Durante un conferencia di prensa recien Consul di Colombia na Aruba, Sr. Gustavo Serrano Amaya, hunto cu director di Fundacion VeneAruba Solidaria, Grislynn Hernandez, a anuncia un acuerdo cu e Consulado di Colombia na Aruba y ACNUR a cera cu DIMAS den cual ta nan sostene e trayecto di flexibilisacion den maneho di admision pa indocumentadonan.

Consul Serrano Amaya a splica cu manera ta conoci siman pasa a gobierno a informa cu entrante 1 di october te cu 31 di december, lo cuminsa cu fase 4 pa loke ta trata regularisacion di migrantenan na Aruba.

El a sigui splica cu e Asociacion di Cuerpo Consular na Aruba a ser invita door di DIMAS, unda nan a ser informa riba e proceso di regularisacion y a haya e oportunidad pa haci comentario y sugerencianan, cu a ser teni na cuenta.

El a indica cu hunto cu ACNUR, e Consulado di Colombia na Aruba, a firma un acuerdo cu DIMAS pa sostene e programa di regularisacion aki, cu e consulado ta considera sumamente importante.

Manera ya ta conoci tambe e trayecto di flexibilisacion aki ta permiti migrantenan cu nan status di inmigracion no ta regularisa corectamente pa haya un permiso pa permanece riba e isla legalmente. Ta asina cu e dos entidadnan aki, Consulado di Colombia y ACNUR, a aloca nan propio recursonan pa sostene e proceso aki, y tin e sosten logistico di Fundacion VeneAruba Solidaria, cu lo ta e operador autorisa.

Pa loke ta e diferente fasenan di e trayecto di flexibilisacion, Consul Serrano Amaya a splica cu algun di e fasenan a cuminsa caba, pero algun a cuminsa un tiki mas trempan. E prome fase ta dirigi riba migrantenan cu tin garante pa aplica pa nan permiso mientras cu fase 2 ta dirigi riba studiantenan y otro categorianan.

Fase 3, cu ta un fase basta nobo y interesante, ta dirigi riba migrantenan cu tin permiso anterior pa cinco aña. E migrantenan aki por aplica pa un permiso nobo pa cinco aña mas, y durante e tempo ey, nan por cambia di dunador di trabou y traha simultaneamente. Nan por ocupa dos of mas trabao simultaneamente durante e periodo di cinco aña ey.

Adicionalmente DIMAS a baha e costo di e permiso ey, cu lo bira solamente dos mil florin pa e termino di cinco aña.

Y den fase 4, cual a cuminsa dia 1 october, DIMAS lo duna un permiso di un aña pa esnan cu no tin garante of dunador di trabou. Durante e aña ey, e migrante lo tin e oportunidad di haya un dunador di trabou cu lo firma pa nan y despues aplica pa un permiso, cu tambe por ta valido te cu

cinco aña.

Den e fase aki, e solicitantenan lo por inscribi na censo, tambe nan lo por haya AZV y adicionalmente DIMAS a reduci e costo di e permiso, cual ta duna un alivio economico na e migrantenan cu ta aplica.

El a remarca cu cada trayecto dentro di e proceso di regularisacion aki tin cierto exigencianan cu mester cumpli cune pa DIMAS por otorga e permiso.

Pa loke ta e rol di Consulado di Colombia na Aruba, ACNUR y Fundacion VeneAruba Solidaria, Consul Serrano Amaya a splica cu nan lo ta sosteniendo e fasenan 1, 2, y 3, y ta autorisa pa DIMAS pa haci e peticionnan di permiso, pidi cita, y revisa e documentacion cu DIMAS ta exigi pa e personanan cu aplica por cumpli cu e rekisitonan pa e tipo di permisonan aki.

El a remarca cu den fase 4 tin un diferencia y esaki y ta cu aplicacion pa e permiso ey mester ser haci directamente na DIMAS. Sinembargo, el a remarca, den e fase aki nan lo ta yudando cu revision di e documentacion necesario prome cu e solicitante bay DIMAS pa solicita. Pues nan lo pidi e cita, y riba e dia di e cita, e persona lo bay DIMAS cu e documentonan cu nan a revisa anteriormente.

Pa loke ta e bentaha cu e ayudo aki tin pa e migrantenan cu kier aplica pa un permiso, Consul Serrano Amaya a splica cu riba e dia cu nan tin nan cita cu DIMAS, e migrantenan por ta sigur cu nan ta cumpli cu e informacion of rekisitonan rekeri pa DIMAS, evitando di e forma aki retraso, perdida, y e necesidad pa pidi un cita nobo.

Si un persona bay directamente DIMAS y nan no ta cumpli cu e rekisitonan ora nan bay na e cita, DIMAS lo debolbe nan y nan lo mester pidi un cita nobo, y si cada biaha nan falta algun tipo di documento nan lo mester keda pidi tanto cita cu ta necesario te ora cu e documentonan ta cumpli cu tur e exigencianan di DIMAS.

“Manera mi a menciona, si un persona kier haci e peticion, loke sigur algun a haci caba, y kier haci e peticion directamente na DIMAS, nan por pidi e cita riba e portal. Esnan cu bini den e caso aki na VeneAruba, nos operador di logistica, lo ricibi, manera mi a menciona, un revision di nan documentacion y guia, cu mi ta kere ta hopi importante. Guia riba cual aplicacion por ta esun mas rapido of mas conveniente pa nan den nan caso particular,” Consul Serrano Amaya a enfatisa.

El a splica cu segun e informacion suministra pa director di DIMAS, Kathy Paskel, DIMAS lo ta habri durante siman, di dialuna pa diabierna, for di 8or di mainta pa 8or di anochi, y riba diasabra, for di 9or di mainta pa 3or. El a indica cu DIMAS ta calcula cu cada siman entre awor y 31 di december, nan lo atende mas o menos 1.700 cita pa siman.

Fundacion VeneAruba Solidaria lo duna servicio di dialuna pa diabierna, di 8or di mainta pa 5or di atardi pa inmigrantenan di tur nacionalidad u kier regularisa nan status.

E Consul a enfatisa cu ta importante pa tur interesa aplica prome cu 31 di december, fecha cu e e fase ta cera, ya cu entrante dia 1 di januari 2026, hendenan cu no tin un permiso di trabou lo ta someti na expulsion for di e isla. E beneficio aki ta conta solamente pa esnan cu a drenta e isla prome cu 1 di juli 2025, y tin un stempel di migracion den nan paspoort.

Di su banda, Hernandez a expresa cu e tres organisacionnan, Consulado di Colombia na Aruba, ACNUR y Fundacion VeneAruba Solidaria a bini hunto specificamente pa e proceso aki pa yuda tur hende pa ora nan yega DIMAS, nan tin un checklist completo, tur cos verifica pa asina e proceso ta hopi facil y suave.

“E ta berdaderamente un oportunidad unico cu ta ser presenta na henter e comunidad migrante, y e tres organisacion, e tres instituto, ta aki pa sostene boso tur na e momentonan aki. No keda afo. Nos t’ey pa sostene bo,” el a remarca.