Experiencia di ciudadano ta pone luz riba negligencia medico na Aruba

Recientemente, Albert Vrolijk, conoci na Aruba como DJ101, a comparti un storia cu tabatin un impacto fuerte entre comunidad local, unda el a bira victima di negligencia medico. “Ta hopi importante con un problema cu rudia por tabata awe algo fatal den mi bida,” Vrolijk a conta. “Y cu mal maneho por tabata algo fatal den mi bida.”

Vrolijk a cuminsa conta cu siete siman pasa diadomingo, bayendo pa su auto, el a pasa riba un tapijt berde, pero bao di dje tabatin un buraco, unda el a twist su enkel, y a golpia su rudia. “Dos dia a pasa, mi a cuid’e, bebe pildo, pone ijs riba dje. Bo sa? Ora cu bo cay bo no ta worry.” Pero diaranson, el a nota cu e pia a cuminsa hincha y tabata sinti pisa. Su prome reaccion tabata pa descansa e pia pa e inflamacion baha.

E siguiente dia sinembargo e situacion a bira pio. Y aunke el a cuminsa ripara cu algo no tabata bon, e no a preocupa, y no a pensa di bay dokter ainda. El a bebe pildo pa dolor y keda cu e pia riba cama, cu idea cu diabierna si e dolor sigui, e lo bay dokter.
“Diabierna a bati, 4or di marduga m’a lanta baña, sinti cu e pia tabata masha dolor mes.” El a dicidi di drumi riba cama descansa un rato pa despues bay dokter, pero pa 8or di mainta, e no por a lanta for di cama mas, y mester a yama un ambulance cu a transport’e pa Hospital Horacio Oduber.

Na hospital a dun’e infusion di analgesico tramadol pa baha e dolor, pero e no tabata yuda. Asina nan a dun’e un tiki morfina. Ora dokter a bin wak e, a dicidi di saca likido for di e rudia, y e likido tabata mustra normal, y despues a inyecta steroid, y a dicidi di hospitalis’e pa observacion.

E siguiente dia a nota cu e rudia tabata keda hincha, y a dicidi pa lag’e hospitalisa y un dia despues lo haci diferente test, entre otro di sanger. Vrolijk a pidi antibiotica, pero a bis’e cu prome cu por dun’e, mester check kico precies e tin.

E siguiente siman dialuna, zaaldokter a yega bisa Vrolijk cu nan a mira cu weekend a bay bon, y a dicidi di mand’e cas y bebe remedi. Vrolijk no tabata satisfecho pasobra ainda e tabatin dolor, y e rudia ainda tabata hincha, pero e dokter a insisti cu e remedi lo baha e inflacion. Sinembargo, e mesun anochi ey, el a haya “cinco stik na mi curason,” cual el a describi manera “a hinca un cuchiu.” E experiencia aki a yen’e di miedo, y “diamars a habri, mi a gradici Dios.” Pero diamars anochi a bolbe sinti e dolor na su curason y a sinti cu su man a bira pisa, loke a causa hopi preocupacion, te cu el a kere cu e no por bay want’e. Cu urgencia, su ruman a transport’e pa Eerste Hulp. A bolbe saca likido di e rudia, pero e biaha aki, e likido tabata sushi, y sanger a cuminsa sali for di e rudia. Pero “na lugar di lag’e drain, nan a tap’e.”

Vrolijk a bolbe keda hospitalisa. Na e momento ey, a cuminsa hacie pregunta si e por tuma anestesia y sanger, y otro cosnan relaciona cu operacion, cual a sorprende Vrolijk, pasobra “niun dokter a bin papia cu mi ni nada.” Y diaranson, pa su sorpresa, e enfermera a bisa Vrolijk cu e ta bayendo operacion. Despues dokter a bis’e cu ta bay ta un operacion chikito, cu lo haci un endoscopia pa mira kico por tabata pasando, y lo haci e rudia limpi. Despues di e operacion a bis’e cu e rudia ta gasta, pero nada erg. Diasabra dokter a dicidi di kita e verband y lag’e bay cas.

Pero e dolor a bolbe. Y ainda no a duna Vrolijk antibiotica, algo cu e “no ta compronde.”
El a pasa henter weekend ta bebe pildo pa dolor, pero e dolor no tabata kita. Diadomingo atardi el a yama un amigo cu ta dokter – y cu no ta traha na hospital – pa bin wak e, y e dokter aki a bis’e pa bay Colombia urgentemente, pasobra e tin un infeccion na su rudia. E dokter aki mesora a duna Vrolijk antibiotica via hangua, pasobra a considera cu tabata algo urgente. Y a pesar cu el a bebe e antibiotica pa cuatro dia, a insisti pa e bay Colombia.

Eventualmente, manera hopi Arubiano cu tin e posibilidad pa hacie, Vrolijk a dicidi di busca su salud na Colombia. Vrolijk a conta den e video cu aya nan a splik’e cu e tin un hematoma den su rudia, cu mester a retira mediante cirugia, pasobra tabata hopi peligroso. Pero mas preocupante tabata e infeccion cu tabata hopi avansa. “Mester a laba ful mi rudia,” Vrolijk a conta. “Pero Dios tabata cu mi, pasobra si m’a yega dos, tres dia laat… lo awe no tin Albert, lo awe mi no t’ey cu bosonan mas,” Vrolijk a conta cu lagrima na su wowo.

Dokter na Colombia a informa Vrolijk cu e infeccion tabata causa pa un bacteria na Aruba. “Probablemente lo a pasa ora cu mi a opera,” Vrolijk a bisa, agregando cu “e bacteria ta un bacteria mortal.” Na e momento aki ta buscando un antibiotica cu por atende esaki.

“Diamars mainta mi a haya un infectologo ta bin cerca mi, 6or y mey di mainta, sinta band’i mi na mi cama, bisa mi ‘Albert, Dios esta contigo. Esa infeccion tenia una bacteria mortal, y eso usted lo trajo de Aruba todo ese tiempo.’ Y nan a detecta cu 48 ora si mi lo a yega despues ya nan no lo por a haci nada pa mi,” Vrolijk a conta. “Nan a bisa cu Dios ta cu mi. Nan ta bay duna mi antibiotica urgentemente y cu e antibiotica aki, mi mester keda cune constant, pa tres siman of un luna, pa combati e bacteria cu mi tabatin den mi sanger.” Y e mester a keda riba cama sin por move.

Afortunadamente, e operacion tabata exitoso, a haci henter e rudia limpi, y ta spera cu e antibiotica lo or caba cu e infeccion. Pero ta bay ta un proceso largo di recuperacion. “Dokter a bisa cu ta bay ta un proceso, mi ta bay haya hopi medicamento. E dokter di Colombia a scapa mi.”

Motibo cu e ta comparti su storia ta pa adverti otronan tocante e peliger di e cuido negligente na Aruba. “Aki ta un cos cu a pasa ami, por pasa abo, por pasa tur hende, por pasa bo ser keri.”

Vrolijk ta lamenta cu e situacion di cuido na Aruba ta asina precario, y ta cuestiona fuertemente e falta di atencion pa e problema urgente aki.

“Ami ta puntra mi mes te na unda nos dokternan, of esunnan cu ta encarga cu nos dokternan na Aruba ta bay laga e cos ‘ki sigui pasa? Te na unda nos ta bay keda warda, keda keto pa tur e hendenan cu ta pasando malo na hospital?”

Vrolijk ta reconoce cu no ta tur persona tin manera pa por biaha pa Colombia riba nan propio gasto pa busca nan salud, pero e ta admiti cu tin biaha, esey ta e unico opcion pa scapa un bida. “E no ta cuenta di si bo tin manera of bo no tin manera, ta gewoon bo salud. Ruman, si bo tin cu bende kico cu ta pa bo por yega na bo salud, bende kico cu ta pa bo bay Colombia. Pasobra si bo bay warda… ruman, mi tabata dos dia di no t’ey cu bosonan mas,” el a adverti.