(AP)—Sam Rivers, bahista di e banda di nu metal Limp Bizkit, a muri diasabra, segun publicacionnan riba red social di su compañeronan di banda.
E banda no a divulga unda Rivers a muri ni e circunstancianan, pero nan a honra e musico como “puro magia” y “e alma den e zonido.”
“Desde e prome nota cu nos a toca hunto, Sam a trece un luz y un ritmo cu nunca por ser reemplasa,” nan a skirbi den un publicacion di grupo riba Instagram. “Su talento tabata natural, su presencia inolvidable, su curason enormemente grandi.”
Fred Durst, cantante principal y lider di e banda, a publica un video diadomingo mainta unda el a conta con nan a topa den un club na Jacksonville Beach, Florida, y despues a yega na fama musical y presentacionnan mundial. Durst a bisa cu el “a yora hopi desde ayera.”
“E berdaderamente tabatin un impacto riba mundo, y su musica y su don lo sigui duna pa semper,” Durst a bisa. “Mi ta stim’e hopi.”
Rivers, ken tabatin 48 aña, den pasado a papia abiertamente di su problema cu bebemento fuerte cu a causa daño na su higra. El a sali for di e banda na 2015 y despues a ricibi un transplante di higra prome cu el a reuni cu Limp Bizkit tres aña despues.
E banda tin programa un gira den Centro y Sur America cu ta cuminsa na Mexico City fin di november.
Durst a bisa cu e y Rivers a comparti un pasion pa musica grunge, mencionando bandanan manera Mother Love Bone, Alice in Chains, y Stone Temple Pilots.
“E tabatin e habilidad pa saca un tristeza bunita for di su baho cu mi nunca a tende prome,” Durst a bisa, describiendo Rivers como “asina talentoso cu mi no por splica.”
Limp Bizkit, cu su raiz den Jacksonville, Florida, a surgi durante fin di añanan 1990 cu un zonido cu ta combina rock alternativo, heavy metal y rap.
Nan sentido di humor extravagante ta refleha den e titulo di nan album super popular di 2000, “Chocolate Starfish and the Hot Dog Flavored Water,” y den un single nobo lansa luna pasa, “Making Love to Morgan Wallen.”
