Ayera mainta lider di fraccion di MEP parlamentario Evelyn Wever-Croes a reuni cu Su Excelencia Gobernador di Aruba, Alfonso Boekhoudt pa trece dilanti e fraccion su preocupacionnan grandi relaciona cu e topico di Ley di Reino HOFA.

Parlamentario Wever-Croes a splica na Bon Dia Aruba cu su fraccion a pidi un audiencia urgente na Gobernador di Aruba y a referi na e carta di dia 29 di augustus cu nan a manda pa presidente di Parlamento, Marlon Sneek, tambe e carta cu e mesun fecha cu a manda pa Gobernador di Aruba, cual ta e dia cu e reunion pa trata e Ley di Reino a ser yama y despues geschors ora cu parlamento a ser informa cu e Ley di Reino HOFA a ser aproba caba door di Conseho di Minister di Reino. E parlamentario a indica cu nan referi tambe un carta di dia 8 di september cu ya a bay dos rappel caba pa presidente di Parlamento.

“Den e cartanan aki nos a expresa nos preocupacionnan serio riba e hecho cu no tin informacion ta ser duna na parlamentarionan y e envolvimento di parlamento den e proceso di e Rijkswet y esaki ta stroba, e ta mina e papel di control cu parlamento tin,” Wever-Croes a enfatisa.

El a splica cu nan a pidi e audiencia urgente pasobra presidente di parlamento a priminti cu den dos siman ta yama reunion, despues cu el a ser geschors dia 29 di augustus, pero esaki no a sucede ainda ya caba ta un siman y mey mas leu.

Parlamentario Wever-Croes a remarca cu nan a pidi eigenlijk pa e reunion tuma luga prome cu e reunion di IPKO na Hulanda pa asina na Aruba, prome cu IPKO, tin un posicion cla riba e tema di Rijkswet, pero te ainda no a yama e reunion aki.

“Nos a pidi Gobernador di Aruba un audiencia pa trata e problemanan institucional y procedural cu ta stroba parlamento di haci su trabou segun Constitucion, den caso di Rijkswet. Tambe pa mas tanto cu ta posibel dentro di locual e por, pa stimula cu gobierno ta bay actua mas transparente y duna parlamento informacion trempan y bin presenta na e reunion pa debati mas lihe cu ta posibel y purba pa parlamento tin, te unda cu e por, un posicion prome cu IPKO,” e lider di MEP a enfatisa.

E situacion

Pa basta tempo caba un tormenta politico ta desaroyando na Aruba rond di e tema di Ley di Reino HOFA. Tanto fraccionnan di MEP y PPA, a manda cartanan urgente na Gobernador di Aruba y na Presidente di Parlamento pa expresa nan preocupacion serio tocante falta di transparencia, exclusion di Parlamento y posibel violacion di acuerdo interparlamentario di Reino.

Manera ta conoci e situacion a sali na cla dia 29 di augustus 2025, ora cu parlamento a ser informa cu Gabinete AVP-FUTURO ya a acorda e concepto di e Ley di Reino HOFA y cu e mesun documento a ser trata den Conseho di Minister di Reino na Hulanda. Tur esaki a tuma luga sin cu Parlamento di Aruba a ser informa, sin un participacion, y sin un oportunidad pa haci un debate substancial.

Den e carta dirigi na Gobernador di Aruba, MEP y PPA a expresa:“E ta un atake serio riba e posicion di Parlamento, manera e organo mas halto di e pais y portador di e derecho presupuestario. Parlamento ta ser poni afo di un proceso cu ta determina e futuro financiero y constitucional di Aruba.”

E tension a subi mas na momento cu e Presidente di Parlamento, contrario na peticionnan di e dos fraccion, a suspende e reunion publico cu tabata destina pa trata e topico. Esaki a causa indignacion den oposicion, cu ta mira esaki manera un restriccion pa controla gobierno

Segun e fraccionnan, e no ta solamente un falta administrativo, sino un falta di consideracion grandi pa rol constitucional di Parlamento. “E conducta aki ta alimenta e deficit democratico existente den Reino y ta daña confiansa den gobierno,” segun e carta dirigi na Presidente di Parlamento.

Dia 8 di september 2025, fraccion di MEP a insisti den un otro carta na Presidente di Parlamento pa prome cu delegacion di Aruba biaha pa Hulanda pa e Interparlamentaire Koninkrijks Overleg (IPKO) dia 21 di september, Parlamento adopta un posicion formal y publico. Segun e fraccion, solamente asina e delegacion lo por actua cu claridad y legitimidad den nomber di henter Parlamento y, den ultimo instancia, den nomber di pueblo di Aruba.

Otro carta fecha 19 di september dirigi na SE Gobernador di Aruba, a pidi pa un audencia urgente audiencia. Den e peticion aki, MEP a indica cu e urgencia a crece mas ora cu e dos siman dentro di cual Presidente di Parlamento a priminti pa reanuda e reunion a pasa sin cu reunion a sigui. “Ta di gran importancia cu Parlamento, prome cu inicio di IPKO, adopta un posicion cla y bon fundamenta riba e proceso di Proyecto di Ley di Reino,” segun fraccion di MEP.

Un punto cu e fraccion a enfatisa den tur e cartanan ta e acuerdo di IPKO 2022, den cual a keda acorda cu consenso, transparencia y envolvimento parlamentario mester ta e fundeshi pa cualkier proceso cu tin consecuencia pa autonomia di e paisnan y pa Leynan di Reino. Pa e fraccionnan, e forma cu gobierno di Aruba a maneha e asunto Ley di Reino HOFA ta un violacion directo di e acuerdonan aki.

E cartanan di fraccion MEP ta delinea varios punto cu fraccionnan ta insisti riba dje. Strobamento institucional:Parlamento ta ser stroba den ehecucion di su rol Constitucional den un proseso di Ley di Reino.

Falta di transparencia: Gobierno no ta suministra informacion na tempo, locual ta limita e posibilidad di Parlamento pa evalua y debati.

Defensa di autonomia: Pa IPKO por tuma luga cu claridad, Parlamento mester establece un posicion informa.

Respet pa acuerdonan: Gobierno mester adheri na e acuerdo di 2022 cu ta stipula participacion parlamentario for di comienso.

E enfrentacion den Parlamento ta refleha un discurso mas amplio den Reino Hulandes tocante e balans di poder entre gobierno y parlamento. Mientras cu Gobierno di Aruba, segun oposicion, a prefera un estilo di maneho sin consultacion, fraccionnan ta adverti cu esaki ta no solamente mina e democracia local, sino cu ta alimenta e malestar mas grandi den relacion cu Hulanda.

Politiconan local ta nota cu esaki por tin repercusion den IPKO mes, den cual Aruba lo mester defende su autonomia y aclaria su posicion finansiero dilanti di e otro paisnan di Reino. Sin un posicion cla di Parlamento, delegacion di Aruba por mustra debiel.

Presion riba gobierno y presidente di Parlamento ta subi. E fraccionnan ta adverti cu si no tuma accion, eskai por daña legitimidad di Aruba den discusion internacional y por haci cu pueblo ta sinti cu su voz no ta ser representa.