CBS a presenta recientemente e indice di prijs di consumo pa luna di september di aña 2025, den cual ta comparti diferente dato di gran importancia pa comunidad. Den edicion di awe, nos lo cubri e cambio di prijs di petroleo, utilidad, gasolin y diesel na september di 2025, cambio den prijs di cuminda y servicio di catering y e CPI pa periodo di September 2024 pa september 2025.

Cambio di prijs di petroleo, utilidad, gasolin y diesel

Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na September 2025 e prijs promedio pa bari di petroleo (US$ 63.99) a conoce un caida di US$ 1.68 (-2.6%) compara cu Augustus 2025 (US$ 65.67).

Prijs di electricidad y di awa no a cambia compara cu Augustus 2025. Consecuentemente, e prijs promedio di electricidad pa vivienda a keda Afl. 263.67, mientras cu e prijs promedio di awa pa vivienda a keda Afl. 168.73.

Prijs di gasolin no a registra cambio na September 2025 y no a causa ningun efecto riba e CPI. Prijs di diesel a registra un caida di Afl. 8.20 cent (-4.0%) na September 2025 y a causa un efecto di -0.01 ppt riba e CPI.

Na September 2025, utilidad, gasolin y diesel como grupo, tawata tin un caida den prijs di 0.1% compara cu Augustus 2025 y hunto tabatin un influencia di -0.01 ppt riba e CPI, mientras cu e restante 404 bienes y servicio hunto, a conoce un subida leve di prijs di 0.04% y tawata tin un efecto di 0.03 ppt riba e CPI.

Cambio di prijs di Cuminda y servicio di catering

E indice di “Cuminda & servicio di catering” a registra un subida di 0.5% na September 2025, despues di a registra un subida di 0.3% na Augustus 2025. E indice di “Cuminda na cas” (0.4%) a registra un subida, unda ocho (8) di e diesun (11) indicenan di e gruponan di cuminda na cas a subi na September 2025. E indice di “Fruta” a conoce e subida di mas grandi (3.1%) na September 2025.

Otro subidanan significante a wordo registra den e indicenan di “Lechi, keshi y webo” (1.4%), “Restante productonan pa alimentacion” (1.2%), “Sucu, jam y otro tipo di cos dushi” (0.8%) y “Azeta y otro productonan traha di vet” (0.8%).

E caida mas grandi a wordo registra den e indice di “Batata, yuca y batata dushi” (-8.7%) na September 2025. E indice di “Cuminda pafo di cas” a registra un subida di 0.6% na September 2025.

Na September 2025, “Cuminda na cas” y “Cuminda pafo di cas” como grupo, tawata tin un subida di prijs di 0.5% compara cu Augustus 2025 y hunto tawata tin un influencia 0.08 ppt riba e CPI, mientras cu e restante bienes y servicio hunto a experencia un caida di prijs di 0.1% y tabatin un efecto di -0.05 ppt riba e CPI.