(AP) – Corte Supremo di Corea di Sur a rechasa un demanda exigiendo compensacion di 21,600 dollar diahuebs di un compositor Mericano cu a acusa compania di contenido pa muchanan Coreano di Sur di plagiarismo pa cu su version di “Baby Shark,” cabando un bataya legal di 6 aña tocante e cantica popular na nivel global.
E corte aki a mantene e decision di cortenan di nivel mas abao cu ta data te 2021 y 2023, unda no a considera cu tin suficiente base pa conclui cu e compania, Pinkfong, a viola e derechonan di autor di Jonathan Wright.
Wright, conoci tambe cono Johnny Only, a lansa su version den 2011, 4 aña prome cu esun di Pinkfong, sinembargo ambos ta basa riba un melodia tradicional popular na campnan di mucha na Merca.
E corte a dicidi cu Wright su version no ta suficientemente diferente for di e melodia original pa cualifica como un obra creativo original cu por tin proteccion di derecho di autor, y cu Pinkfong su cantica tabatin diferencianan cla for di Wright su trabao.
Corte Supremo a bisa cu su decision ta reafirma e principio legal existente riba uso di canticanan folklorico como trabao di inspiracion of base. “Corte Supremo ta acepta e decision di corte di nivel mas abao unda e demandante su cantica no tabatin suficiente modificacion na e cantica folklorico usa den e caso na un extento cu esaki por ser considera, bao standard comun social, como un trabao separa,” el a bisa den un declaracion.
Pinkfong a bisa den un declaracion na The Associated Press cu e decision a confirma cu su version di “Baby Sark” ta basa riba un cantico “tradicional” cu tabata den dominio publico. E compania a bisa cu el a duna e cantica un version fresco pa medio di agrega “un ritmo alegre y un melodia pegahoso, convirtiendo esaki den e icono cu e ta awe.”
Chong Kyong-Sok,Wright su abogado Coreano di Sur a bisa cu e no a ricibi e version competo di e corte su decision ainda, pero cu e ta yama e resultado “un decepcion.”
“En fin, e problema aki a yega su fin,” el a bisa. “E ta nos trabao cu a sali prome, pues nos por trata e licencia di nos banda y pues cada un lo bay su caminda separa.”
Pinkfong su Baby Shark a bira un fenomeno global despues cu esaki a lansa riba YouTube den 2015, cu e video original di “Baby Shark Dance” surpasando 16 biyon bista y yegando e posicion number 32 riba Billboard Hot 100.
Baby Shark ta keda un producto crucial pa Pinkfong, cual a genera 32.6 miyon dollar den ganashi durante e prome mita di 2025, segun su documentonan regulatorio. E compania a converti e famia di 5 tribon – Baby Shark, Mama Shark, Papa Shark, Grandma Shark y Grandpa Shark – den programa di television, di Netflix, pelicula, aplicacion di smartphone y musical cu tour global.
