“Artificial General Intelligence” (AGI) ta e terminologia pa ora AI (inteligencia artificial), por tur trabao intelectual humano, miho cu un ser humano. Si nos yega e punto aki den futuro, y pa colmo futuro cercano, esaki obviamente lo tin impacto radical pa henter sociedad. Pero e ora e cuestion ta bin: Con nos por ta asina sigur cu AGI lo yega? Y segundo pa ki aña nos lo por spera AGI?

Inversion Multi-Biyonario den Computing

No ta ningun secreto cu companianan rond mundo ta invertiendo cantidadnan multi-biyonario pa cu e construccion di datacenters nobo. Segun banco di inversion BlackRock, esaki ta den sumanan di 400 pa 600 biyon dollar Mericano pa aña te cu 2030. E compania META (miho conoci pa su app Facebook), te hasta a anuncia un binidero construccion di un datacenter cu lo ta mas grandi cu e isla di Manhattan, New York.

Na e momento aki, AI ya caba a yega nivelnan superhumano den diferente tipo di testnan di inteligencia, esta visual, comprension di lectura, pregunta cientifico nivel PhD, y matematica. Impresionante manera esaki ta (caba), e revolucion berdadero ta den e ramo di ‘coderen’.

AI cu por skirbi su mesun Code

Na e momento aki, e base fundamental di un AI ta den su code. Mas miho e code di un AI ta, mas miho e lo funciona den practica. Antes e skirbimento di code ta algo cu ser humano mes mester a haci, como resultado cu e progreso di sistemanan di AI nobo ta wordo dicta pa con lihe sernan humano por skirbi code cualitativo.

Pero nos ta yegando un punto unda ya caba AI full autonomo por skirbi y adapta su mesun bron-code. Un reportahe di CNBC a indica cu por ehempel banco di inversion Goldman Sachs, a cuminsa experimenta cu AI di codeer completamente autonomo.

Kico nos por spera den e añanan binidero?

Segun un analisis di BlackRock, AI den averahe ta na un nivel di studiante universitario pa cu dia di awe. Dentro di 5 aña, segun e banco di inversion aki, AI lo yega e nivel di PhD y rond e añanan 2035 nos por spera AI cu por funciona riba e nivel di ganador di premio Nobel.

Awo obviamente si nos yega e punto di “AGI” pa mas o menos 2035, esta AI cu por funciona riba nivel di un ganador di premio Nobel, e impacto di esaki pa sociedad y te hasta henter nos civilisacion lo ta bay ta inmenso.

Den un analisis di The Economist a nota cu esaki lo por trece crecemento economico y beneficionan pa sociedad cu lo gigantesco mes. Pensa di descubrimentonan nobo cientifico, manera e cura pa cancer, energia renovable, transporte automatisa, produccion di bienes y servicio completamente automatisa y mucho mas. Esaki ta e aspectonan positivo.

Naturalmente un cambio drastico asina tambe lo bin cu varios aspecto cu anos como sociedad humano mester deal cune urgentemente. Esun mas grandi ta un tema cu mi a toca den varios di mi analisisnan cual ta e redistribucion di Capital & Entrada Universal. AI y specialmente AGI tin e potencia di automatisa cantidadnan grandi di labor humano, esaki lo haci capitalhouders inmensamente rico y poderoso. Dus siguramente mester tuma nota y mitiga e consecuencianan negativo di esaki.

Pero mi persona tin hopi speransa cu capacidadnan di AI y AGI binidero lo wordo usa pa beneficio di humanidad den su totalidad. Un ehempel di esaki ta bin di siglo 20. Na aña 1945 a inventa e atoombom y te hasta a usa esaki den Segundo Guera Mundial. Durante e añanan cu a sigui ambos Estados Unidos di Merca y Union Sovietico, tabatin suficiente arma nuclear pa destrui mundo henter. Pero nos como Humanidad a kies pa e ruta pacifico y na aña 1987 President Ronal Reagan di Merca y Mikhail Gorbachev di USSR a firma un acuerdo pa minimalisa e arsenal di armanan nuclear.

Dus como ehempel, ya caba pa mas o menos 70 aña, Humanidad tabata por a destrui su mes cu arma nuclear, y esaki no a tuma lugar. Pues mi speransa ta cu Humanidad, lo por usa su sabiduria pa trece prosperidad inmenso pa sociedad cu AGI lo por trece, wel minimalisando tur e aspectonan negativo.