Setar NV lo percura pa conexion di internet di calidad halto pa Corsou y Boneiro; Acuerdo pa amplia kabel submarino ‘Celia’ formalisa den presencia di Secretario di Estado van Marum

Despues di a logra inverti den e kabel submarino Celia pa comunicacion directo cu Merca awor Setar NV ta cla pa amplia e proyecto di internet rapido pa Corsou y Boneiro. Ayera, durante un ceremonia na Representacion di Hulanda na Aruba, Director di Setar, Roland Croes a firma e acuerdo di colaboracion cu Saba Statia Cable System BV, SSCS pa instalacion di e kabel aki cu ta conecta e islanan Corsou, Boneiro y Aruba. SSCS, cu tin Estado di Hulanda como accionista, tabata representa pa Werner Haan.

E formalisacion di e acuerdo tabata den presencia di Secretario pa Asuntonan di Reino, Eddie van Marum, kende tabata riba su bishita di introduccion na Aruba. Ministernan Geoffrey Wever di Economia y Rene Herde di Comunicacion tambe tabata presente.

Van Marum a bisa cu e cooperacion entre Setar y SSCS ta un iniciativa innovativo di compania di telecomunicacion di Aruba pa instala e kabel submarino cu ta bay contribui grandemente na mehoracion di posibilidadnan economico pa y entre e tres islanan. Cu e paso aki ta sigura cu Boneiro (y Corsou) lo keda conecta na ‘Celia’ pa September 2027, cu lo percura pa internet di calidad y pagabel di forma cu e ta mehora e comunicacion digital. “Mi ta contento cu esaki, pasobra internet confiabel y pagabel ta esencial pa desaroyo economico. Esaki ta un di mi prioridadnan pa stimula empresarionan pa inverti y asina crea desaroyo.”

Minister pa Asuntonan Economico di Aruba Geoffrey Wever a mustra cu tabata na 2022 cu Setar a inicia e preparacion pa instala e kabel submarino ‘Celia’ pa comunica cu Merca, cu tabata un proyecto ambicioso y caro. E trabao a conclui cu e acuerdo entre Merca y Aruba pa e conexion aki. “E ta yena nos cu satisfaccion cu e kabel aki lo percura pa e islanan den Caribe Hulandes, cu Setar como e vehiculo, keda conecta cu Merca.” E Minister a bisa cu comunicacion y conexion digital ta un fundamento pa economia moderno.

Roland Croes a ilustra cu pa islanan no ta isola ta su puertonan, pero tambe e conexion digital cu resto di mundo. Segun Croes, conexion digital di calidad no solamente lo yuda economia, pero tambe e terenonan di educacion y salud. Pa Croes, e proyecto Celia ta un di e trabaonan mas importante di Setar, cu ya tin decadanan ta traha cu kabelnan submarino. Es mas, tin kabelnan instala caba cu ta conecta cu Puerto Rico por ehempel cu facilmente por extende pa yega St. Eustatius por ehempel. “Tin como 50 kilometer cu ta wardando pa conecta Isla Riba.” Ta papiando aki di un capacidad di 22 terabits pa seconde di informacion cu awor por keda transferi asina cu e conexionnan di kabel ta cla. Unabes cu inclui e tres islanan ariba riba e kabel, lo ta pa prome biaha cu tur seis isla di Reino Hulandes lo ta directamente conecta cu otro. “Tin un sin fin di posibilidad.”

Werner Haan di SSCS a bisa di ta aprecia e colaboracion cu Setar, sigur pa traha riba e ampliacion di ‘Celia’ pa Corsou y Boneiro. E trabaonan lo inicia otro siman, cu segun Haan lo no por tabata posibel sin e punto di salida visionario di Setar. “Boneiro y Corsou no por esaki nan so,” Haan a mustra.

Setar a inverti entre 40 pa 50 miyon den e proyecto Celia, cu sosten di Union Europeo cu a yuda cu fondonan. Hulanda mes lo contribui cu e gastonan. Aunke Croes no kier a menciona un cifra, el a bisa cu e sosten Europeo y esun Hulandes ta yega na como 20 porciento di e gastonan.