(AP)—Charlie, un labrador geel di 10 aña, stima surf asina tanto cu e ta core bay den awa cu su tabla su mes si bo no ta pone tino. Su doñonan tin cu saca su tabla pa scond’e si nan kier papia un rato cu amigonan riba playa.
Charlie a uni cu mas o menos 15 te 20 otro cacho surfista diasabra den Pacifica — 22 kilometer sur di San Francisco — durante e Campeonato Mundial di Surf pa Cachonan, un competencia anual cu ta atrae miles di bishitante na e Playa Estatal di Pacifica.
E cachonan a competi contra otro di mesun tamaño pa un oportunidad pa pasa na e final. Tambe tin rondanan cu varios cacho riba un tabla of cu hende riba un mesun tabla.
Labradornan, terriér y spanielnan cu vestnan di seguridad personalisa ta remando riba awa pa drenta e olanan di e Ocean Pacifico. Doñonan ta yuda nan subi riba tabla di tur color, y e multitud riba playa ta grita di alegria mientras e cachonan ta “hang ten” riba e olanan.
Huesnan ta evalua:
- Cuanto tempo e cacho ta keda riba su tabla
- Con bon e ta mantene balansa
- Si e ta haci truco, manera bira en medio di un ola
Iza, un bulldog Frances di 5 aña, a gana e ronda di surfista solo pa cachonan di tamaño medio pa prome biaha e aña aki, segun su doño David Fasoli.
Fasoli a haya ” puro felicidad ” durante e pandemia ora el a hiba un tabla di surf cas for di su trabao na Costco y a siña Iza balansa den piscina. Poco despues, nan a cuminsa landa den lama y siña surf mientras bishitantenan riba playa tabata mira nan cu boca habri. Awor, nan competencia ta tocante supera expectativa.
“Mi tin un incapacidad — mi tin un man — pues un persona sin habilidad deportivo cu un cacho cu tampoco ta un rasa deportivo, nos ta fenomenal,” Fasoli a bisa despues di e competencia. “Nos ta superando e expectativa di loke hende ta kere nos por haci.”
Charlie y “The Dream Team”
Charlie, ken tin su pagina di Instagram, a competi den e ronda pa cacho surfista solo extra grandi. El tambe a surf hunto cu dos otro cacho, den un combinacion cu nan doñonan ta yama: “The Dream Team.”
“E ta stima e multitud,” segun su doño Maria Nieboer. Maria su casa, Jeff Nieboer, ta prepara Charlie pa ola. Ora Jeff mira un bon ola, e ta bira e tabla y grita: “Prepara bo mes!”
E ta pusha e tabla dilanti y Charlie ta inclina su curpa pa keda riba e ola lo mas largo cu e por. Charlie hasta por dirigi e tabla pa medio di inclina su curpa, y surf stret pa Maria cu ta wardando na canto. “E no mester ni haya snack despues,” Jeff a bisa. “Charlie ta haci loke Charlie mes kier ora nos ta den awa.”
Esnan cu gana a haya medayanan y derecho pa gaba cu orguyo.
Compañeronan di Charlie den “Dream Team,” incluyendo e otro labrador geel Rosie, a competi den cuater ronda. Su doño, Steve Drottar, a bisa cu e ta “super emociona” despues cu nan a bay surf — algo cu nan ta haci cuater of cinco biaha pa siman na cas na Santa Cruz.
E sa cu Rosie ta sinti orguyo despues, pasobra e ta mas feliz cu normal. Su rabo ta yanga mas lihe y e ta bira mas lief. “Ta manera nos sinta riba sofa, y e ta mira bo manera pa bisa: ‘Masha danki,’” Drottar a bisa.
