Gobierno ta intensifica medida contra parkeo ilegal den centro di ciudad

Recientemente durante un conferencia di prensa Minister di Husticia, Integracion, Energia y Transporte Publico, Arthur Dowers a duna un actualisacion amplio riba e situacion di trafico y parkeo den centro di ciudad. E mandatario a enfatisa cu gobierno ta traha pa restaura orden y disciplina den un area cu a sufri hopi descontrol durante e ultimo añanan.

Minister Dowers a splica cu den centro di ciudad y algun area rond di dje, tin un sistema estableci pa parkeo paga, cu ta cay bou di Aruparking, un division di Arubus. E intencion di sistema aki ta pa sigura un uso eficiente di e espacionan disponible.

Sinembargo, el a remarca, durante e ultimo añanan, e cumplimento di pago a cay dramaticamente. El a indica cu mientras un grupo di persona ta sigui paga regularmente, hopi otro ta ignora e regla y ta usa luganan sin paga, lagando esnan cu ta sigui regla sin opcion pa para nan auto.

El a enfatisa cu e falta di pago a bira un problema structural, reforsa pa un cultura di indiferencia cu a surgi durante añanan politicamente turbulento. Minister Dowers a menciona cu den pasado un figura publico, un gobernante, mes a contribui na e desobediencia generalisa, y e efecto di esey ta sigui sinti te awor. E resultado, el a señala, ta un sistema cu no ta cumpli su meta y cu ta crea frustracion tanto pa autoridadnan como pa ciudadano obediente.

E mandatario a indica cu e falta di cumplimento no ta solamente un asunto administrativo, pero e ta un riesgo pa seguridad publico tambe. El a splica cu den hopi area di ciudad, vehiculonan ta para riba acera, blokia entrada y salida di edificionan, of ta obstrui camindanan principal cu mester keda liber pa ambulance, polis y brandweer den situacion di emergencia, locual por tin consecuencia serio. “Laga nos ta alerta pa tene nos mes na reglanan,” el a enfatisa.

Minister Dowers a splica cu Aruparking y e autoridadnan di trafico ta intensifica control. DEn ultimo simannan por a tuma nota di polis y Aruparking ta ehecuta accion di control den centro di ciudad pa autonan cu ta parkeer den areanan cu no ta permiti.

El a sigui splica cu vehiculonan cu ta para sin paga of den manera ilegal por risca process verbal y hasta cu nan auto ta ser kita cu takelwagen. Aunke Aruparking no ta pone klem mas regularmente, nan tin e autoridad pa retira auto despues di un cierto periodo di tempo. El a enfatisa cu e medida aki no ta punitivo puramente, sino pa restaura respet pa regla y preveni abuso di espacio publico.

El a duna como ehempel un caso recien cu ta demostra e seriedad di e problema caminda un auto a ser kita di un espacio cu takelwagen bay tres biaha den un periodo corto, loke ta indica tambe un patron di desobediencia. El a remarca cu e suma cu e lo tin paga cu na boet, ta mas halto cu si e lo a paga un abonnement na Aruparking, loke ta demostra cu respeta regla ta no solamente legalmente corecto, sino financieramente logico tambe.

Minister Dowers a enfatisa cu e respet pa regla di trafico y parko ta fundamental pa mantene ley y orden den un sociedad civilisa. El a indica cu durante e ultimo añanan, e cumplimento di ley a debilita, den parti pa motibo politico, y esey a crea un ambiente den cual hopi hende a sinti cu nan por haci loke nan kier sin consecuencia.

E mandatario a haci un yamado na comunidad pa sigui regla, paga pa uso di e espacio di parkeo y contribui pa un sistema mas organisa. E costo ta minimo — dos florin pa parkeer den un espacio di Aruparking — y e sistema ta mas simpel pa e usuario awor. No tin mester di wak e number di vak mas, pero ta usa e nummerplaat di e auto pa paga. Esaki ta duna flexibilidad pa move di un espacio pa otro sin paga dos biaha.

Ta conoci cu e cantidad di espacio cu tin pa parkeo den centro di ciudad ta limita, y pa emotibo ey Aruparking no por garantisa un luga exacto mas cerca di trabou pa esnan cu ta traha den centro di ciudad. A pesar cu tin hende ta paga pa parkeer auto do manera legal, esnan cu no ta paga ta haci uso di e luganan lagando esnan cu si ta paga sin nada.

Pa yuda cu e presion aki, minister Dowers a menciona cu den centro di ciudad tin algun area cu tin parkeo sin costo y cu ta disponibel pa publico haci uso di dje.

Minister Dowers a enfatisa cu gobierno y Aruparking ta traha na un sistema mas riguroso pa controla abuso di e luganan di parkeo. Hende cu ta ocupa un vak tur dia sin paga of ta usa luganan destina pa persona cu discapacidad ta enfrenta sancion. Luganan cu borchi di handicap ta estrictamente pa esnan cu ta tin necesidad medico pa usa nan, y falta di respet pa esey ta un ofensa moral y legal.

E mandatario a indica cu regularmente, ora process verbal cay, mesun persona ta bolbe faya, loke ta mustra cu sin sancion mas fuerte, desobediencia ta persisti. P’esey gobierno ta analisa posibilidad pa aplica medida adicional.

Minister Dowers ta reconoce cu e situacion actual ta refleha tambe un falta di infrastructura suficiente pa e demanda di parkeo. El a indica cu tin deliberacion andando pa expande capacidad di parkeo, incluyendo e posibilidad di construccion di un parkeergarage. El a remarca cu aunke un proyecto asina no ta necesariamente genera ganashi directo, e beneficio social y funcional por hustifica e inversion. Un parkeergarage por alivia presion y facilita acceso ordena na centro di ciudad.

Un otro aspecto di e problema ta involucra e sector di turismo. E mandatario a splica cu den area banda di terminal di crucero, hopi vehiculonan di huur ta ocupa luganan di parkeo cu destina pa ciudadano cu ta si ta paga, sin paga. El a indica cu autoridadnan a manda carta formal na e companianan di huur auto, avisando cu den futuro, incumplimento por resulta den process verbal o incluso retiro di vehiculonan.

El a indica cu maneho di infraccion ta pasa pa un transicion. El a splica cu den pasado, e uso di sticker pa vehiculonan tabata un acto simbolico sin efecto real. E tabata ser usa hunto cu e uso di sistema di “klem” pa preveni daño na auto, pero e uso di sticker sin consecuencia a perde su balor. Pa motibo ey aworaki e control ta mas structura; e sticker ta solamente pa ta al tanto di e cantidad di tempo cu e auto ta para den un espacio di parkeo, y si e pasa e limite di tempo permiti, despues di cierto periodo, e vehiculo por ser retira. Un medida mas eficiente y pa evita abuso di recurso.

E costo di un takel ta significativamente mas halto cu un simpel pago di dos florin, demostrando cu cumpli cu regla ta e opcion mas racional.

Minister Dowers ta haci un yamado directo na consciencia di ciudadano. Respeta regla di parkeo y trafico no ta solamente un asunto di orden, sino di respet mutuo y civismo.