Minister di Finanzas, Asunto Economico y Sector Primario, mr. Geoffrey Wever (Futuro), a confirma cu na Washington a acorda cu Fondo Monetario Internacional (IMF) y su Caribbean Regional Technical Assistance Centre (CARTAC) lo duna asistencia tecnico (TA) na diferente departamento gubernamental durante e prome mita di 2026.
E asistencia tecnico aki ta un paso importante pa fortifica e capacidad institucional di Aruba riba tereno di maneho fiscal, planificacion climatico y resiliencia nacional.
Fortificacion di capacidad fiscal
E Fiscal Affairs Department (FAD) di IMF a confirma cu a asigna recurso pa sigui cu un programa di entrenamento pa Departamento di Impuesto (DIMP) riba e Tax Administration Diagnostic Assessment Tool (TADAT). E mision tecnico aki lo tuma lugar den 2026, y ta inclui tambe un asistencia separa riba analisis di diferencia fiscal (tax-gap analysis). Preparacionnan pa e dos misionnan lo cuminsa den 2025, den colaboracion directo entre e ekipo di FAD y e autoridadnan local.
Ademas, den november 2025, CARTAC lo brinda asistencia tecnico na Departamento di Finanzas riba e Fiscal Risk Assessment Tool (FRAT), un herment esencial pa identifica, midi y maneha riesgo fiscal na un manera structural y sostenibel.
Asistencia tecnico climatico pa un Aruba resiliente
Minister Wever a enfatisa cu Aruba no por permiti mas tardansa den su preparacion pa enfrenta e reto global di cambio climatico. Den e marco di cooperacion cu IMF, dos misionnan climatico a ser priorisa pa tuma lugar durante e prome mita di 2026, caminda tanto Gobierno di Aruba como Banco Central di Aruba lo participa activamente.
Den februari 2026, Departamento di Finanzas lo ricibi asistencia tecnico riba e Climate-Public Investment Management Assessment (C-PIMA), un metodologia desaroya pa IMF y World Bank pa integra consideracionnan climatico den planificacion economico, presupuesto nacional, y seleccion di inversionnan strategico. E ta yuda Aruba pa prepara y defende su patrimonio publico y priva contra e impacto di cambio climatico.
Simultaneamente, Banco Central di Aruba (CBA) a solicita asistencia experto riba e herment Climate Policy Diagnostics (CPD), cu ta busca pa desaroya un Climate Information Architecture (CIA) — un cuadro tecnico pa incorpora e dimension climatico den analisis macroeconomico y stabilidad financiero.
“Nos ta gradici e apoyo continuo di IMF y CARTAC. E asistencia tecnico aki ta esencial pa fortifica nos institucionnan, amplia nos conocemento y prepara nos pais pa enfrenta futuro cu stabilidad fiscal y resiliencia climatico. Aruba ta demostrando cu seriedad cu nos ta cumpli cu nos compromiso internacional y cu nos ta traha structuralmente pa un futuro sostenibel,” Minister Wever a enfatisa.
