E siman aki a drenta e noticia lamentable di un homber cu a fayece despues cu a keda envolvi den un accidente na Oranjestad. Aki tabata trata di un persona den su 50 aña coriendo riba step electronico cu a ser alcansa pa un auto riba rotonde riba Adriaan Lacle Boulevard. E caso aki atrobe ta subraya e falta di medida y seguridad adecua pa usuarionan di step electronico y bicicleta den trafico.

Bon Dia Aruba a reporta riba e problema aki varios biaha durante e ultimo añanan, poniendo un luz riba e situacion actual riba nos careteranan y enfatisando e peligro cu ciclista y vehiculonan electronico ta presenta riba caminda, ambos pa chauffeurnan den auto como cu e usuarionan mes.

Na juli 2023, Vereniging Rijschool Aruba (VRA) a expresa nan preocupacion cu vehiculonan electronico riba caminda, specialmente e ‘step’, despues di a mira un serie di accidente cu usuarionan di step resultando herida despues di ser alcansa pa auto. VRA a informa cu e tipo di vehiculonan aki mester tin un tipo di rijbewijs, y usuarionan mester tin un seguro pa haci uso di esaki den e caso si un accidente lo por sucede.

Anteriormente step tabata usa pa muchanan pero awor danki na tecnologia por mira cu adultonan ta haci uso di nan door cu nan ta electrico y nan por core distancianan un tiki mas largo na un velocidad di 30 kilometer pa ora, pero na momento cu a cuminsa traha esaki mester cuminsa regula e ley y un di e luganan cu a haci esaki ta Hulanda.

VRA a sigura e tempo ey cu na Hulanda a cuminsa coloca fietspad unda mester core te tanto kilometer pa ora y na Aruba ta existi e ‘bebouwde kom’ unda por core na un maximo di 50 kilometer pa ora, cual lo por ta mas adecua pa permiti e tipo di vehiculonan mas slow aki. Pues esakinan ta inclui camindanan menos druk den bario, por ehempel.

Sinembargo, ora ta papia di caminda grandi, incluyendo riba highway, mester por tin regulacion estricto pa stepnan no ser permiti di core riba caminda. Den e ultimo añanan nos a mira un desaroyo den e infrastructura di camindanan, unda varios caminda nobo tambe ta haya un ‘fietspad’ na banda pa asina por acomoda ciclista y usuarionan di step. Desafortunadamente esaki no ta disponible tur caminda, y hopi caminda druk—Oranjestad por ehempel—ta keda sin e facilidad aki, a pesar cu ciclista y usuarionan di step ta sigui core riba nan.

Tambe tin cu sigura cu un usuario di step ta consciente di leynan di trafico di Aruba, specialmente ora ta trata di turistanan. Si ta desea pa core step riba caminda, mester por tin un permiso cu ta indica cu e persona aki a pasa test, e tin cu bisti helm y mester paga pa plachi number y seguro, manera cualkier otro vehiculo di motor convencional.

E ora ey mag di laga hende core cune pero si no a aregla un ley pa esaki, manera VRA a señala na 2023, e ta bay bira un problema tanto pa turistanan y localnan. Y e caso mortal recien lamentablemente a proba esaki.

Bicicleta riba caminda tambe ta keda un menasa pa seguridad di trafico
Comparable cu e peligro cu vehiculonan electronico por tin riba caminda, bicicletanan tambe ta un otro tipo di vehiculo cu mester regulacion y facilidad. Tabata un aña pasa cu Bon Dia Aruba a trece e topico di ciclistanan riba caminda dilanti, unda a señala e tempo ey caba cu ciclistanan tabata presenta un peligro pa seguridad di trafico debi na e manera iresponsable cu algun ciclista ta core. Awendia, e situacion a keda pa gran parti mescos.

Automobilistanan frecuentemente ta expresa nan frustracion pasobra ciclistanan ta exigi respet riba caminda, pero nan mes no ta respeta ley di trafico, poniendo bida di nan mes y di otronan den peliger.

Ciclistanan cu kier core di manera safe, por haci uso di areanan menos transita of por ehempel di Linear Park, pero sigur riba caminda grandi ta e caminda menos adecua pa core bicicleta, y aun menos coriendo memey di caminda unda no ta laga espacio pa autonan pasa na banda y ta tene trafico pega.

Aki tambe, e problema di un falta den infrastructura adecua pa e ciclistanan aki tambe ta hunga un rol. Manera a menciona, algun caminda, specialmente e Green Corridor, Linear Park y Watty Vos Blvd. tin fietspad grandi y sigur banda di nan adecua pa bicicleta, pero no ta tur caminda tin e facilidad aki y esaki ta forma un problema pa ciclistanan cu sa core di distancianan largo.

Ademas, ciclistanan mester tin mas respet pa ley di trafico. A pesar cu tin biaha camindanan no ta permiti suficiente espacio pa ambos auto y bicicleta core hunto, ciclistanan mester tene na cuenta pa keda lo mas pafo na banda drechi cu por. Ademas mester respeta cu no ta permiti pa mas cu dos ciclista core banda di otro. Riba camindanan smal of druk, kisas lo ta consehable pa no core banda di otro mes, sino tras di otro.

E falta di facilidad ta keda principalmente un asunto cu nos gobernantenan mester alivia, pero turesten cada usuario (ciclista, usuario di step, scooter, auto y hasta peaton) mester percura pa mantene nan mes na ley di trafico, y percura pa no causa ningun disturbio, of pio, accidente y posible morto.