(AP) – Un decada despues cu un estudio emblematico a proba cu duna producto di pinda pa baby come por preveni desaroyo di alergia peligroso pa bida, investigacion nobo a haya cu e cambio a haci un diferencia grandi den mundo real.
Alergia pa pinda a cuminsa baha na Merca despues di guia emiti prome na 2015 cu a revoluciona practica medico door di recomenda pa introduci e alergeno na baby cuminsando na apenas 4 luna. E tasa di alergia pa pinda den mucha entre 0 pa 3 aña di edad a baha mas cu 27 porciento despues cu a duna guia pa mucha den riesgo halto na 2015, y a baha cu mas di 40 porciento despues cu a expande e recomendacion na 2017.
“Esaki ta algo asombroso, toch?” segun Dr. David Hill, investigador di alergia na Children’s Hospital di Philadelphia y autor di un estudio publica dialuna den journal medico, Pediatrics. Hill y su coleganan a analisa registro electronico di salud di decenas di practica pediatrico pa track diagnostico di alergia di cuminda den mucha chikito prome, durante y despues cu a duna e guia.
“Mi por bin na bo awe y bisa cu tin menos mucha cu alergia di cuminda awendia cu lo tabatin si nos no a implementa e esfuerso di salud publico aki,” el a agrega.
Alrededor di 60mil mucha a evita alergia di cuminda desde 2015, incluyendo 40mil mucha cu lo a desaroya alergia pa pinda. Asina mes, alrededor di 8 porciento di mucha ta afecta pa alergia di cuminda, incluyendo mas cu 2 porciento cu alergia di pinda.
Alergia di pinda ta causa ora e sistema immuun di e curpa pa eror ta identifica proteina den pinda como dañino, y ta saca kimico cu ta trigger sintoma alergico, incluyendo urticaria (cuero ta bira cora y grawata), sintoma respiratorio, y tin biaha, anafilaxis cu por ta peligroso pa bida.
Pa decadas, dokter a recomenda pa warda prome cu duna pinda na mucha y otro cuminda cu probabilidad di genera alergia te cu 3 aña di edad. Pero na 2015, Gideon Lack na King’s College London a publica e estudio LEAP (Learning Early About Peanut Allergy). Lack y su coleganan a mustra cu introduci producto di pinda den infancia ta reduci e riesgo futuro di desaroya alergia pa cuminda cu mas di 80 porciento. Analisis posterior a mustra cu e proteccion a persisti den alrededor di 70 porciento di mucha den adolescencia.
E estudio inmediatamente a genera guianan nobo urgiendo introduccion trempan di pinda – pero poniendo esaki den practica ta slow.
Apenas 29 porciento di pediatra y 65 porciento di alergista a reporta di ta sigui e guia expandi emiti na 2017, segun encuesta.
Confusion y incertidumbre tocante e miho manera pa introduci pinda trempan den bida a conduci na e atraso, segun un comentario cu a compaña e estudio. Na comienso, experto medico y mayornan a cuestiona si por adopta e practica fuera di un estudio clinico controla.
E datonan pa e analisis a bin di un subset di clinica participante y por no representa henter e poblacion pediatrico Mericano, a nota e comentario, lidera pa Dr. Ruchi Gupta, experto den alergia di mucha na Northwestern University.
Sinembargo, e investigacion nobo ta ofrece “evidencia prometedor cu introduccion trempan di alergeno no solo ta siendo adopta sino por ta haciendo impacto midible,” e autornan a conclui.
Defensornan di interesnan di e 33 miyon persona na Merca cu alergia pa cuminda tabata complaci cu e señalnan cu introduccion trempan di producto di pinda ta birando mas comun.
“E investigacion aki ta reforsa loke ya nos sa y ta subraya un oportunidad significante pa reduci e incidencia y prevalencia di alergia pa pinda na nivel nacional,” segun Sung Poblete, hefe ehecutivo di e nonprofit Food Allergy Research & Education, FARE.
E estudio nobo ta enfatisa e guia actual, actualisa na 2021, cu ta recomenda introduci pinda y otro alergeno mayor di cuminda entre cuatro pa seis luna di edad, sin screening of test prome, Hill a bisa. Mayornan mester consulta nan pediatra pa cualkier pregunta.
“E no mester ta hopi di e cuminda, pero un purba chikito di pindakaas, yogurt basa riba lechi, yogurt basa riba soya, y manteca di mata,” el a bisa. “Esakinan ta manera hopi bon pa permiti exposicion di e sistema immuun na e alergenonan aki den un manera safe.”
