(AP) – Gobierno Hulandes ta monitor e desaroyonan di cerca na Venezuela despues cu Presidente Mericano Donald Trump a duna autorisacion na CIA pa ehecuta operacionnan scondi den e pais contra cartelnan di droga. E decision, segun e ministerio di Exterior Hulandes, ta parti di Washington su esfuerso mas amplio di aumenta presion riba e regimen di presidente Venezolano Nicolas Maduro.
Mientras cu Hulanda ta mira e decision di Merca como un continuacion di su politica contra Venezuela, e ministerio a enfatisa cu e situacion actualmente no ta cambia e evaluacion di e menasa pa e Reino Hulandes. Sin importa esaki, e oficialnan na Den Haag a confirma cu e ministerionan di Exterior y Defensa ta “monitor di cerca e desaroyonan y ta mantene otro partinan di Reino bon informa,” refiriendo na e teritorionan Caribense di Aruba, Boneiro y Corsou.
E ministerio a enfatisa cu e futuro di Venezuela mester keda determina via eleccionnan liber y husto, agregando un otorgacion reciente di e premio di paz Nobel na e lider di oposicion Maria Corina Machado, cual ta reenforsa e mensahe aki.
Presidente Trump a anuncia siman pasa cu el a duna CIA autorisacion pa ehecuta operacionnan den secreto na Venezuela. El a cita un cantidad grandi di narcotico supuestamente drentando Merca via Venezuela y e liberacion di prizoneronan di e gobierno di Maduro, cual segun Trump, tabata dirigiendo na Merca.
E Gobierno di Hulanda ta mirando e desaroyonan aki cautelosamente, al tanto di e consecuencianan regional cu e accionnan aki por tin pa e islanan ABC, cual ta situa cu un distancia cortico for di e costa di Venezuela. Cualkier escalacion di tension por afecta seguridad maritimo, patron di migracion y stabilidad regional.
Autoridadnan Hulandes a reitera cu e Reino ta keda comprometi na sostene procesonan democratico y paz regional mientras ta mantene vigilancia riba cambionan geopolitico cu por impacta su teritorionan Caribense.
