E siman aki, Secretario di Estado di Asuntonan Interno y Relacion di Reino, Eddie van Marum a realisa su prome bishita di trabao oficial na Aruba. Durante su bishita, e Secretario di Estado a reuni cu lidernan di fraccion di Parlamento di Aruba. Lider di fraccion PPA, Otmar Oduber ta elabora tocante con e reunion aki a bay y puntonan cu a trece dilanti.

Parlamentario Oduber a splica cu e reunion tabata mas bien un reunion general caminda cu e Secretario di Estado a bin conoce e isla y haci diferente bishita, por ehempel na RWZI, Dump di Parkietenbos, control di frontera, entre otro, cual ta temanan cu e parlamentario a remarca PPA ta apoya.

Pa loke ta trata e tema di Ley di Reino pa Supervision Financiero (Rijkswet) mes, Oduber a indica cu e ponencia di e Secretario di Estado tabata cla. A pesar cu e Secretario di Estado a indica cu e ta compronde e punto di e parlamentario, ya cu e mes tabata un parlamentario, e no por duna parlamento informacion pasobra ta gobierno ta esun cu mester duna e informacion ey na parlamento.

Oduber a splica cu un comentario e Secretario di Estado a duna, cu a resalta, ta cu el a bisa cu e ta haya straño cu gobierno no ta dunando informacion na parlamento, pasobra normalmente gobierno ta ehecuta e tarea, e instruccionnan cu e ta haya di su parlamento den e negociacion. Esaki no ta e caso pa Aruba.

“Net esey ta loke nos ta critica y loke no ta tumando lugar. Gobierno no ta scuchando parlamento, no ta scuchando gremionan, no ta scuchando niun hende. Gobierno ta negociando a traves di su ambtenaarnan pa despues bin bisa parlamento kico e ta. P’esey tur hende ta puntra kico e ta contene, pero niun hende sa, pasobra parlamento nunca a duna instruccion di kico e mester contene, ta gobierno ta haciendo di su banda. E situacion na Aruba ta contradictorio cu locual e Secretario di Estado ta bisa cu ta lo usual, y esey ta e punto cu nos ta bisando tambe. Kiermen el a duna nos rason den esey,” Oduber a enfatisa.

Parlamentario Oduber a sigui splica cu un otro punto cu no tabata duidelijk tampoco ta cu inicialmente, segun e acuerdo ta bisa, den e di tres kwartaal di e aña aki na october mester entrega e concepto di Rijkswet na Conseho di Minister di Reino. El a agrega cu gobierno a bisa esey tambe den e presentacion cu nan a duna riba nivel di ambtenaar den parlamento.

Parlamentario Oduber a puntra e Secretario di Estado si esey ta bay door, pasobra esey kiermen cu otro luna practicamente caba mester entrega e concepto aki di e Rijkswet, pero e Secretario di Estado a contesta cu e no por confirma of nenga e esey y a bisa cu esey ta topico di combersacion cu gobierno.

Pa loke ta trata proposicionnan di parti di parlamento of fraccionnan, Oduber a splica cu PPA, cu tabata e unico fraccion cu a bin cu proposicion, a bisa cu nan ta di acuerdo pa tin normanan financiero cu ta ser palabra entre paisnan, pero nan ta sinti cu den Aruba su propio leynan local por hinca e normanan aki pa por crea e garantia cu tur hende kier den Reino.

“Nos a posiciona en contra di esun cu ta riba mesa na e momentonan aki, cu a compronde for di nivel ambtenaar, ta cu nan kier crea un begrotingskamer pa conseha gobierno di Aruba y kier hacie gewoon via un landsverordening, gewoon como un departamento. Pero nos ta propone pa crea un begrotingskamer, pero hink’e den nos Constitucion,” el a enfatisa.

El a sigui splica cu Hulanda tin desconfiansa den caso cu scoge pa hinca e normanan den leynan local, pasobra asina, ora cu kier trece cambio riba e normanan aki por bay parlamento y cu un mayoria di 11 voto ta cambia e norma, locual no ta un siguransa pa Hulanda. Oduber a subraya cu fraccion PPA ta propone pa hinca e normanan den Constitucion, pa asina ora cu kier cambia e normanan, tin mester di dos tercera parti di henter parlamento, mester 15 miembro di parlamento pa por haci e cambionan, locual segun e parlamentario ta duna e siguransa cu no por djis yega cambia e normanan.

“Esey ta netamente henter e discusion. Nos ta bisa bo autonomia financiero ta cu abo ta dicidi, abo tine den bo man. Aworaki nos ta dicidi. Na momento cu hink’e den e Rijkswet cu nan kier, nan ta bisa bo cu ora bo kier cambia norma bo tin cu bay na Conseho di Minister di Reino. Ey ta caminda cu nan mester duna aprobacion. Nos ta bisa no, e ora bo a entrega bo autonomia. Nos ta bisa si esey ta bo preocupacion, cu bo tin miedo cu e ta ser cambia sin mas, anto e ora ban hink’e den Constitucion caminda pa por cambia norma den Constitucion tin mester di dos tercera parti di parlamento. Kiermen mester tin oposicion hunto cu bo,” el a finalisa.

E bishita di Secretario di Estado Van Marum ta den marco di un prome encuentro cu e islanan y su gobernantenan. Temanan importante durante e bishita di trabao ta seguridad di cuminda, reconstruccion na Sint Maarten, y desaroyo economico.

Despues di a pasa e prome dos dia na Sint Maarten, dia 12 di augustus Secretario di Estado Van Marum a yega Aruba, unda el a cuminsa su bishita cu un encuentro cu e trahadornan di e Representante di Hulanda na Oranjestad (VNO). Pa e parti formal di e bishita di trabao na Aruba, el bishita Gobernador, Su Excelencia Alfonso Boekhoudt.

Diaranson 13 di augustus e Secretario di Estado tabatin combersacion cu minister presidente Mike Eman, vice-prome minister y minister di Relacionnan di Reino, Gerlien Croes, y minister di Finanzas, Geoffrey Wever. Un di e prioridadnan di e Secretario di Estado, segun website di gobierno Hulandes, ta e tema di seguridad di cuminda. Pa esaki, gabinete Hulandes a pone 24 miyon euro disponible a traves di un fondo rotatorio cu ainda mester keda estableci.

Relaciona cu esaki, Secretario di Estado Van Marum a haci un bishita na AGRO Park. E iniciativa aki ta dirigi riba desaroyo agricola sostenible y seguridad di cuminda.

E Secretario di Estado a bishita diferente localidad riba e isla, entre otro, e tereno unda antes tabata e Refineria, parke nacional Arikok, y manera ya caba menciona dump di Parkietenbos, y e planta di procesamento di awa di riool, RWZI.