E siman aki, UNHCR, e agencia di Nacionnan Uni pa Refugiado, a anuncia cu ta bay stop su operacion na Aruba for di dia 31 di augustus proximo. E oficina na Aruba ta entre otro oficinanan den region Caribe cu ta cerando nan porta pa motibo di e situacion financiero precario di e organisacion.

Durante un mision recien na Aruba, representante di UNHCR pa Belize, Cuba, Nicaragua, Panama y Caribe Central y Sur a reuni cu funcionarionan di gobierno, refugiado, organisacionnan di sociedad civil y partnernan clave strategico, incluyendo Fundacion Contra Violencia Relacional, Sociedad di Venezuela, y Fundacion Arubano Centro di Desaroyo. E bishita aki tabata pa fortalece esfuersonan di defensa y explora strategia pa mehora proteccion pa hendenan cu ta desplasa forsosamente.

“Aunke nos ta cerando nos oficina di pais na Aruba, nos solidaridad cu personanan desplasa y nan famianan ta keda fuerte,” Egas a bisa den un comunicado di prensa. “Nos lo sigui traha estrechamente cu partnernan y Gobierno, sosteniendo acceso na servicio esencial y solucionnan a largo plaso.”

Siman pasa, durante un bishita na Gobernador Interino di Aruba, Su Excelencia Agustin Vrolijk, Sr. Jose Egas a combersa riba e topico di desaroyonan geopolitico y e impacto cu esaki ta trece cune, entre otro, pa e crisis di refugiadonan den region y na Aruba.

Segun un post riba rednan social di Gobernador di Aruba, e rol y significado di UNHCR pa cu e tema aki tambe a keda discuti durante e bishita.

Desde cu a establece su presencia na Aruba na 2018, UNHCR, den colaboracion estrecho cu Gobierno, sociedad civil, y partnernan di Nacionnan Uni, a sostene e sistema di asilo, servicionan di proteccion, entre otro asistencia huridico, a fortifica structuranan di comunidad, y a brinda asistencia directo na gruponan vulnerabel, entre otro hende muhe y mucha muher. Desde 2022, UNHCR y su partnernan a conseha mas cu 6.000 hende a traves di e iniciativanan aki, segun un comunicado di prensa.

Segun e comunicado, UNHCR ta keda comprometi pa sostene su partnernan NGO den duna servicio esencial na solicitante di asilo y refugiado. E agencia ta bay sigui boga pa y duna sosten na gobierno di Aruba den desaroya un sistema nacional di asilo cu ta alinea cu standard internacional y ta garantisa proteccion pa hende desplasa forsosamente. Como parti di e transicion aki, actividadnan di Aruba ta bay ta coordina bao e oficina multi-pais di UNHCR na Panama, cu dos miembro di personal operando ainda localmente na e pais.

UNCHR a haci un yamado pa financiamento sosteni y flexible pa cumpli cu necesidadnan humanitario creciente y sigura cu hende forsa pa huy no ta ser laga atras, e comunicado ta enfatisa.

Falta di fondo
 Ademas di su oficina na Aruba, UNHCR tambe a cera su oficina na Trinidad y Tobago dia 25 di juli ultimo, segun nan rednan social. Y no ta solamente UNHCR a stop su operacion na Aruba, sino otro agencia encarga cu migrante y refugiado, HIAS, tambe a cera su oficina. Por recorda cu maart ultimo, e agencia pa refugiado HIAS a informa cu “pa motibo di e decision di gobierno pa stop asistencia humanitario rond mundo, HIAS a haya su mes forsa pa stop operacion na Aruba.”
“Esaki no ta algo cu nos a anticipa of tabata kier, y nos ta reconoce e impacto profundo cu esaki ta bay tin riba e comunidadnan cu nos ta sirbi.” E tempo aya, HIAS a informa cu UNHCR lo tuma over como punto di contacto pa e refugiadonan na Aruba, pero awo UNHCR tambe ta cera su porta.

Manera menciona pa ambos organisacion, esaki ta un impacto directo di e decision di presidente Mericano, Donald Trump, pa suspende financiamento pa organisacionnan di ayudo mundialmente. Esaki tabatin impacto rond henter mundo, y tambe na Aruba.

Den su ultimo Fact Sheet, publica na juni ultimo, UNHCR a duna un bista di e cantidad enorme di deficit financiero cu tin pa cubri nan necesidadnan. Den esaki, a mustra cu tin apenas 17 porciento di su presupuesto cubri. Pa 2025, pa henter e region, e rekisito financiero pa UNHCR tabata $53.4 miyon, loke ta nifica cu nan tin un gap financiero di poco mas cu 44 miyon dollar. Pues ta logico cu no lo por mantene e mesun nivel di servicio na tur localidad cu un deficit financiero asina grandi.

Ademas, UNHCR a indica cu tin 24.863 Colombiano y Venezolano, incluyendo refugiado y solicitante di asilo, na Aruba y Corsou. Den e fact sheet, UNHCR a bisa cu Gabinete AVP-Futuro “ta dunando prioridad na reformanan di mercado laboral pa atende escasez di labor y mehora nivel di salario y condicionnan laboral. Como parti di e strategia aki, discusionnan ta andando pa regularisa trahadornan indocumenta cu ya ta contribuyendo na economia local,” referiendo na e flexibilisacion anuncia pa minister Arthur Dowers (AVP) e siman aki.