E escena musical vibrante di Aruba ta preparando pa un evento emocionante cu ta mescla creatividad, trabao den ekipo y spirito di comunidad. Dia 22 di november, The Music Hub Aruba Foundation cu sosten di CEDE Aruba y Let’s Act Program, ta organisa un evento pa eleva y duna plataforma na talentonan hoben local pa expresa y presenta nan musica.

Presidente di e fundacion, Ivan Diaz, a splica cu ta trata di un torneo di paintball caminda bandanan local a ser invita pa participa, uniendo e mundo di musica y recreacion den un solo celebracion. E proposito di e evento, el a sigui splica, ta pa duna banda y musiconan local mas oportunidad pa expresa nan mes, conecta cu otro, y envolve directamente cu e comunidad di Aruba.

Entre e bandanan cu ta participa den e actividad tin Red Rush, un banda nobo dinamico forma pa un grupo di musiconan hoben cu ta comparti un pasion profundo pa musica. Aunke e banda tin solamente algun luna bieu, su miembronan ya a mustra hopi entusiasmo y creatividad.

Un di integrantenan di e banda a conta cu nan trayecto a cuminsa despues di a bay e evento di “Bataya di e Bandanan” (Battle of the Bands), caminda nan a keda inspira pa e energia y habilidad di otro gruponan local. Esaki a encurasha nan pa forma nan propio banda, cuminsa skirbi cancionnan original, y prepara pa presenta publicamente pa prome biaha.

E idea di forma un banda tabata den nan mente pa añas. Algun miembro inicialmente a spera di por a presenta na un show di talento di scol, pero retonan pa haya un vocalista y bajista a retrasa e proyecto. Pero despues di join The Music Hub Aruba nan a topa otro artistanan, a logra haya e integrantenan cu tabata falta y a cuminsa cu train regularmente den preparacion pa e evento di november binidero.

Durante e ultimo lunanan, Red Rush a traha incansablemente riba un mescla di cancionnan conoci y composicionnan original. Pa nan, e torneo di paintball no ta solamente un chens pa presenta, pero tambe un oportunidad pa inspira otro hobennan cu ta soña di traha musica.

Diaz a splica cu e mision di e evento ta pa crea espacionan unda musiconan hoben Arubiano por crece artisticamente y personalmente. Music Hub Aruba a hunga un rol central den e mision ey, yudando bandanan nobo haya nan identidad y brindando nan e recursonan y visibilidad cu nan mester. Pa Red Rush y otro gruponan cu ta presenta pa prome biaha, e evento aki ta mas cu un show — e ta un logro den nan trayecto musical.

El a enfatisa cu e iniciativa tambe ta subraya e importancia di sosten di comunidad. E actividad di november no ta limita na musiconan; e ta un dia pa famia diseña pa encurasha union y colaboracion caminda comunidad completo por disfruta y comparti.

Music Hub Aruba ta brasa un filosofia di inclusion y diversidad. Diaz a remarca cu e fundacion ta yama bon bini y ta apoya tur genero di musica, for di salsa y merengue te cu acustico y rock. E ta kere firmemente cu musica, sin importa estilo, ta un idioma universal cu ta conecta hende. El a remarca cu mundo musical di Aruba ta amplio y dinamico, y iniciativanan manera esun aki ta zorg pa cada artista, for di bandanan di carnaval te na gruponan di rock underground, haya un luga pa briya.

Papiando di musica rock en particular, Diaz a indica cu e tin un siguimento grandi pero underground riba e isla. Music Hub Aruba ta spera di tira luz riba e talento dentro di e comunidad aki y demostra cu rock por ta un forma di arte positivo, expresivo y inspirativo.

E mensahe importante di Diaz y Music Hub Aruba ta cu musiconan nunca mester sinti nan mes descurasha, sea cual sea nan genero semper lo tin oportunidadnan pa crece, presenta y ricibi sosten.

E evento di november aki ta marca djis e comienso. Diaz a splica cu plannan ta den movemento caba pa futuro festivalnan y proyectonan colaborativo cu lo sigui eleva artistanan hub. Music Hub Aruba ta desaroyando tambe un club hubenil y ta explora partnershipnan, incluyendo cu Erasmus, pa amplia programanan cu ta sostene enseñansa pa medio di arte.

Un iniciativa nobo despues di scol tambe ta den desaroyo, cu e meta pa provee ​​un ambiente sigur y creativo caminda hobennan por studia, traha huiswerk, y traha musica usando ekipo profesional di studio. Tur e proyectonan aki ta forma parti di un vision mas grandi: cultiva e siguiente generacion di musiconan mientras ta fortalece e identidad cultural di Aruba.

Pa Music Hub Aruba e conexion entre desaroyo personal y musical ta esencial. Diaz a enfatisa cu e desaroyo personal ta refleha den e musica, y e musica ta refleha den cultura, famia, y henter e pais.

Por ultimo, Diaz a extende un invitacion caluroso na henter comunidad pa asisti y sostene e talento local di Aruba mientras ta disfruta di un dia yena cu musica, arte, y diberticion familiar.