Recientemente Ministerio Publico (OM) a publica su relato anual di aña 2024. Den esaki tin un bista cla di e esfuerso, logro y escogencianan strategico cu a forma e rumbo di OM.
Aña 2024 a marca un fase crucial den desaroyo di Ministerio Publico Aruba (OM). Den e di dos aña di implementacion di e vision “Pa 2027,” e organisacion a enfrenta e reto di haya e balansa entre fortalece su organisacion interno y atende cu criminalidad, fraude y actividadnan di minamento di forma efectivo.
E relato anual ta enfatisa cu profesionalisacion ta central pa desaroyo organisatorio. Inversionnan den training, comparti conocemento y desaroyo profesional ta forma e nucleo di e strategia. E meta di Ministerio Publico ta un sistema di husticia penal orienta na futuro, profesional y creibel cu por wanta e complehidad creciente di criminalidad.
E implementacion di e Codigo di Procedura Penal nobo na april 2024 a presenta tanto oportunidad como retonan. E codigo nobo a nifica un reforma radical di ley di procedemento penal y a encarga Ministerio Publico cu recalibra procesonan, metodonan di trabou, y colaboracion cu partnernan den e cadena. Esaki tabata rekeri un proceso di aprendisahe intensivo y flexibilidad den practica diario.
Un di e prioridadnan clave pa 2024 tabata atende cu minamento, stipula den e Plan di Accion riba Minamento. E enfoke aki ta basa riba un partnership amplio, den cual, ademas di Ministerio Publico, Cuerpo Policial Aruba (KPA), Aruba Financial Intelligence Unit (FIU), Aruba Integrity Bureau (BIA), y diferente instancia gubernamental ta participa.
E plan ta enfoca riba combatimento di crimen organisa, cu enfasis riba traficacion di droga y hende, labamento di placa y fraude. E ciclo di planificacion, implementacion y evaluacion a garantisa monitoreo continuo di efectividad. Colaboracion ta un aspceto calve pasobra sin e esfuersonan conhunto di partnernan hudicial y administrativo, combatimento di minamento no por ser alcansa sosteniblemente.
Un componente esencial di e strategia di 2024 tabata e acercamento administrativo pa combati minamento. Intercambio di informacion entre instancianan gubernamental, reguladornan y e comunidad empresarial tabata central den e acercamento aki. E parti Caribense di Reino tambe tabata envolvi den e acercamento aki, loke a conduci na consultanan conhunto, entre otro riba e rutanan di contrabanda entre Aruba, Corsou, y Boneiro.
Un ehempel concreto di cooperacion regional ta e sosten cu Aruba a ofrece na St. Eustatius, unda asuntonan di integridad y prevencion di criminalidad tabata rekeri experticio. Esaki a confirma e rol di Aruba como partner proactivo dentro di Reino Caribense.
Banda di programanan substancial, Ministerio Publica a inverti hopi den operacionnan interno. Un proyecto notabel tabata e transicion di e sistema RUBI pa PRIEM. E modernisacion aki tabata destina pa conduci na mas eficiencia y transparencia. Sinembargo, a surgi obstaculonan, manera cu e programa Paga Bo Boet (PBB), cu a resulta di ta solamente parcialmente operacional pa motibo di asuntonan tecnico y funcional.
P’esey e necesidad pa acelera digitalisacion y automatisacion ta un punto halto riba agenda pa 2027. Ta bisto cu un Servicio di Ministerio Publico efectivo no ta depende solamente di experticio huridico pero tambe di sistemanan di sosten robusto.
Den e relato anual tambe ta ser trata ampliamente e esfuersonan di educacion y formacion di Ministerio Publico. For di charlanan riba traficacion y contrabanda di hende te na presentacionnan riba labamento di placa y criminalidad cibernetico, e tema comun ta cla: comparti conocemento ta fortalece efectividad colectivo.
Ademas di cursonan substancial, a organisa simposio y tayernan caminda oficialnan di politica, fiscal y abogadonan a reuni. Colaboracion cu partnernan manera Oficina di Prevencion di Criminalidad y expertonan internacional ta enfatisa e ambicion pa keda constantemente na altura.
Un punto clave na 2024 tabata participacion den e Caribbean Financial Action Task Force (CFATF). Aruba a presenta su prome rapport di siguimento desde e evaluacion di 2022, cu a aclaria e pasonan cu e pais a tuma den combatimento di labamento di placa y financiamento di terorismo. E evaluacion a tuma luga na Jamaica y a resulta den recomendacionnan cu lo sirbi como guia pa e proximo añanan.
E dimension internacional ta innegabel: Aruba ta ubica den un region geopoliticamente sensitivo y continuamente mester alinea su infrastructura di husticia penal cu normanan mundial. P’esey participacion den CFATF no ta djis un obligacion, pero un escogencia strategico pa construi confiansa cu partnernan internacional y institutonan financiero.
E colaboracion entre e Recherchesamenwerkingsteam (RST), e oficinanan di Ministerio Publico den Reino, y e Cuerponan Policial local tabata cla y bisto na 2024. Plannan anual y agendanan operacional a garantisa coordinacion structural, enfoca riba asuntonan manera narcotrafico, labamento di placa y traficacion di hende.
E comision conhunto, presidi pa Ministerio Publico di Aruba, a hunga un rol clave den esaki. No solamente a comparti archivonan, pero tambe experticio, aumentando e efectividad. Pa un pais chikito manera Aruba, esaki ta crucial: colaboracion por compensa capacidad limita.
E relato anual ta subraya e rol di tratado y guianan internacional como un fundeshi pa politica di husticia penal. Por ehempel, na december 2024, a organisa na Den Haag un simposio tocante estado di derecho y Statuut. E simposio aki a conta cu debatenan extenso riba e futuro di Reino y e posicion di e paisnan Caribense den su seno.
Ademas e enfoke tabata riba implementacion di tratadonan dirigi riba combatimento di violencia domestico y traficacion di hende. E Plan di Accion contra violencia domestico, inicia pa Comision Stop Violencia Contra Hende Muhe y Mucha Muhe, a ricibi sosten di Ministerio Publico y ta demostra con por traduci acuerdonan internacional den politica local.
E topico di seguridad riba caminda tambe ta uno cu a ser trata den e relato anual. Mescos cu añanan anterior, esaki ta keda un area den cual mehoracionnan structural ta necesario. Esfuersonan ta enfoca, entre otro, riba cambionan den legislacion di alcohol y colaboracion cu Instituto Forensico di Hulanda, pa awor por haci test di sanger tambe localmente.
Estadistica ta mustra claramente cu infraccionnan den trafico ta representa un porcion significante di e carga di trabou di Ministerio Publico. Door di inverti den medidanan preventivo y mehoracion di aplicacion, Ministerio Publico tin como meta pa reduci e problema social aki.
Den e prome capitulo di e relato anual 2024 tin tres mensahe clave ta sali. Primeramente fortalece colaboracion, tanto local como internacional. Den esaki Ministerio Publico a logra intensifica partnershipnan. Sin colaboracion, un acercamento efectivo pa mina criminalidad ta imposibel.
Di dos, modernisacion y profesionalisacion. Relaciona cu esaki inversionnan den digitalisacion, training y comparti conocemento ta esencial pa keda na altura. Na mesun momento, e desafionan tecnico ta demostra cu esaki ta un proceso a largo plaso.
Y di tres tin ancramento internacional. Aruba su participacion den CFATF y e uso di tratado y guianan ta demostra e boluntad di Aruba pa alinea su mes cu normanan internacional y asina gana e confiansa di partnernan.
Na 2024, Ministerio Publico di Aruba tabata den un fase di transicion cla. Di un banda a tuma pasonan importante pa un sistema mas orienta na futuro y profesional. Di otro banda, obstaculonan a surgi, particularmente den e areanan di digitalisacion y e implementacion practico di sistemanan nobo.
Toch, e hilo comun ta optimista: cu un vision cla pa 2027,colaboracion intensivo, y un enfasis fuerte riba comparti conocemento, e fundeshi a ser poni pa un sistema di husticia penal robusto y creibel. E Relato Anual 2024 ta mustra cu Aruba no solamente ta responde na criminalidad pero tambe ta pensa dilanti, reforma, y innova.
