Recientemente durante un conferencia di prensa, ex-minister di Turismo y Salud, y actual miembro di parlamento di fraccion MEP, Dangui Oduber, a trece dilanti su preocupacion relaciona cu e aumento di costo di bida y e situacion den sector di turismo.
Parlamentario Oduber a expresa su preocupacion en conexion cu e encuesta cu Banco Central di Aruba a haci riba confiansa di consumidor riba economia. El a remarca cu e resultado di e encuesta ta indica cu 88% di e encuestado a bisa cu nan por cumpra menos compara cu seis luna pasa. Esaki, e parlamentario a señala, ta pa motibo cu costo di bida a subi explosivamente. “No tin caminda pa sconde mas pa sla di prijs,” el a enfatisa.
Segun Oduber e resultado di e encuesta di Banco Central ta confirma loke fraccion di MEP a bin ta señalando: “Costo di bida aumenta desde cu gobierno di AVP-FUTURO a goberna e pais, poder di compra a bay atras, tin inflacion y tur hende ta reconoce esaki, menos minister [di Finanzas, Asunto Economico y Sector Primario] Geoffrey Wever (Futuro).”
E parlamentario a indica cu durante un reunion publico den parlamento fraccion di MEP a expresa cu preocupacion y a puntra minister Geoffrey Wever si e ta reconoce e hecho cu costo di bida a subi, cu prijsnan den supermercadonan a subi exponencialmente, cu tin inflacion y cu poder di compra a bay atras.
Segun Oduber, pa nan sorpresa, en bes di e minister reconoce esaki y acepta e realidad, el a bisa den parlamento cu 99% di prijsnan na Aruba no a subi.
“Con un minister di Finanzas y Economia na Aruba, con desconecta, con desorienta y con den negacion bo ta cu bo no ta acepta y bo no ta reconoce cu poder di compra a bay atras den bo gobierno. Cu e prijsnan a subi exponencialmente, cu tin inflacion, cu tin sla di prijs tur caminda. Y en bes cu bo ta reconoce esaki y bo ta percura pa tuma accion pa mehora poder di compra, e situacion ta birando pio,” Oduber a subraya.
El a continua bisando cu encuestadonan di e encuesta di Banco Central no solamente a bisa cu poder di compra a bay atras, pero nan a bisa tambe cu nan no por spaar placa mas pasobra placa no ta yega. Segun e parlamentario, pa e proyeccion pa e siguiente seis luna, a confirma cu nan no tin expectativa cu e situacion lo mehora y cu prijs lo baha.
“Nos ta sumamente preocupa, pasobra nos ta sinti cu minister Wever como minister di Finanzas y Economia no ta tumando e accionnan necesario pa mehora poder di compra, nan no ta cumpliendo cu nan promesa di campaña, nan no ta cumpliendo cu nan programa di gobernacion. Despues di siete luna di AVP-FUTURO por conclui cu nan a gaña e pueblo aki,” el señala.
Segun parlamentario Oduber minister Wever tin cinco aña trahando riba un modelo di poder di compra cu lo mehora poder di compra y mehora calidad di bida, pero cinco aña caba pueblo ta wardando mientras prijs ta subi tur caminda.
“E gobierno aki tin prioridadnan robes , loke nan ta haciendo ta gastando e surplus cu nombramentonan di amigo y conocirnan, creando y inventando funcion pero lubidando riba nan promesa di campaña,” el a subraya.
“No tin liderazgo, no tin maneho y no tin vision”
Otro topico cu ex-minister a trece dilanti ta e resultado di turismo. Segun el a menciona pa prome biaha den historia nan ta mira un grado di ocupacion di 63% di hotelnan. “Nunca antes den historia e grado di ocupacion di hotelnan a yega na un nivel asina abou di 63%,” el a indica.
El a compara cifranan di e aña aki cu cifranan di prome cu pandemia. El a indica cu na 2018 e grado di ocupacion tabata na 77%, na 2019 e tabata 78% y despues di pandemia el a indica cu continuamente e tabata riba 70%.
Oduber a expresa su preocupacion tocante esaki y a expresa cu nan (fraccion di MEP) ta sinti cu den turismo, cu ta e unico pilar economico, no tin liderazgo, no tin maneho y no tin vision.
El a splica cu nan a ricibi e presupuesto di aña 2026 cu lo mester ser trata den parlamento den siguiente simannan, y segun e ex mandatario pa loke ta trata turismo, e minister encarga a publica solamente un liña. “Asina importante e ta considera turismo pa economia,” el a remarca.
Segun Oduber a expresa nan no ta mira cu tin accion pa loke ta trata turismo. Bayendo specificamente riba e tema di vacation rentals, el a señala cu e fenomeno aki a sali completamente for di man y cu tin casi seis mil unidad cu ta ser ofreci riba diferente plataforma di vacation rentals.
El a menciona cu como ex mandatario encarga cu turismo el a laga un ley atras completamente cla pa regula e fenomeno di vacation rentals, pero despues di siete luna nan no a mira ningun accion den e direccion aki. “Nan no ta mira prioridad den e necesidad pa regula vacation rentals. Nos ta mira con grado di ocupacion ta bahando luna tras di luna, e ultimo nuebe luna, tur luna e grado di ocupacion a baha,” el a señala.
El a indica cu fraccion di MEP a papia cu taxistanan y nan a indica cu aunke en berdad september ta un di e lunanan di mas slow di aña, e september di e aña aki tabata e september di mas slow di e ultimo decada.
Segun parlamentario Oduber a indica, taxistanan a bisa cu normalmente nan ta warda dos ora pa e sali cu turista for di aeropuerto, y e september aki nan tabata warda cuater ora. Ademas el a menciona cu doñonan di restaurant a expresa nan preocupacion tambe pasobra nan benta baha cu 60% y nan mester a manda trahadonan cas.
El a indica cu ademas di tin preocupacion pa loke ta e prestacion di hotelnan, nan ta preocupa tambe cu e turistanan cu ta yegando Aruba aworaki no ta e turistanan di calidad cu Aruba a custuma cune e ultimo ocho aña durante gobernacion di Gabinete Wever-Croes.
“Nos ta señalando e preocupacion cu ta biba den sector. Si menos turista keda den hotelnan, menos turista ta sali bay come den restaurant y consecuentemente esaki tin repercusion pa e trahadonan di hotel,” el a indica.
Parlamentario Oduber a urgi minister di Turismo, Wendrick Cicilia (AVP) pa presenta su maneho y solucion, kico ta e accionnan cu e ta bay tuma pa percura cu e grado di ocupacion di hotel ta subi, pa regula vacation rental y pa percura cu turista di calidad ta yega e isla.
