E temporada di calor na Aruba, cu usualmente ta culmina den luna di september, a presenta e aña aki cu temperaturanan extremo. Diferente instancia cu ta informa tocante clima, manera Meteo, Aruba Weather Watch y Aruba Weather Center a manda advertencia pa e poblacion protege lo mas posible di e calor intenso. Mientras tanto, durante ultimo siman, varios bario na Aruba a keda sin coriente, haciendo e situacion mas peligroso.

Aruba Weather Center, cu ta parti di Fundacion Accion Ambiental, a bati alarma pa e temperaturanan extremo durante weekend. Riba nan rednan social, Aruba Weather Center a informa cu diasabra, “un musico a bira malo door di e calor sofocante den oranan di anochi na un evento.” Den otro post mas laat, a informa cu tin mas hende cu a bira malo pa motibo di calor, entre otro, sufriendo ‘heat stroke’ den anochi “for di diabierna, diasabra y awe diadomingo tanto den oranan di merdia pa atardi y anochi.”

Teniendo cuenta cu e sucesonan aki, Aruba Weather Center a “haci un apelacion na tur persona cu ta pashent di curason, cu ta sufri di presion halto, ta sufri di sucu, esta diabetico, y otro problemanan, y pa hala rosea bon, entre nan asthma, please no expone bo mes demasiado den e calor sofocante. E por duna atake di curason of presion halto y sucu. Bo cabes ta bira y bo ta bay flauw, y no por cana y perde bista.” Nan a keda urgi pueblo pa tene tur precaucion, manera keda den sombra y fresco, evita solo, y bebe suficiente likido pa refresca.

Calor extremo
 Weekend ultimo a registra temperaturanan hopi halto. Diadomingo, e temperatura tabata 34.8°C cu ta bira 35°C y humedad 66%. E Heat Index a alcansa 48.2°C. Diasabra tabata igual. Riba diabierna, e temperatura tabata 35.9°C cu ta bira 36°C y humedad di 64%. Heat Index di 50.5°C cu ta bira 51°C, un temperatura considera extremo. Diabierna, e Heat Index ta kibra record, ya cu e record anterior tabata 49.3°C.

Ademas di esey, e rayonan Ultra Violeta (UV) ta extremadamente halto, “alcansando un 11.72 UV Index Extremo.” Motibo di e calor extremo ta cu no tin suficiente biento. Pa completa e efectonan di clima severo cu Aruba ta experimentando, y aumentando riesgo pa salud di hende vulnerable, ayera diadomingo Aruba a haya su mes bao efecto di stof di Sahara na nivel geel.

Interupcion di coriente durante weekend
 Mientras ciudadanonan tabata purba busca refugio di e calor door di cende airco of sikiera fan, na hopi bario nan a keda sin coriente, lagando e poblacion exponi na e clima peligroso.

Diasabra nochi alrededor di 10:30 di anochi, area di Savaneta a experimenta un interupcion di coriente cu a dura mas o menos un ora y mey. Segun ELMAR a informa riba nan rednan social, e causa tabata un fayo riba un kabel subteraneo.

Y anteriormente, alrededor di 5:30pm, barionan di Papilon, Primavera, Sabana Grandi, Balashi y Barcadera, a experimenta un interupcion di coriente pa alrededor di mey ora.

Santa Cruz, Piedra Plat, Matividir, Angochi, Sero Pita y mas, a keda sin coriente diabierna nochi, pa alrededor di un ora, di 8:25pm te 9:34pm. Pa e ultimo dos interupcion aki, diabierna y diasabra, ELMAR no a splica kico a causa e interupcion.

Pero riba e mesun diabierna, debi na loke ELMAR a yama “un interupcion den produccion di coriente den planta di WEB,” areanan di Pos Abou y vecindario, y Tanki Leendert y vecindario, como tambe centro di Oranjestad y Low Rise hotel a keda sin coriente tambe.

Y riba diahuebs, area di Angochi, Siribana, Sero Compa, Kadushi Largo, Santa Lucia, Mon Pos, Sabanilla Abao, Coba Lodo y Daimari tambe a keda sin coriente pa alrededor di mey ora.

Cualkier interupcion di coriente ta crea malcontento y incomodidad entre e poblacion afecta, pero weekend ultimo, den combinacion cu e temperatura di calor extremo, e interupcion di coriente a bira un peliger y riesgo pa salud di e habitantenan.

Mientras hopi ciudadano a comparti nan malcontento riba rednan social pa motibo di e calor, otronan tabata comparti tips con pa anda cu e situacion fastioso aki. “Ami a cumpra mi fan di bateria y ta charge solar tambe cu mi ta trankil ora coriente bay,” usuario J.K. a comparti. “Mi ta cla cu e empresana WEB & Elmar!!

Mi ta bay FULL OFF THE GRID pa final di 2026!!” W.G.D. a agrega. Cu un tiki humor, V.G. a comparti su tip: “mi ta bista mi badpak, hunta cu glacial y drumi pafo.”