(LaPatilla) – E prome vice-presidente di Partido Socialista Uni di Venezuela (Psuv), Diosdado Cabello, a responde ayera diaranson durante su programa Con el Mazo Dando, na ey informacion reciente di un posible atake militar di precision di Merca na teritorio Venezolano, contra structuranan vincula na e Cartel de los Soles.
Cabello a sigura cu e supuesto operacion no tin relacion cu e lucha anti-droga, sino cu un plan di “cambio di regimen” na Venezuela.
“Nos sa cu esey no tin nada di haci cu droga. Nan kier sali di e Revolucion Bolivariano, esey ta loke ami ta yama un cambio di regimen,” el a expresa den su programa transmiti pa TVES y VTV.
E funcionario number dos di chavismo a sigura cu tanto Maduro como su siguidornan ta cla pa un confrontacion arma den caso di un accion militar stranhero.
“Nos ta prepara di hopi tempo caba pa cualkier guera prolonga. E grupo aki ta prepara. Y pa sorpresa di hopi cria, hasta sectornan opositor a uni na e iniciativa Defende e Patria,” el a subraya.
Di mesun manera, el a recalca cu den defensa nacional “tur cos ta valido, menos hunga pend**,” y a manda un mensahe na esnan cu – segun el a bisa – ta spera cu e invasion lo ta un proceso lihe. “Esun cu ta kere cu esey ta bay ta un ‘griep y un nister’ ta kiboca. E enemigonan di afo ta bay haya un sorpresa teribel, pero tambe e enemigonan di paden.”
Den un tono desafiante, Cabello tambe a manda menasa contra oposicion y e actornan internacional cu ta impulsa sancion y intervencion contra chavismo: “Si boso primi nos, nos ta primi boso. Pues bisti boso [uniform militar] pasobra loke ta biniendo ta ‘joropito’,” el a bisa.
Ademas, el a adelanta cu e congreso di Psuv, programa pa awe 11 di september, ta bay inclui como punto central e discusion tocante e “guera di henter pueblo” y un eventual “transicion na e lucha arma.”
“Esun cu ta kere cu esaki ta un guera convencional ta kiboca. Laga nan no mira nos niun caminda, pero pa nos ta tur caminda. Laga nan sinti nos ta hala rosea den nan horea,” el a bisa.
