Dialuna anochi Parlamento di Aruba a finalisa tratamento di presupuesto complementario, e prome cambio pa presupuesto nacional 2025. E presupuesto complementario a keda aproba cu 13 voto na fabor (AVP, FUTURO, PPA) y nuebe contra (MEP). Ayera mainta Gabinete AVP-FUTURO a tene un conferencia di prensa relaciona cu e tratamento di e presupuesto complementario y e aprobacion di esaki.

Prome minister Mike Eman a remarca cu despues di cinco luna Gabinete AVP-FUTURO a pone un stempel importante riba cambio di rumbo di pais. El a splica cu despues cu presupuesto nacional 2025 a ser entrega aña pasa pa un gabinete di asignatura diferente, e gabinete nobo a logra haci cambionan grandi dia 28 di maart y aworaki esaki tambe a sucede durante e tratamento di e presupuesto complementario.

El a indica cu e vision y sentimentonan di Gabinete AVP-FUTURO a resalta den e presupuesto aki pa medio di e cambionan cu a ser introduci pa loke ta trata dos tema cu continuamente nan a sinti tin un falta di atencion.

“Nos a mira hopi deterioro y a mira hopi falta di atencion y hopi abandono pa e tema di poder di compra di e ciudadanonan. Nos a mira durante e ultimo añanan un cantidad di sufrimento den nos pais, perdida di poder di compra, hopi pobresa den comunidad y falta di perspectiva pa esnan cu ta inverti, un perspectiva pa futuro y na mesun momento a mira un deterioro fisico rond di Aruba den centronan di ciudad, barionan, scolnan y nos ministernan cada un ta mirando esaki,” el a enfatisa.

E mandatario a indica cu na momento cu Gabinete AVP-FUTURO a sinta e mester a haci un cambio grandi den e direccion di pais aki pa dos tema fundamental y p’esey e presepuesto complementario, cual finalmente a ser aproba, ta di suma importancia.

El a splica cu durante e reunion di tratamento di presupuesto complementario y den e reunion di maart tocante presupuesto nacional a tuma decisionnan grandi pa loke ta trata poder di compra. El a menciona cu e aumento di e reparatietoeslag cu 250 florin ta un aumento importante pa e pensionadonan y awor gobierno ta preparando pa e siguiente fase pa yuda e pensionadonan.

Minister Eman a agrega cu a pone tambe den e presupuesto ey un fondo importante pa por a absorbe prijs di gasolin, pues un reduccion den accijns cu ta yuda cu cada biaha cu e prijs di gasolin y diesel subi riba mercado, gobierno ta absorbe un parti di esaki, cual tin su efecto directo pa e ciudadano, pero e tin su efecto tambe pa mengua inflacion.

El a splica cu e aumento di prijs di transporte, specificamente causa pa aumentonan di gasolin hopi biaha ta traduci su mes den inflacion den otro mercancianan cu ta ser transporta usando gasolin of diesel. P’esey e reduccion den accijns tabata un parti importante.

“Minister di Finanzas a traha diligentemente pa haci reduccion den costo pa por a haci inversionnan den poder di compra,” el a remarca.

El a indica cu tambe hunto cu minister Mervin Wyatt-Ras a haci inversionnan importante e aña aki den aumento di bijstand pa esnan di menos recurso. Ademas a subi e standard di bijstand di 450 florin pa 600 florin, nan a subi e schoolkindertoeslag di 250 florin pa 300 florin, a subi e ayudo pa schoolgeld di 120 florin pa 250 florin y a subi tambe e suma cu ta duna na inicio di un aña escolar pa muchanan cuminsa scol cu tur loke nan tin mester.

“Un enfoke hopi grandi riba poder di compra y riba inversion. Nos ta sumamente orguyoso di e presupuesto aki. Minister di Finanzas y Economia Geoffrey Wever a traha cu un diligencia special pa haci e dos momentonan aki posibel tanto na inicio di nos gobernacion como tambe pa loke ta trata e presupuesto complementario,” prome minister Eman a enfatisa.

Finalmente el a agrega cu durante tratamento complementario tabatin un mocion historico presenta pa parlamentario di fraccion AVP, Mike de Meza, na unda parlamento a vota pa tuma un decision clave pa loke ta e futuro di e area di refineria. Cu aprobacion di e mocion aki a dicidi cu ta bay haci un renobacion grandi den e area, ta bay desmantela locual tin y ta bay crea oportunidadnan pa desaroyo na San Nicolas.

Di su banda Minister di Finanzas, Asuntonan Economico y Sector Primario Geoffrey Wever a resalta cu e parti mas importante di e prome presupuesto complementario ta cu a aloca mas o menos 30 miyon florin na inversion completo den e pais pa proyectonan importante y necesario cu lo bay mehora infrastructura y diferente area di e pais.

“Mi ta kere ta importante pa subraya di un banda cu na momento cu Gabinete AVP-FUTURO a drenta dia 28 di maart a haci un cambio importante pa por a mehora poder di compra, pero tambe a anuncia cu ta bay aloca 30 miyon di inversion adicional y a haya aprobacion di parlamento pa proyectonan specifico y e proyectonan aki aworaki lo ser ehecuta door di cada minister,” el a indica.

El a splica cu bou di su ministerio tin varios proyecto, entre otro continuacion di revitalisacion di e area di Oranjestad, y den e sector primario tin fondonan aloca pa mehora e piernan pa apoya e sector primario cuminsando na San Nicolas, entre otro.

“Nos ta contento, nos ta orguyoso cu den e prome cinco luna nos por a haci e cambionan importante aki,” el a enfatisa.

Di su banda vice prome minister Gerlien Croes a remarca cu e aprobacion di e presupeusto complementario 2025 ta marca un etapa nobo pa Aruba cual ta refleha den e decisionnan cu e Gabinete AVP-FUTURO a tuma for di prome dia cu a inicia como gabinete, pero mas ora cu a haci e cambionan y a haya e aprobacion necesario cu ta refleha en realidad e metanan cu e gabinete tin.

“Locual cu ta di pueblo mester bay back pa pueblo y esey ta locual nos na e momento aki ta pone como prioridad,” el a subraya.

El a indica cu pronto lo ta tratando presupuesto 2026 y a remarca cu un bes mas lo tin un cantidad di inversionnan nobo cu ta bay ser agrega na e lista aki .

“Pa mucho hopi tempo e pueblo aki a keda poni un banda ya awor aki nos prioridad ta pa duna back na comunidad y esaki ya a cuminsa sucede. Cu nos tin hopi reto tur caminda, si, pero esaki ta parti di e trabou y no por soluciona tur cos di un dia pa otro. Aworaki prioridad ta pa sali ehecuta locual a ser aproba oficialmente pa Parlamento di Aruba,” el a enfatisa.