pa calichi. E suelo di calichi aki ta fragil y construccion continuo riba dje por crea un situacion peligroso pa bishitantenan di e playa, por ehempel si e bira demasiado zwak y kibra cay. Esaki a sucede caba na Mangel Halto, y por mira mas pariba di e entrada e resto di un pida cu a kibra for di e costa y cay den lama. Tambe a nota cu boramento por ta peligroso pa casnan den cercania, unda e kiebre den tera por scheur e casnan pega cu e playa.

Hopi a lamenta e desaroyo recien, relatando nan conexion cu Mangel Halto y kico e lama aki tabata nifica pa nan den nan infancia. Un usuario a conta: “Mi tabata gusta biba algun kas abou di Mangel Halto den añanan 1990’s ora e turistanan no tabata sa nada di dje. Mi lo ta kibra di kurason di ta bibando einan awor. NO MAS!!!!” Otro ta expresa nan tristesa, bisando cu Mangel Halto tabata su prome beach di su infancia.

E tipo di comentarionan aki ta forma parti di un sentido amplio den comunidad Arubano cu nos ta perdiendo nos facilidadnan publico pa asina beneficia e industria di turismo.

Na comienso di aña, Aruba a conoce e caso viral na Basiruti, unda un publicacion riba red social a mustra un cantidad di parasol instala riba costa di Palm Beach. E situacion aki a causa un disgusto entre local y turistanan, y rapidamente a resulta den manifestacion durante varios siman bao e palo di kwihi situa den cercania di e parasolnan.

Baby Beach tambe ta un sitio cu pa añas ta un caso preocupante pa localnan. E siman aki e situacion di sobrepoblacion riba Baby Beach a drenta den wowo publico atrobe ora un usuario riba Facebook a publica un potret di e area. Den e potretnan por a mira e rij di tentnan grandi situa net na canto di lama y e cantidad di turista cu ta ocupa e playa. Awo cu e apertura di e hotel Secrets, hopi ta preocupa cu esaki lo aumenta e presion riba Baby Beach, Roger’s Beach y kisas Bachelor’s Beach, situa mas pariba, banda di e santana di cacho, unda sa mira turtuga landa.

Mangel Halto ya tin varios aña cu ta cayendo den man di turismo tambe. Awendia casi mita di e casnan situa dilanti e playa ta vacation rentals. E sitio tambe a bira popular pa actividadnan di tour, manera kayaking, deep diving y snorkeling. Casi tur dia por mira vehiculonan staciona unda turistanan ta bisti pak di buceamento, of pickupnan cu tin carosa di kayak patras di nan. Un usuario riba Facebook a comenta: “Awor cu a caba cu Baby Beach, Mangel Halto ta na turno.”

Un patronchi similar a sucede tambe na Savaneta durante e ultimo añanan. Na comienso di aña, Bon Dia Aruba a reporta riba e fenomeno di privatisacion di playanan riba costa di Savaneta, particularmente den areanan unda tin casnan di vacation rentals. E tempo ey a nota cu e propiedadnan aki tin e tendencia di cera e caminda pa yega na e playa, cual ta conoci di ta un acto ilegal.

E desaroyonan aki ta subraya e perdida creciente di nos tesoronan. Tambe e ta laga hende cuestiona kico mas lo keda perdi den memoria pa por complace cu e demanda di e sector turistico. Den e ultimo decadas, ciudadanonan ta expresando cada bes nan disgusto pa con ta promove turismo y turistanan cu ta beneficia di loke Pueblo ta perde. Fuera di e consecuencianan riba nos naturalesa, e impacto di e desaroyonan aki riba e comunidad local por ta grandi, kibrando confiansa pa gobernantenan cu tin e deber di protege e interes di Pueblo, kitando nos facilidadnan publico cu ta hunga un rol importante den nurtura nos comunidadnan, y alimentando un percepcion negativo pa Turismo, e pilar economico mas grandi di Aruba.