(AP) — Bintitres trahador a keda rescata diaranson despues di pasa 43 ora atrapa den un mina di oro cu a collapse den nort di Colombia. E mineronan a ricibi aplauso mientras nan a sali for di mina La Reliquia, ubica den departamento di Antioquia.
Agencia Nacional di Mineria di Colombia a reporta cu e entrada principal na e mina a collapse dialuna pa motibo di un “fayo geomecanico.” Un video publica pa ANM ta mustra e prome mineronan rescata saliendo di nan mes, usando un cabuya pa subi e entrada halto na e tunnel. Nan estado di salud no a keda revela inmediatamente.
Famia di e mineronan tabata wardando pa oras y a celebra nan rescate cu lagrima y aplauso.
E mina ta riba tereno perteneciendo na Aris Mining Corp. di Canada, pero ta opera pa un cooperativa di mineria local. Aris Mining a bisa anteriormente cu a duna cuminda, awa y ventilacion na e trahadornan atrapa durante e esfuersonan di rescate. E mina tin alrededor di 60 empleado y ta conta pa un “porcion chikito” di e produccion total di oro den e area.
Aris ta maneha dos concesion di mineria na Colombia, cu aña pasa a produci alrededor di 6.6 ton di oro. Produccion di oro na Colombia a aumenta na 67 ton pa aña na 2024, sosteni pa prijs halto pa e metal precioso.
Un rapport publica na 2023 pa Ombudsman di Derecho Humano di Colombia a bisa cu mas di 80 porciento di oro di Colombia ta mina pa operadornan informal sin licencia, incluyendo mineronan artesanal, pero tambe miembronan di gruponan rebelde.
E condicionnan precario na algun mina di oro na Colombia a resulta den accidente fatal. Diasabra, e curpa di siete minero a ser haya na un mina ilegal den provincia di Cauca. Team di rescate a dura nuebe dia pa yega na e trahadornan atrapa.
