Den un auditorio yen na Banco Central di Corsou y Sint Maarten (CBCS), Conseho Social- Economico (SER) a tene su di tres seminario den cuadro di e ciclo Future of Work diamars ultimo, 30 di september, bao di e titulo “Living and Growing with AI.”
Na apertura di e evento, minister di Educacion, Ciencia, Cultura y Deporte Sr. Sithree van Heydoorn y director/secretario- general di SER, Sr. Raúl Henriquez, a manda un mensahe cla: inteligencia artificial ya no ta algo di futuro, sino e t’ey presente y ta cambiando economia y bida di nos tur. “Tardansa den tuma pasonan significante den e ambito aki, lo conduci na perdida,” asina Henriquez a adverti, specialmente pa un isla chikito manera Corsou cu mester keda relevante y competitivo den un mercado global cu ta cambiando di forma acelera.
E orado cu a haci e apertura oficial, Sr. minister Van Heydoorn, a pinta un panorama di speransa pero alabes e la manda un señal pa e publico. Van Heydoorn a urgi pa un esfuerso colectivo pa fortalece alfabetisacion digital, alertando cu sin scolnan mas fuerte y un infrastructura escolar adecua, Corsou ta risca di haci e discrepancia digital, cu actualmente ta existi, mas grandi. Henriquez, na su turno, a insisti riba cuadronan legal, señalando cu transparencia, supervision humano y regla di lei (‘rule of law’) mester keda central den cualkier uso di tecnologia basa riba inteligencia artificial.
Despues di e palabranan di introduccion, a amplia e discusion cu mas orado. Sr. Denneth van der Veen, kende ta consultor di innovacion, a defende e ponencia cu competencia digital por duna Corsou y Caribe un bentaha competitivo. Sr. Curt Belfor, director di e autoridad regulatorio di Corsou (RAC), a enfatisa e necesidad di un maneho solido y mas transparente pa cu uzo di inteligencia artificial. Sr. Juan Carlos Goilo, fundado di Global Minds Network, a haci un apelacion riba ciudadanonan pa tuma un rol mas activo den un mundo cu ta ser domina mas y mas pa algoritmonan inteligente. Sra. Nicole Wever, kende ta specialista den desaroyo di competencia y di enseñansa, a trece bon cla pa dilanti cu enseñansa, educacion y lifelong learning ta e inversionnan di mas urgente aworaki pa por sigui edifica nivel di conocemento y habilidadnan cu ta necesario pa desaroyo di nos isla.
Na e sesion ‘Microfon Habri’, mas puntonan di bista a bin dilanti. Sra. Nevita Mezas, analista di mercado laboral, a elabora riba trabao remoto y nomadismo digital, cu ta trece tanto riesgo- como oportunidadnan. Sra. Elgenie Pieternella, empresario social, a para keto na vitalidad di economia informal na Corsou den e cuadro aki. Sr. Roland Ignacio, ex-lider sindical, a insisti cu labor organisa mester tin su luga na mesa di inteligencia artificial pa protege derechonan laboral y Sr. Albert Martes, director di servicio meteorologico y alabes presidente dje Plataforma di Cambio di Clima na Corsou, a recorda cu inteligencia artificial lo sigui aporta di forma conciso y mas exacto con Corsou lo enfrenta retonan ambiental.
Loke a distingui e seminario aki for di hopi otro, tabata e formato: hopi interactivo y na cierto momento hasta confrontativo. Preguntanan for di e auditorio a varia di temor persistente pa mas brain drain te na ki forma inteligencia artificial por mina privacidad personal of debilita trabao den turismo, cu actualmente ta e sector economico mas relevante na Corsou. Panelistanan a yega na un consenso cu ta solamente un coalicion amplio di gobierno, sector empresarial, sindicatonan y sociedad civil lo por garantisa cu inteligencia artificial por ser uza na un manera responsabel y husto.
E oradonan a enfoca riba e echo cu Corsou no por atende e desaroyo aki su so. Referente na cuadronan internacional, manera e cuadro etico di UNESCO, a demostra e necesidad agudo di alinia maneho local na standardnan global. Haciendo esaki lo posiciona Corsou como un pais chikito pero suficientemente desaroya, demostrando asina curashi den adoptacion di tecnologianan moderno sin perde aspectonan manera husticia social y sostenibilidad for di bista.
Na final dje seminario, Henriquez a conclui cu tecnologia moderno basa riba IA “ta solamente un instrumento; e prueba real ta si hende por adapta.” “Nos mester actua colectivamente — gobierno, sector priva y comunidad en general — pa construi un mercado berdaderamente dinamico den e era aki di inteligencia artificial,” asina Henriquez a enfatisa. “Solamente asina Corsou lo no ta simplemente biba cu IA, sino e lo sigui crece door di dje.”
