Comandante nobo, Harold Liebregs di forsanan naval, a adverti cu Venezuela ta representa un menasa serio na e islanan ABC segun medionan di prensa internacional y local.

E comandante a declara abiertamente cu Venezuela por los tiro contra Aruba y cu Venezuela por tuma control di e islanan ABC facilmente si nan pone un tiki esfuerso. Esaki por zona como algo un poco dramatico, y en realidad e ta, pa motibo cu mientras hopi den mundo di politica y media ta enfoca riba Rusia, e menasa den nos propio region Caribense ta hopi mas serio, unda e consecuencianan ta directo pa nos isla y islanan ruman.

E estado actual di defensa den Caribe

Segun Liebregs, Marina Real ta capaz di defende e islanan, aunke tambe el a admiti inmediatamente cu den caso di un atake di escala grandi, e capacidad lo bira algo “problematico.” Den otro palabranan, el a expresa cu nos lo cay den problema.

Esaki ta trece dilanti e pregunta y preocupacion si realmente nos ta bon prepara pa loke ta trata defensa. Tin suficiente recurso, tropa y suministro pa realmente tin un bon resistencia den caso di un emergencia? Of nos tin un dependencia halto riba diplomacia?

Mientras cu politica ta enfoca riba Rusia, ta subestima e peligro cu Venezuela ta posee

Loke ta di nota, ta e hecho cu Hulanda y e Union Europeo ta enfocando mas tanto riba Rusia, cu sancionnan, e guera na Ucrania y geopolitica. Sinembargo, mientrastanto tin algo hopi mas serio cu ta biniendo cerca y esaki ta un problema cu por impacta nos teritorio sin cu nos ripara na tempo.

Un pais manera Venezuela, unda tin un falta di stabilidad politico, ambicionnan militar creciente y retorica emocional contra e islanan ABC no ta algo pa ignora. Si Hulanda no responde di manera firme cu urgencia, pronto lo por bira laat.

Algun sugerencia cu a menciona ta cu mester fortalece e defensa riba e islanan ABC. Cu mas barco, mas patruyahe aereo y miho ekipo. Di un banda strategico, ta esencial pa Aruba, Bonerio y Corsou ta efectivamente protegi. Tambe ta sugeri pa tin un dialogo abierto cu Venezuela, mirando cu diplomacia ta keda un parti crucial. Sinembargo, tambe mester laga na cla cu lo contesta na un retorica agresivo. Negacion y subestimacion mester yega un fin.

Pa loke ta trata Hulanda, mester tin mas conscientisacion pa cu esaki. Tanto na ciudadanonan, media y politica mester acepta y ta consciente cu defensa no solamente ta aplica mita caminda for di Europa. E Reino tin responsabilidadnan y obligacionnan den exterior. Riba website di gobierno Hulandes, ta detaya e responsabilidadnan cu Hulanda tin pa cu e parti Caribense di Reino, y aki ta detaya cu e Reino Hulandes tin un responsabilidad cu ta acapara e relacionnan den exterior, defensa y ley di nacionalidad Hulandes y den otro parti ta dicta cu e ministerionan Hulandes di Exterior y Defensa ta sirbi tur 4 pais dentro di e Reino. Cu esaki, Hulanda tin un responsabilidad directo cu e interesnan y seguridad di e parti Caribense di Reino.

Por ultimo, ta sugeri un aumento den inversion di forsanan arma y su aliadonan. No solamente na e puntonan unda usualmente ta presta atencion, sino tambe den kazernenan local, cooperacion cu servicionan di seguridad den Caribe y ehercicionan conhunto cu e aliadonan.

Mientras mas tempo ta pasa, mas ta mira cu e situacion na Venezuela ta empeorando y cu accionnan controversial recien cu Merca a tuma, e situacion ta tumando un tono hopi mas serio unda tin cu cuminsa considera posibilidadnan y menasanan cu mas urgencia.

Potret di Dagelijks Standaard