Aruban Warriors ta plania stand-off pa defende acceso publico na beach na Spaans Lagoen Weg

Recientemente a traves di plataforma TikTok, presidente di Aruban Warriors – Movimento Indigena Arubano, Helena Croes, a trece dilanti un situacion cu a causa disgusto pa e organisacion y localnan di e area di Spaans Lagoen Weg. Den un video comparti por observa cu tin persona, den e caso aki segun a ser indica den e video Hulandes, a cera e beach eynan pa otro hende no haci uso di dje.

Un ciudadano, kende ta tras di e camara filmando, a expresa cu como un persona cu a crece den area di Pos Chikito simplemente no por acepta esaki. “Nos di Pos Chikito cu a lanta semper ‘kinan, anto bo ta bisa cu esaki ta di mas,” el a remarca.

Di su banda, Croes di Aruban Warriors a expresa su opinion indicando cu esaki ta algo cu ta tumando luga pa basta tempo caba, no ta algo di awor. El a splica cu tur e casnan cu ta den e bisindario ey ta cera e beach y cu antes nan tabata usa piedra, pero awor ta hacie cu palo.

Pa motibo di esaki, el a indica, e fundacion ta bay organisa un “stand-off” caminda Aruban Warriors ta bay yega Spaans Lagoen Weg, diadomingo pa 5:30 di atardi, pa demostra cu e beach ta di e localnan y no por simplemente cer’e. “Esaki ta nos luga, nan no por djis keda coy nos luga asina y e Arubianonan tur ta drumi y despues nan ta keha, ora cu no tin nada mas e ora nan ta keha,” el a remarca.

Di su banda, e ciudadano cu ta filma e video a indica cu e persona tin e luga, e beach, completamente cera y kier hasta impedi localnan di haci uso di e beach. “Nan tin e luga full cera, nos como Arubiano mes no ta e prioridad pa bin den e pida beach cu nan tin cera. Nan ta bisa nos cu nos no tin nada di haci na e luga. Ta nos isla, nos tin cu bringa pa algo, si no Aruba ta keda bay atras,” el a señala.

E topico aki ta uno cu pa basta tempo ta un tema di combersacion y na mas di un ocasion ciudadanonan a denuncia otro personanan cu kier a abusa y cera un parti di un beach y purba hacie priva.

Autoridadnan a actua, a yega di hasta duna boet y na varios ocasion a informa publicamente cu segun ley di Aruba, tur beach na Aruba ta publico y pues no por ser cera, ni privatisa niun beach. Tur persona tin derecho di haci uso di beachnan publico rond di e isla.