Algun dia atras, Banco Central di Aruba (CBA) a publica su Monthly Tables pa luna di juni 2025. Den esaki, a dedica espacio na entrada di gobierno y e posicion di gobierno dentro di sistema monetario.

Na juni 2025, entrada total di gobierno di Aruba a alcansa Afl. 200.7 miyon, reflehando un caida luna-riba-luna, for di mei, di Afl. 251.0 miyon, pero toch surpasando e Afl. 143.2 miyon di april. Compara cu e mesun luna na 2024, tempo cu entrada tabata Afl. 210.3 miyon, e prestacion di juni tabata un poco mas debil, indicando algun moderacion den momentum di colecta.

Entrada di impuesto tabata conta pa un gran parti di entrada total, na Afl. 181.5 miyon, representando alrededor di 90 porciento di tur entrada pa e luna. Esaki a marca un reduccion notable for di Afl. 244.7 miyon colecta na mei, pero a keda riba e Afl. 136.7 miyon di april. Dentro di e categoria di impuesto, inkomstenbelasting y winstbelasting a alcansa un total di Afl. 73.7 miyon, mas cu dobel e cifra di april, pero substancialmente bao di e suma excepcional di Afl. 144.4 miyon na mei, cu tabata reforsa pa winstbelasting fuerte. Colecta di impuesto riba salario, na Afl. 16.3 miyon, a keda stabiel compara cu e dos luna anterior, mientras contribucion di impuesto riba entrada a aumenta na Afl. 6.0 miyon, e cifra mas halto den e kwartaal. Entrada di winstbelasting, sinembargo, a reduci na Afl. 51.3 miyon for di e nivel inusualmente halto di mei, reflehando cu e entrada di mei tabata influencia pa pago periodico of anual di mpuesto.

Impuesto riba commodities a genera Afl. 32.6 miyon, mustrando fluctuacion menor durante e kwartaal. Accijns riba gasolin a genera Afl. 5.8 miyon, un tiki menos cu mei, mientras accijns riba tabaco y cerbes a keda stabiel na Afl. 1.3 miyon y Afl. 2.4 miyon, respectivamente. Accijns riba licor a baha modestamente na Afl. 2.6 miyon. Invoerrechten, un contribuidor significante, a produci Afl. 20.5 miyon, casi igualando e resultado di mei.

Impuesto riba propiedad a trece Afl.23.7 miyon den caha di gobierno, un aumento significante riba e Afl. 15.2 na mei. Colecta di grondbelasting a aumenta na Afl. 18.4 miyon, reflehando medidanan activo di evaluacion y aplicacion. Impuesto di vehiculo di motor a aumenta na Afl. 3.4 miyon, mas cu cuadruplicando e cifra di mei, pa motibo di timing den pago anual di e impuesto aki. Impuesto di transferencia, na Afl. 2.0 miyon, a baha levemente.

Impuesto riba servicio a contribui Afl. 10.3 miyon, un reduccion di e Afl. 12.2 miyon na mei y Afl. 15.2 miyon na april. Recibo di hotel room tax, na Afl. 6.5 miyon, a baha for di mei pero a keda riba nivel di april, alinea cu patronchinan di temporada di yegada di turista. Licencia di wega di placa a trece Afl. 2.2 miyon, stabiel compara cu lunanan anterior.

Colecta di omzetbelasting (BBO/BAVP) a keda robusto na Afl. 35.8 miyon, marginalmente riba e nivel di mei, indicando consumo domestico resiliente a pesar di señal di moderacion den otro linea di impuesto. Colecta di impuesto riba divisa tabata stabiel na Afl. 5.5 miyon, consistente cu e tendencia den lunanan recien.

Entrada cu no ta di impuesto a alcansa Afl. 19.1 miyon, significantemente mas halto cu april y mei, cu tabata Afl. 6.3 miyon y Afl. 6.5 miyon respectivamente. E aumento aki tabata impulsa en gran parti pa “otro entrada no di impuesto” cu ta inclui distribucion di dividend for di empresa propiedad di gobierno y otro variedad di fuente di entrada.

For di un bista mas amplio, entrada di gobierno pa e di dos kwartaal di 2025 a mustra volatilidad ocasiona pa efecto di timing den categorianan mayor di impuesto, particularmente winstbelasting y colecta relaciona cu propiedad. E aumento di entrada na mei ta parce di tabata en parti relaciona cu temporada, mientras e total mas abao di juni ta sugeri un regreso na e nivelnan mensual tipico.

Posicion di gobierno den Sistema Monetario

Pa fin di juni 2025, e posicion neto di pasivo di gobierno cu sistema monetario tabata Afl. -0.5 miyon, esencialmente balansa compara cu e Afl. 38.3 di mei y Afl. 131.5 miyon di april. E posicion casi neutral aki na juni a marca un cambio notable for di e swingnan grandi mira anteriormente den e kwartaal, indicando cu maneho di likides y timing di cashflow tabata alinea mas cercanamente cu obligacionnan.

Depositonan di gobierno cu autoridadnan monetario tabata un total di Afl. 140.9 miyon na juni, un aumento substancial for di Afl. 88.7 miyon na mei y Afl. 70.7 miyon na april. E aumento aki ta punta riba reserva mas fuerte di cash den Banco Central, posiblemente reflehando colecta mas halto di entrada cu no ta di impuesto, y gasto restringi laat den e luna.

Deposito cu banco comercial a tabata Afl. 116.2 miyon na juni, marginalmente riba e Afl. 113.9 miyon di mei. Combina, e deposito total di gobierno a alcansa Afl. 257.1 miyon, compara cu Afl. 202.6 miyon na mei y Afl. 182.4 miyon na april, mustrando un tendencia consistente di aumento.

Di banda di pasivo, obligacionnan di gobierno na sistema monetario tabata Afl. 259.9 miyon na juni, tiki mas halto cu e Afl. 257.7 miyon na mei. E gap minimo entre e deposito total y pasivonan ta splica e posicion neto casi cero pa juni.

E posicion di likides bruto di gobierno – defini como e suma di deposito liber y reserva – tabata Afl. 257.1 miyon, e nivel mas halto den di dos kwartaal. Deposito liber, cu ta mas facilmente disponible pa gasto operacional, a conta pa gran parti di e suma aki, cu aumento skerpi for di lunanan anterior.

Un cambio for di pasivo neto halto na april na un posicion balansa na juni ta refleha tanto mehoracion den fluho di entrada como posible deferencia den cierto compromiso di gasto. E aumento cuantioso di deposito ta sugeri cu gobierno a drenta juli 2025 cu un buffer mas fuerte di likides, potencialmente permitiendo mas flexibilidad den cumpli cu proximo ibligacionnan sin recuri inmediatamente na fia placa.

En conclusion, e Monthly Tables di Banco Central pa juni 2025 ta revela un panorama fiscal caracterisa pa volatilidad a corto plaso pero hancra den un posicion di likides mas resiliente. Mientras entrada di impuesto a baha na juni despues di un mei excepcional, impuesto stabiel basa riba consumo y un aumento den entrada cu no ta di impuesto a yuda sostene entrada general na un nivel respetable. E balans mehora di gobierno y posicion neto casi neutral cu sistema monetario ta indica maneho cuidadoso di cash flow, lagando esaki miho posiciona pa nabega resto di aña. Atencion continuo na diversificacion di entrada y timing di fluho mayor di impuesto ta bay ta clave pa mantene stabilidad fiscal den e lunanan nos dilanti.