Segun parlamentario Otmar Oduber (PPA): Mester a cera frontera prome cu implementa flexibilisacion den maneho di admision

Recientemente Minister di Husticia, Integracion y Transporte Publico, Arthur Dowers (AVP), a anuncia e implementacion di un flexibilisacion den maneho di admision na Aruba, cu lo duna indocumentadonan oportunidad, si nan cumpli cu tur rekisito, pa ricibi nan permiso pa drenta e mercado laboral legalmente. Lider di fraccion PPA, parlamentario Otmar a reacciona riba e anuncio aki.

Manera ta conoci, recientemente minister Dowers a informa cu mirando e presion grandi y creciente cu tin den mercado laboral, Gobierno di Aruba a tuma pasonan pa yuda alivia e presion aki. Primeramente a elimina temporalmente loke ta conoci como e “arbeidsmarkttoets” y mirando cu esaki no a duna e alivio cu nan a spera, awor ta introduci un flexibilisacion den e maneho di admision.

E flexibilisacion aki ta pa personanan indocumenta cu a drenta Aruba prome cu dia 1 di juli 2025 via Aeropuerto Internacional di Aruba, cu a keda na e pais fuera di reglanan y cu tin un trabao of cu por yega na un trabao. Hende cu ta cumpli cu e rekisitonan aki, como tambe rekisitonan cu tur persona cu aplica pa un permiso normal di trabao mester cumpli cune, por yega na aplica pa un permiso di trabao.

Despues di e anuncio di minister Dowers, parlamentario Oduber a tene un conferencia di prensa den cual el a reacciona riba e anuncio di gobierno y a trece dilanti algun punto importante cu segun e, tabata esencial pa tuma decision riba nan prome cu a anuncia e flexibilisacion.

Desde cu Oduber a anuncia su regreso den mundo di politica, prome cu plataforma Pais y despues pa eleccion cu partido PPA, el a vocifera su sosten pa e idea di legalisa tur e personanan indocumenta cu ta traha na Aruba.

“Nos ta contento cu un biaha mas nos ta fungi como consehero di e gobierno actual y ta continua cu e diferente maneho cu nos a trece dilanti. Sinembargo, awe nos ta bisa cu no por mop vloer cu cranchi habri,” el a señala.

E parlamentario a splica cu fraccion PPA ta di opinion cu gobierno a keda cortico riba e maneho cu a ser anuncia, e flexibilisacion. Sinembargo e parlamentario a elogia e hecho cu gobierno a tuma e stap den direccion pa cuminsa formalisa y documenta esnan cu pa hopi aña caba ta na Aruba y ta den mercado laboral, pero cu no ta contribui na economia formal y contribucionnan social.

El a indica cu for di mas cu un aña pasa el a bisa, y cu gremionan sindical a sostene tambe, cu lo mas husto y corecto cu mester ser haci pa economia y forsa laboral di Aruba ta pa legalisa esnan cu ta indocumenta.

Parlamentario Oduber a splica cu un di e motibonan cu e ta sostene e idea aki ta pasobra ta calcula cu minimo entre 10 mil pa 12 mil hende indocumenta ta biba y ta traha na Aruba, tanto den economia formal como economia informal, y como pais Aruba ta perdiendo alrededor di 50 miyon florin pa aña.

Pa loke ta e maneho cu gobierno a anuncia, el a indica cu fraccion PPA a anticipa cu ta bay tin un maneho cu tin afspraaknan mas duidelijk cu mester tuma luga prome cu a introduci e maneho aki. El a remarca cu nan ta mira cu nada a ser anuncia pa loke ta afspraaknan specifico y sinembargo ta bisa cu tin tres fase cu mester atende cune prome cu bay over na duna e flexibilisacion general.

E prome y primordial cu el a menciona ta cu e no a scucha minister Dowers papia tocante ceramento di frontera. El a cuestiona con ta bay evita cu inmigrantenan ta sigui drenta Aruba di forma ilegal via boto.

E parlamentario a referi na e hecho cu siman pasa mes, un otro barco a drenta costa di Aruba cu indocumentadonan. Ademas e lider di fraccion PPA a mustra riba e hecho cu practicamente tur siman tin barconan cu indocumentadonan ta drenta Aruba.

“Nos no a scucha e minister papia pa prome cu bin cu e amnistia tuma un decision pa cera e frontera. Ta bisa cu e amnistia ta conta pa esnan cu a yega Aruba prome cu 1 di juli, pero mientras tanto, indocumentadonan ta sigui drenta”, el a indica, locual ta nifica cu toch mas persona indocumenta ta keda drenta e forsa laboral y ta traha sin contribui completamente na pais Aruba.

El a splica cu PPA a presenta un amienda, cual ta señala otro fayo den e flexibilisacion anuncia pa gobierno, den cual e fraccion ta indica cu un persona indocumenta tin e obligacion di paga pa tabata ilegal, y asina gobierno por crea un fondo adicional for di e grupo aki pa por inverti den drones na frontera, inverti den ekipo y personal cu el a indica no tin na e momentonan aki tanto den KPA y Warda nos Costa.

Ademas e parlamentario a menciona cu Douane tambe a laga sa mediante nan sindicato cu tin practicamente cinco aña cu nan no ta eherce e trabao di controla frontera. “Pregunta na minister ta, ken ta controla nos frontera? Prome cu anuncia e paso aki mester a percura pa cera e frontera y inverti den drones y personal pa controla e fronteranan,” el a subraya.

Oduber ta señala tambe cu e maneho nobo den admision tampoco ta indica kico ta bay bira e condicionnan pa e personanan cu mester haya permiso den futuro. El a menciona cu e hendenan cu ta bay ser legalisa aworaki na Aruba, fraccion PPA ta di acuerdo cune, pero el a agrega cu tin un cantidad di cuponan di trabao cu ta bay pa hendenan cu tin cu bin di afo.

“Maneho di e gobierno aki ta ad hoc, no a percura pa cera frontera, no tin un maneho pa loke ta trata e nobonan cu tin cu bin, y tampoco ta anuncia kico e condicionnan mara na e flexibilisacion ta,” el a enfatisa.