Recientemente durante un conferencia di prensa ciudadano y empleado publico Jayburtt Dijkhoff a entrega un denuncia na Ministerio Publico (OM) contra minister Mervin Wyatt-Ras. E documento ta contene tres acusacionnan principal: violacion di secreto di funcion (ambtsgeheim), maneho indebido di informacion confidencial, y abuso di autoridad.

“Cu duele na mi curason a yega e momento cu mi mester a entrega un denuncia contra minister Mervin Wyatt-Ras,” Dijkhoff a indica. El a splica cu el a tuma e decision pa entrega un denuncia formal pa motibo cu a yega na e punto cu no tin control mas den parti di gobierno.

Anteriormente Dijkhoff a entrega un rappel na vice presidente di Parlamento di Aruba, Muzannin Wever (Futuro) pidiendo un investigacion profundo riba maneho di salud publico. El a indica durante e conferencia di prensa cu e vice presidente di parlamento a contest’e publicamente cu nan no ta bay contesta e carta y cu nan ta bay referi’e na Ministerio Publico si mi tin acusacion.

“Nan a laba man manera Ponsio Pilato. Esey ta algo hopi tristo pasobra e ta bisa basicamente cu e trias politica cu tin na Aruba no ta funciona. Parlamento y gobierno ta uno, e famoso stempel parlament a ser comproba y mi ta puntra mi mes si e parlamentarionan ta compronde kico nan ta lesa pasobra e carta cu mi a manda no ta bay riba acusacionnan relaciona cu denuncia publico, pero e ta bay over e pregunta si e ta okay cu un minister no ta cumpli cu ley, cu den tres siman e mester contesta cualkier ciudadano, y ta bisa cu e no bay haci’e,” el a remarca.

El a sigui splica cu den su carta el a puntra parlamento ki señal nan ta pensa cu e situacion aki ta manda pa pueblo. El a ricibi contesta for di parlamento cu a inform’e cu nan no por haci ningun clase di investigacion.

Dijkhoff a subraya cu e respuesta ey ta mustra cu parlamento ta incapacita pa guia e pais aki. “Nan no ta ni compronde Hulandes basico y mi ta puntra mi mes kico nan a bay haci na Hulanda cu full e discusion di HOFA, kico nan ta compronde den tur e documentonan aki, ta sumamente peligroso y alarmante pa pueblo y cumpliendo tambe e ora cu mi deber como ambtenaar, ya cu e forsanan demcoratico a faya, mi a dicidi como persona y ambtenaar entrega un denuncia na Ministerio Publico,” el a agrega.

Dijkhoff a enfatisa cu esaki ta un ultimo intento pa wak si mecanismonan di democracia y ley ta funciona na Aruba.

El a splica cu el a entrega e denuncia pa tres motibo. E prome motibo, el a sigui splica, tabata cu dia cu el a haci e denuncia publico, na luga cu minister distingui weganan politico cu gobernacion a base di husticia y a base di sano huicio, e mandatario a opta pa atak’e personalmente usando informacion cu como ambtenaar bou di dje e solamente tin acceso na dje como minister pa defende su mes publicamente.

Segun el a señala esey ta un hecho castigabel y p’esey el a entrega un denuncia pa violacion di ambstgeheim. “Den su funcion di mandatario, minister Wyatt-Ras a viola e ley aki,” el a indica.

Di dos motibo pakico el a entrega e denuncia, el a splica cu como minister tambe e tin acceso na tur data y tur personal via DRH. Segun Dijkhoff na luga cu e minister ta proteha esaki e ta hustamente sak’e den publicidad, por ehempel cu e ta bay entrega su retiro y cu tin un conflicto laboral, locual el a señala tambe ta un delito.

Y por ultimo, el a sigui splica, el a entrega e denuncia pa motibo cu segun e, e minister ta abusa di su autoridad como minister.

“Desde e dia cu mi entrega e denuncia publico mi a ser categoricamente saca for di e Departamento di Salud Publico, mi a ser prohibi pa drenta cualkier edificio di departamento di salubridad publico. Fuera di esey mi no por papia cu coleganan mas, mi ta completamente isola y na luga cu tin investigacion cu ta cumpli cu e ley di LMA pa mi ser scucha, cu ta procesonan normal, e ta usa e metodo aki pa saca’mi completamente afo pa cumpli cu su strategianan politico. Esaki ta un abuso y mi a duna ministerio publico tur evidencia,” el a enfatisa.

Dijkhoff a splica cu si acumula e castigo maximo cu por ricibi pa cada acusacion, e ta acumula na un total di tres aña di castigo y alrededor di 35 mil florin di boet.

“No ta algo ligero, no ta algo cu mi tin smaak pa laga persigui personanan, mi no ta bay contra persona, pero mi ta bay si contra inhusticia y esaki ta un inhusticia. Ami conoce mi derechonan y ami sa unda pa cana. Mi ta kere ta momento pa nos papia, pa nos alsa bos y bisa cu a yega momento di cambio,” el a agrega.

Dijkhoff a probecha e momento pa aclaria cu e su motibonan pa entrega e denuncia no ta politico. El a sigura cu e no ta interes pa bira un figura politico, ni forma un partido politico, ni join un partido politico. El a reitera cu e ta trata di un movemento humanitario.

“Mi ta sinti un yamado pa esnan cu no tin bos, cu mi ta sinti cu husticia merece su luga na Aruba y esey ta mi meta pakico mi ta haci esaki. No pa ganashi personal, pero si nos tur bay dilanti, Aruba ta bay dilanti esey ta mi yamado,” el a remarca.

Por ultimo Dijkhoff a indica cu dia 31 di october ta conoci como Dia Internacional Anticorupcion y den cuadro di esaki e ta bay sigui saca mas informacion pasobra awor ta bay pa e siguiente paso den cual e ta mustra claramente cu gobierno y parlamento ta incapacita y hopi leu di pueblo pa wak kico ta e dolor, kico ta e realidad cu nan no ta ni cumpli cu ley riba cosnan basico.

El a informa cu dia 31 di october e ta bay saca mas informacion pa pueblo sigui y indica cu a yega tempo pa lanta un di cuater instituto pa yuda co-goberna cu gobierno y esey ta un “Asamblea di Pueblo.”

El a splica cu e ta un instituto conoci na varios pais rond mundo y e ta funciona. El a haci un y ta yamado na sobretodo milenials pa uni na e movemento aki. “Bo no a bin e mundo aki djis pa biba, bo ta kinan tambe pa haci un diferencia. A bin tempo pa cambia e sistema, pa traha e caminda, pa libertad pa e tempo nos dilanti. Join nos movemento pasobra a yega e momento pa reemplasa e sistema di corupcion pa un sistema di transparencia,” el a finalisa.