Parlamentario Xiomara Maduro ta condena e manera cu gobierno di AVP y FUTURO ta maneha e tema di rijkswet HOFA.
Minister Wever no por scapa cara
Riba e topico cayente di rijkswet HOFA, ta tristo pa mira Minister Wever purba defende su mes bisando cu “Evelyn a traha 90% di e rijkswet HOFA.” Ta un lastima cu Minister Wever no ta asumi su responsabilidad como mandatario di Pais Aruba pa para pa su actonan cu ta bay contra e derecho sagrado di Pueblo pa ta liber pa dicidi den nan mesun cas.
E 10% mas importante ta di AVP-FUTURO
“Si Evelyn a traha riba 90% di e rijkswet mes, e ora Minister Wever mester acepta cu AVP y FUTURO tabata responsabel pa e 10% mas importante cu tabata riba mesa di negociamento entre Aruba cu Hulanda. Contrario na Evelyn cu a informa Parlamento di cada paso cu ela tuma, Minister Wever hunto cu su colega ministernan di AVP y FUTURO a scoge pa traiciona e Pueblo di Aruba. Sin bisa Pueblo nada, AVP y FUTURO a cera deal cu Hulanda y den silencio total, a firma e concepto di rijkswet HOFA y manda esaki pa Hulanda sin bisa Parlamento y Pueblo nada,” Maduro ta bisa.
Un acto di traicion politico
Locual AVP y FUTURO a haci aki ta nada mas cu un acto di traicion politico. “AVP y FUTURO a entrega Aruba su lucha, nos autonomia y e futuro di nos yiunan tras di lomba di Pueblo na Hulanda. Esaki no ta ‘gobernacion ta continuacion,’ esaki ta traicion politico,” Maduro ta agrega.
Autonomia no ta un ficha pa negocia
Ta bisto cu AVP y FUTURO a sacrifica interes di e Pueblo Arubano pa un saco di placa di Hulanda, sin un debate publico, ni un voto parlamentario. “AVP y FUTURO a entrega Aruba manera un ficha riba mesa di negoshi, y e Pueblo no por keda keto pa esaki,” Maduro ta enfatisa.
Pueblo mester actua y bisa ‘No na rijkswet’
Parlamentario Xiomara Maduro ta haci un yamada na Pueblo di Aruba pa rechasa e traicion aki di AVP y FUTURO, y bisa “No na rijkswet HOFA.” Pa mustra malcontento, por yena e formulario cu ta disponibel na Cede di MEP y na e diferente punto unda cu lo colecta firma den diferente districto. “Nos ta depende di e bos y e accion di Pueblo. Firma e formulario, laga bo bos conta. Aruba no ta na benta y nos autonomia no ta pa regala,” Maduro ta conclui.
Nota di redaccion: E articulo aki ta opinion di e autor y no ta refleha opinion di Bon Dia Aruba.
