Ayera tardi riba su pagina di Facebook, minister di Deporte, Gerlien Croes (Futuro) a publica informacion tocante e suspension di presidente di raad di Stichting Sport Subsidie Aruba, pa motibo cu e ta sospechoso den un caso penal.
Informacion cu a circula den medionan local ta indica cu ta trata di caso Bromelia. Den e caso aki, OM ta investigando posible malversacion di fondo.
“Como minister encarga mi a wordo informa durante dia di ayera riba un investigacion penal tumando luga den Stichting Sport Subidie Aruba unda cu e Presidente di e Raad actual ta un sospechoso,” minister Gerlien Croes a publica riba Facebook. “E persona concerni ta alabes un trahador di sector publico di un departamento cu ta resorta bou di mi ministerio, consecuentemente, segun ley ta prescribi mi a emiti por escrito un suspension temporal di e persona aki su trabou, pendiente investigacion.”
Ministerio Publico mes ainda no a duna informacion di e caso, ni e sospechoso.
