Recientemente, minister di Exterior, David van Weel a contesta pregunta cu parlamentarionan di Tweede Kamer, Jan Paternotte (D66) y Derk Boswijk (CDA) haci na minister di Asunto Exterior y Secretario di Estado pa Asuntonan Interno y Relacionnan di Reino relaciona cu e articulo “Schaduwvloot onder valse vlag”, entrega dia 22 di juli ultimo.

E contestanan di minister Van Weel, den un carta publica dialuna ultimo, a bira mas relevante pa Aruba despues cu e siman aki, medionan di comunicacion di Reino a informa cu wardacosta Hulandes a intercepta un barco den Lama Nort cu tabata nabega bao bandera falso di Aruba.

Dia 8 di september ultimo, Volkskrant a reporta riba accion enfoca di wardacosta Hulandes, unda pa prome biaha un barco di e asina-yama “Flota Fantasma” – un flota di barco Ruso nabegando cu bandera falso pa evadi sancionnan di Merca – a keda intercepta via aereo. Tabata trata di e “White Condor I,” un tankero di petroleo nabegando bao bandera falso di Aruba door di e parti Hulandes di Lama Nort. E barco tabata riba lista di sancion Europeo desde mei, segun un articulo di kvnr.nl.

Fin di augustus ultimo, KVNR a publica hallazgo di inspeccionnan mustrando cu 59 barco di e Flota Fantasma tabata abusando bandera di Aruba, Sint Maarten y Corsou. Dies di e barconan aki ta riba lista di sancion. Bandera di Aruba y Sint Maarten no ta vincula na un registro di barco reconoci internacionalmente, loke ta haci nan uso fraudulento.

E intervencion di wardacosta ta un stap importante. KVNR (Koninklijke Vereniging van Nederlandse Reders) ta boga pa medidanan structural basa riba cooperacion internacional pa efectivamente combati e practica ilegal aki.

KVNR ta nota cu actualmente, barconan di e Flota Fantasma Ruso ta nabegando bao bandera di Aruba y Sint Maarten. Checkeonan semanal di KVNR na augustus 2025 den un base di dato internacional a revela cu varios decena di barco ta bulando fraudulentamente e banderanan di Aruba, Sint Maarten y Corsou, y cu e cantidad ta varia regularmente.

Van Weel: “E barconan aki no ta cay bao responsabilidad di registro maritimo di e paisnan”
 Minister Van Weel a cuminsa notando cu Corsou si tin un registro internacional di barco, pues barconan registra bao bandera di Reino na Corsou no ta necesariamente nabegando cu bandera falso.

“Combati e evasion di Rusia di sancionnan internacional ta keda un prioridad pa e gabinete,” e minister a nota, agregando cu “ta considera altamente indeseable cu ta evadiendo e sancionnan aki, particularmente ora esaki ta sucede mediante e uso ilegal di un bandera di un di e paisnan di Reino.”

Segun Van Weel, e uso di bandera falso ta un problema cada bes mas comun, y lamentablemente no ta unico. Sinembargo, “e hecho cu Hulanda, Aruba, Corsou y Sint Maarten ta activo internacionalmente den registra y atende practicanan fraudulento asina ta contribui na reputacion internacional di Reino, y mi ta keda comprometi” cu e asunto, el a nota.

E minister a bisa tambe cu preveni evasion di sancion ta un “prioridad absoluto” di e gabinete, pasobra e evasion ta mina e efectividad di y sosten pa e sancionnan. “Ta p’esey recientemente, ami hunto cu colega di 13 otro pais Europeo a duna un declaracion urgiendo mas accion conhunto y coordina pa efectivamente combati intentonan di Rusia pa evadi sancionnan internacional, specifciamente relaciona cu e Flota Fantasma Ruso.”

Contestando si tin suficiente supervision na Hulanda y e otro paisnan di Reino tocante e cantidad di barco cu bandera Caribense cu actualmente ta registra y transportando petroleo pa Rusia of Iran, Van Weel a bisa cu apart di Hulanda y Corsou, e otro paisnan di Reino no tin un registro di bandera internacional. Den contexto di ley maritimo, esaki ta nifica cu barconan nabegando bao e bandera no-existente di Aruba of Sint Maarten ta actuando den violacion di acuerdonan internacional, incluyendo e Convencion di Nacionnan Uni riba Ley di Lama (UNCLOS). Esaki tambe ta aplica riba barconan nabegando cu bandera y certificado di nabegacion falsifica di Corsou.

Sinembargo, na momento di e contesta no tabatin tankero registra oficialmente den registro di Corsou, loke ta nifica cu tur tankero actualmente nabegando bao bandera y certificado di Corsou ta fraudulento.

Pasobra e barconan aki no ta cay bao responsabilidad di registro maritimo di e paisnan, tampoco tin supervision riba e barconan aki for di paisnan den Reino. En general, ta hopi dificil pa track y atende e barconan aki, precisamente pasobra nan no ta registra. E cantidad exacto di barco ta cambia continuamente. Actualmente tin varios decena di barco, incluyendo tankero y otro tipo di barco cu no ta registra.

Van Weel a splica ademas cu barconan registra den registro internacional di bandera di Corsou of Hulanda ta someti na control estatal di bandera, incluyendo cumpli cu sancionnan internacional. Inspectorado di Transporte (ILT) di ministerio di Infrastructura y Maneho di Awa ta responsable pa esaki na Hulanda, mientras Autoridad Maritimo di Corsou (MAC) ta carga e responsabilidad aki pa Corsou.

Pero esaki no ta aplica na registracionnan fraudulento, sin importa bao cua pais dentro di Reino nan ta registra falsamente. Pa registracionnan fraudulento asina, tin cooperacion cercano dentro di Reino entre administracionnan maritimo di e cuatro pais den Reino. Ta haci esaki den cooperacion cu ministerio di Exterior y Wardacosta (di Caribe). Delegacionnan di Reino participando den reunionnan na Organisacion Maritimo Internacional (IMO) ta atende activamente e asunto di e Flota Fantasma.

Adicionalmente, Hulanda ta trahando activamente dentro di marco di UE pa sanciona barco individual, incluyendo e habilidad pa impone prohibicion di puerto riba barconan individual cu lasonan fuerte na Rusia.

Barco cu bandera di Aruba ta viola tratado y acuerdo internacional

Tanten cu barconan nabega bao bandera di Reino Hulandes y ta registra den registro di bandera di Hulanda of Corsou, ta legalmente posible pa e estado di e bandera detene e barco, impone restriccion of hasta revoca e bandera. Manera indica anteriormente, barconan nabegando bao e bandera maritimo no-existente di Aruba of Sint Maarten ta den violacion di tratado y acuerdo internacional, y por considera nan como sin nacionalidad. Esaki tambe ta conta pa barconan cu bandera y certificado Curasoleño falsifica.

Van Weel ta splica cu tin opcion legal pa detene e barconan aki asina cu nan drenta den awa teritorial. Ademas, ta posible pa haci inspeccion na wafnan Hulandes. Pafo di lama teritorial, e opcionnan ta mas limita; sinembargo, por solicita informacion a base boluntario y ta posible pa escolta barco.

Dos barco cu bandera falso di Aruba
Wardacosta recientemente a tuma contacto cu capitan di dos barco di Flota Fantasma sanciona pa UE, nabegando bao bandera falso di Aruba. A recorda nan di nan responsabilidad pa nabegacion safe di e barco, a solicita documento di e barco, y tambe a escolta e barconan aki a traves di parti di Zona Economico Exclusivo (EEZ) di Hulanda. E accionnan aki a tuma lugar di 17 pa 18 y 27 pa 28 di augustus. E ministerionan involucra actualmente ta trahando riba ki stap adicional por tuma, evaluando posibilidadnan legal y operacional. Ta haciendo preparacion pa habilita inspeccion na unda barconan ta mara bao di e registronan no-existe di paisnan dentro di Reino.