Diamars ultimo, minister di Salubridad Publico, Mervin Wyatt-Ras a reacciona den un video contra e acusacion y “insinuacion” haci pa Sr. Jayburtt Dijhoff den un carta abierto. Despues di e reaccion di minister Wyatt-Ras, Sr. Rijkhoff a bisa riba su pagina di Facebook cu “e Cartel a spanta y a pone minister reacciona mesora.”
“Ayera Pueblo por a tuma nota di mi discurso publico como un ciudadano preocupa pa nos pais. Medio di comunicacion ta yame “un denuncia publico” y a bira viral, pasobra a yega ora pa expone e cartel y combati corupcion,” Sr. Dijkhoff a bisa den un post riba Facebook.
El a continua bisando cu den e reaccion di minister Wyatt-Ras tin tres punto di remarca. Di prome, e minister “no a desmenti cu e cartel ta existi.” Tampoco e minister “no a contesta tocante e tema y e preguntanan pero a dicidi di ataca mi personalmente. Cu mi sa, un minister no ta ataca un ambtenaar saliente y un ciudadano comun. Minister a batisami como politico? Ta kico mester pensa aki,” Dijkhoff a cuestiona.
Pa e di tres punto, Sr. Dijkhoff a reacciona riba e declaracion di minister Wyatt-Ras, cu a acusa Sr. Dijkhoff di “conflicto di interes” y “falta di integridad.”
“Laga mi splica precies kico minister a haci aki pa tur hende compronde,” Dijkhoff a skirbi. “Un minister no por divulga informacion personal di un ambtenaar/trahador bao di dje.” Esaki pasobra ta un violacion di derecho di privacidad di trahador publico, y tin un ley y hurisprudencia cu ta prohibi esaki, segun Dijkhoff. “Unico persona cu por duna permiso pa esey ta Gobernador, kiermen politicamente minister a comete un infraccion gubernamental.”
Ademas, door di a revela informacion di Dijkhoff, minister a viola principio di bon gobernacion, cu na Hulandes ta yama “zorgvuldigheid en fair play,” segun Dijkhoff a nota.
Segun Dijkhoff, “no solamente minister ta pone nos pensa e ta sigui defende e Cartel,” pero tambe su comportamento como un funcion ehemplar “maximo” por keda cualifica como:
– “Onrechtmatig handelen (schending privacy & goede naam);
– Schending ambtelijke rechtspositie (LMA);
– Misbruik van bevoegdheid, want het doel is louter politiek”.
Dijkhoff a bisa den su post cu e tin “full e derecho di demanda minister den Corte” pero cu ela dicidi pa duna e minister “un chens pa reconsidera su actonan y mustra pueblo si di berdad e ta para pa integridad of pa e Cartel.”
Tocante e acusacionnan cu minister Wyatt-Ras a haci contra Sr. Dijkhoff, publica den nos edicion di ayera y disponible riba nos website, bondia.com, Dijkhoff a reacciona bisando: “Si bo papia cu bo hefe cu bo tin pensa di kita di trabao fin di luna, anto bo a post algo riba Facebook pa test e interes prome cu bo lanta cualkier compania, esey ta hustifica nan manda bo cas pa ‘conflicto di interes?’”
Pa finalisa, Dijkhoff a reflexiona bisando cu “silencio ta alimenta corupcion. Aruba merece miho.”
Por lesa e carta abierto di Dijkhoff, y e reaccion di minister Wyatt-Ras, riba nos pagina di Facebook @bondianoticia of riba nos website bondia.com.
