SPO Sta. Cruz ta fortifica conocemento di cultivo y sostenibilidad den su programa di enseñansa

SPO Santa Cruz ta un di e scolnan na Aruba cu por ta un pionero den nan programa di cultivo y plantacion y ta trece mas conocemento y aprecio riba tur locual tin di haci cu cultivo di mata, entre otro di fruta, berdura, ornamental y mata autoctono di Aruba y pa mustra e resultado final di un cosecha exitoso.

Segun Randolph Fingal, docente di Cuido di Mata cu mas di binticinco aña di experencia, e programa ta forma un base importante den e formacion di e hoben studiante, inculcando lesnan practico y teoretico tocante e proceso di plantacion. “Nos ta cuminsa for di e nursery, unda e matanan ta naci y ta crece, te cu nan ta desaroya y ta pasa na e seccionnan corespondiente,” Fingal a splica.

Den e nursery di SPO Sta. Cruz, e studiante ta siña paso a paso riba cultivo di berdura, fruta y mata ornamental, uzando metodo di ‘stek’ y plantacion directo den cunucu. E proceso ta inclui tur etapa di cultivo: di preparacion di tera, control di malesa, te na cosecha di mata.

Ademas di e sistema tradicional, e scol ta incorporando tambe un sistema di hydroponics den nan greenhouse moderno, cu ta basta amplio y bon ekipa. Esaki ta duna e studiante oportunidad pa haya conocemento den un ambiente di enseñansa cu tecnologia nobo y sostenibel.

Fingal a enfatisa cu un di e partinan mas valioso ta e experencia personal di e studiante, ora nan por mira e resultado final di nan esfuerso. “Si e proceso ta sigui manera cu ta instrui, e resultado mester ta positivo. Pero ora algo no bay segun plan, ta un oportunidad pa siña y crece”.

Docente Fingal a expresa su gratitud pa e colaboracion di diferente instancia durante e aña, cu a yuda fortifica e programa cu ekiponan moderno y sosten tecnico. “E meta no ta solamente pa chapi of planta mata, pero pa compronde henter e proceso di cultivacion y mantencion di un hardin. Esaki ta enseñansa pa bida,” Fingal a conclui.

Cu e programa manera SPO Sta. Cruz, Aruba ta sigui inverti den formacion practico y sostenibel di e hobennan y prepara nan pa un futuro cu mas consciencia ambiental y conocemento agricola.