Dialuna anochi a drenta informe cu un mucha homber di apenas 6 seis aña di edad tabata perdi. Mesora famia a bati alarma y a Cuerpo Policial a publica un aviso pa comunidad keda atento. Sinembargo, algun ora despues Cuerpo policial a confirma cu a logra haya e mucha sano y salvo y cu ya e ta den brasa di su mama.
Aunke a indica cu e mucha no tabata herida y tabata completamente den bon condicion, e situacion a alarma hopi den comunidad. Mesora usuarionan riba Facebook a pidi pa mas informacion tocante e desaparicion, puntrando pa unda a mir’e ultimo y haciendo yamado pa publica y emiti e aviso aki via diferente medio di comunicacion.
Manera a compronde, e mucha a disparce despues di scol na Maria Grotti basisschool, Paradera. E mucha tabata den su uniform di scol color geel, bisti cu carson blauw, keds cora y tas di scol cu marca Sonic.
Despues cu a drenta e ultimo informe cu a haya e mucha, varios usuario a cuminsa specula kico por a pasa, ya cu secuestro no ta algo comun riba nos isla. Varios comentario a señala cu lo ta e tata di e mucha cu a bay cune sin cu e mama sa. Sinembargo, Bon Dia Aruba no por a confirma e speculacion aki.
