Aruba ta conmemora su prome International Day for Biosphere Reserves desde cu el a ricibi e designacion di UNESCO dia 5 di juni 2026. E ocasion ta pone enfasis riba con proteccion di naturalesa, bienestar di comunidad y desaroyo sostenibel por bay man den man.

E Biosphere Reserve di Aruba ta reconoce su tera y lama como un solo sistema interconecta. Su mondinan, saliñanan, mangelnan, yerba di lama y rif di coral ta duna sosten na biodiversidad, proteha costa y contribui na turismo, pesca y identidad cultural.

Rond mundo, e sitionan designa pa UNESCO, incluyendo Biosphere Reserves, World Heritage Sites y UNESCO Global Geoparks, ta haci un contribucion esencial na proteccion di naturalesa y e recursonan cu hende ta depende di dje pa su sustento. E informe di UNESCO, People and Nature in UNESCO Designated Sites, ta mustra cu e sitionan aki tin mas cu 60% di e especienan cu su distribucion geografico a wordo registra na nivel mundial y ta sostene aproximadamente 900 miyon hende. E poblacionnan di fauna cu ta wordo monitorea den e sitionan aki a keda stabiel en promedio, demostrando e importancia di conservacion efectivo y cuido di naturalesa cu participacion di comunidad.

Ehempel ta, e proyecto di Aima Coa na Parke Arikok pa reforestacion y Turning the Tide pa restauracion di mangel y rif di coral ta ilustra con e ambicionnan mundial ta wordo converti den accion local. Esfuerso pa amplia conocemento y comprension di oceano y promove educacion ambiental, incluyendo exploracion di oportunidad pa scol wordo reconoci como UNESCO Blue Schools y UNESCO Green Schools, ta fortifica e conexion entre siñamento, participacion comunitario y cuido di tera y lama di Aruba. Hunto, e esfuersonan aki ta refleha e importancia di cuida nos recursonan natural comun: e recursonan comparti cu ta forma e base di prosperidad colectivo.

Den cuadro di e celebracion, Prome Minister Mike Eman ta enfatisa e responsabilidad comparti pa proteha e patrimonio natural di Aruba:

“Nos naturalesa ta un bon comun cu nos tur ta comparti, y ta nos responsabilidad colectivo pa proteg’e y construi un futuro unda hende, naturalesa y desaroyo ta biba den harmonia.”

Prome Minister Mike Eman

E programa di UNESCO Man and the Biosphere (MAB) ta conecta conservacion, desaroyo sostenibel, investigacion y educacion. Pa Aruba, e ta ofrece un marco pa tuma decisionnan basa riba ciencia, conocemento local y participacion di comunidad.

Di 30 di november te 1 di december 2026, UNESCO lo organisa un reunion regional di MAB na Aruba pa fortifica cooperacion den Caribe riba Biosphere Reserves, intercambia experiencia y promove conservacion y desaroyo sostenibel.

Como parti di e reunion aki, Aruba lo organisa un anochi informativo dia 30 di november, habri pa publico en general. Durante e actividad lo splica e programa MAB y su papel na Aruba. Un panel cu expertonan di Nacionnan Uni y specialistanan den medio ambiente y turismo lo explora con conservacion y desaroyo por coexisti mediante decisionnan basa riba informacion.

Tur hende ta bonbini pa asisti y participa den e combersacion. E luga exacto y e orario lo wordo anuncia mas despues.