Declaracion di Gerlien Croes y Gobierno riba rijkswet HOFA no ta cuadra cu realidad. No a y no ta existi ningun “acuerdo final” cu Hulanda pa implementa un rijkswet door di Gobierno di Evelyn Wever-Croes.
Loke a wordo firma den juni 2024 ta un bestuurlijk akkoord, un acuerdo politico cu no tin ningun obligacion pa yega na un rijkswet. Ta solamente e intencion pa negocia.
Gerlien Croes (Futuro) su postura arogante, accionnan manipulador y falta di bisa cu ta e kier e rijkswet ta pone pueblo pensa. Si E rijkswet ta bon pa Aruba, dicon Gerlien Croes no ta bisa cu e a logra esaki?
Awor a caso nan lo bay bisa tambe cu ta Evelyn Wever-Croes a keda sin informa Parlamento y entrega esaki na Hulanda riba 13 di augustus 2025?
E bestuurlijk akkoord ta papia palabra cla, e ta brinda e cuadro pa discuti y negocia cu Hulanda. E no ta mara Aruba na nada. Y sigur e no ta duna Gerlien Croes e autoridad pa entrega un concepto di ley na Hulanda sin informa Parlamento.
Nos tur merece transparencia y no propaganda politico di Gerlien Croes. Nos firma ta nos voz y nos accion concreto contra e rijkswet. Aruba merece politiconan serio cu ta asumi nan responsabilidad y no politiconan cu tenchi largo.
Nota di redaccion: E articulo aki ta opinion di e autor y no ta representa opinion di Bon Dia Aruba.
