(AP) — Gobierno di Libanon a pidi su ehercito nacional diamars pa prepara un plan pa solamente institucionnan estatal tin arma den e pais chikito prome cu fin di e aña, un paso cu ta enfoca riba desarma e grupo militante Hezbollah.
E anuncio a bin for di prome minister Nawaf Salam despues di un reunion di gabinete cu a dura casi seis ora, y a sigui poco despues cu lider di Hezbollah a bisa cu su grupo no ta bay desarma y a adverti cu e fraccion apoya pa Iran lo reanuda su atake di misil riba Israel si e operacionnan militar contra nan intensifica.
Salam a bisa cu e gobierno a pidi e ehercito pa tin e plan cla prome cu fin di e luna, pa e por ser discuti y aproba.
E paso aki di gobierno a yega den un momento unda Beirut ta bao presion for di Merca pa desarma e grupo cu recientemente a bringa un guera di 14 luna cu Israel y a sali gravemente debilita, cu hopi di su lider politico y militar morto.
E decision a sigui un bishita di e enviado Mericano Tom Barrack na juli, ken a pidi un politica mas deciso pa desarma e grupo apoya pa Iran.
Diamars atardi, lider di Hezbollah Naim Kassem a rechasa apelacionnan pa entrega arma, mientras cu gobierno tabata tene reunion pa discuti e desarmamento di e grupo.
Desde cu e guera entre Israel y Hezbollah a caba na november cu un alto al fuego media pa Merca, oficialnan di Hezbollah a bisa cu nan no lo discuti desarmamento te ora cu Israel retira di cinco seronan cu e ta controla den Libanon y para cu su atake aereo casi diario cu a mata of herida centenares persona, mayormente di cual ta miembronan di Hezbollah.
Israel a acusa Hezbollah di purba reconstrui su capacidad militar. Ehercito di Israel a bisa cu e cinco sitio den Libanon ta duna nan un bentaha strategico of ta localisa dilanti di comunidadnan den norte di Israel, unda mas o menos 60.000 Israeli a ser evacua durante e guera.
Desde cu e alto al fuego a tuma efecto, Hezbollah a tuma responsabilidad pa un solo atake den un area disputa riba frontera.
Den un discurso televisa diamars, Kassem a bisa cu Hezbollah ta rechasa cualkier calendario pa entrega di arma. “Interes di Israel no ta pa amplia e agresion, pasobra si nan amplia, resistencia lo defende, ehercito lo defende y pueblo tambe lo defende,” Kassem a bisa. “E defensa ey lo trece misilnan cayendo riba Israel.”
Desde cu e guera a caba, Hezbollah a retira mayoria di su combatidornan y arma for di e area riba frontera cu Israel na banda sur di e riu Litani.
Siman pasa, presidente di Libanon Joseph Aoun a ripiti su apelacion pa Hezbollah entrega su armanan, algo cu a indigna e liderato di e grupo.
E acuerdo di alto al fuego no a clarifica con e armamento y instalacionnan militar di Hezbollah banda norte di e riu Litani mester ser trata, sino a bisa solamente cu autoridadnan Libanes mester desmantela facilidadnan no autorisa, cuminsando cu e area banda sur di e riu.
Hezbollah ta mantene cu e acuerdo ta cubri solamente e area sur di e riu Litani, mientras Israel y Merca ta insisti cu e acuerdo ta manda desarmamento di e grupo den henter Libanon.
Kassem a bisa cu Hezbollah ta rechasa un voto di gobierno riba su armanan, afirmando cu tal decision mester haya apoyo unanime di tur Libanes. “Ningun hende por kita e forsa di Libanon pa defende su soberania,” Kassem a bisa.
Armanan di Hezbollah ta un punto di division den Libanon, unda algun grupo ta pidi pa nan ser desarma.
Prome cu e reunion di gabinete a caba, dos minister alia cu Hezbollah a sali for di sesion, aparentemente pa mustra nan oposicion na e decision.
E guera entre Israel y Hezbollah a cuminsa un dia despues cu e atake di Hamas riba Israel for di Gaza dia 7 di october 2023. E conflicto a causa mas cu 4.000 morto y daño cu ta balora na $11 biyon.
